Sanguhuku 6:1-40
6 Lafuli zui lafalua zala iraono Gizaraʼeli föna Yehowa,+ andrö wa ilulu ira Yehowa ba danga niha Midiano, fitu fakhe waʼara.+
2 Ba lafatörö ndraono Gizaraʼeli ira niha Midiano.+ Börö niha Midiano, andrö wa lafazökhi nahia waminira* iraono Gizaraʼeli ba hili, ba dögi narö hili hegöi ba nahia si tebai möi niha.+
3 Na no manaru tanömö zinanö ndraono Gizaraʼeli, möi niha Midiano, Amaleki+ hegöi niha moroi ba Gatumbukha+ ba wanuwö yaʼira.
4 Lafazökhi nosera ba wanuwö iraono Gizaraʼeli ba lafakiko mbua zinanö ofeta ba Gaza, irege lö hadöi balazo ndraono Gizaraʼeli, ahori mbiri-biri khöra, sawi mazui kalide.+
5 Tohare ndra niha daʼö ba wamakiko soi andrö. Laʼohe gurifö hegöi ose simane faʼoya damo,+ ba tebai muʼerai waʼatora+ hegöi faʼoya gondra khöra.
6 Sindruhu-ndruhu wa tefakao ndraono Gizaraʼeli börö niha Midiano, ba laʼandrö wanolo khö Yehowa iraono Gizaraʼeli.+
7 Me laʼandrö wanolo khö Yehowa iraono Gizaraʼeli börö niha Midiano,+
8 ifatenge khöra samösa zamaʼeleʼö Yehowa ba wangumaʼö, ”Daʼa niwaʼö Yehowa Lowalangi ndraono Gizaraʼeli: ’No uheta ami moroi ba danö Miserai ba no uʼefaʼö ami moroi ba nahia wangosawuyu.*+
9 No uʼefaʼö ami moroi ba danga niha Miserai hegöi ba danga zamakao yaʼami. No uheta ira fönami, ba ubeʼe khömi danöra.+
10 No uwaʼö khömi, ”Yaʼo Yehowa Lowalangimi.+ Böi miʼataʼufi lowalangi niha Gamori andrö hewaʼae ba danöra toröi ami.”+ Hizaʼi, lö mifondrondrongo* ligu.’”+
11 Ba gafuriata, tohare malaʼika Yehowa+ ba modadao ia barö geu sebua ba Gofera, tana khö Yoasi niha Gabiezeri.+ Mamöbözi gandru nono Gideono+ ba naha wamera agu enaʼö lö laʼila ia niha Midiano.
12 Ifalukhaisi ia malaʼika Yehowa imane, ”Fao khöu Yehowa,+ börö me saradadu sabölö ndraʼugö.”
13 Imane Gideono, ”Bologö dödöu Pa, na sindruhu fao khöma Yehowa, hana wa alua khöma daʼa fefu?+ Hezo dandra sahöli-höli dödö nifaluania, si no latutunö ira tuama?+ Lamane, ’No iʼefaʼö ita Yehowa moroi ba danö Miserai.’+ Iadaʼa, no iröi ndraʼaga Yehowa+ ba ilulu ndraʼaga ba danga niha Midiano.”
14 Ifaigi ia Yehowa* ba imane, ”Aeʼe ba ogunaʼö waʼabölöu ba wangefaʼö iraono Gizaraʼeli ba danga niha Midiano,+ börö me yaʼo zamatenge yaʼugö.”
15 Aefa daʼö imane Gideono, ”Bologö dödöu Yehowa, hewisa wa tola uʼefaʼö ndraono Gizaraʼeli? Moroi ba mado Manase fefu, ha ösi nomo namagu* wondrege zide-ide. Ba zi sambua ösi nomoma, ha yaʼo zi lö guna.”
16 Imane Yehowa, ”Börö me fao ndraʼo khöu,+ ökalaisi dania niha Midiano hulö zi ha samösa.”
17 Aefa daʼö imane Gideono, ”Na sindruhu ebua dödöu khögu, beʼe khögu dandra wa yaʼugö zi fahuhuo khögu.
18 Böi ofanö irege mangawuli ndraʼo ba wameʼe sumange khöu ba utouʼö fönau.”+ Imane malaʼika andrö, ”So manö ndraʼo ba daʼa irege mangawuliʼö.”
19 Mofanö Gideono ba irino nambi sawuyu-wuyu ba ifazökhi roti si lö mufaruka ragi ba zi 22 liter* tarigu.+ Ifaʼanö ba raga-raga nagole nambi andrö ba kuania ibeʼe ba garawa side-ide. Aefa daʼö, iʼohe baero ba itouʼö barö geu sebua andrö.
20 Imane malaʼika Lowalangi sindruhu, ”Ba dete gara sebua andrö beʼe nagole awö roti si lö mufaruka ragi, ba faduwa kuania.” Ifalua daʼö Gideono.
21 Aefa daʼö, itutugö mbalö ziʼonia malaʼika Yehowa andrö ba nagole hegöi ba roti si lö mufaruka ragi, ba alua galitö moroi ba gara, iʼa nagole awö roti si lö mufaruka ragi.+ Mofanö malaʼika Yehowa föna Gideono.
22 Awena aboto ba dödö Gideono wa malaʼika Yehowa daʼö.+
Iʼanemaiʼö imane Gideono, ”Alai ndraʼo daʼa Yehowa Lowalangi Fondrege Zalawa, no faʼila bawa ndraʼaga malaʼika Yehowa!”+
23 Imane khönia Yehowa, ”Yaʼohahau dödöu, böi ataʼufi,+ lö mate ndraʼugö.”
24 Andrö ifazökhi Gideono naha wanunu sumange khö Yehowa, lafotöi ia irugi maʼökhö Yehowa Andrö Faʼohahau Dödö.*+ So manö nasa naha wanunu sumange andrö ba Gofera, banua niha Gabiezeri.
25 Imane Yehowa bongi daʼö, ”Halö zawi si matua sawuyu-wuyu khö bapamö, yaʼia daʼö sawi si matua ganete ziaʼa si no fitu fakhe. Dudugö naha wanunu sumange Mbaʼali khö bapamö, ba fufu döla-döla niʼamoniʼö* si so ba zi tambainia.+
26 Ba dete göli andrö, faʼanö yawa gara si tobali naha wanunu sumange khö Yehowa Lowalangimö, ba beʼe zawi si matua sawuyu-wuyu andrö tobali sumange nitunu yawa ba dete döla-döla niʼamoniʼö* nidudugömö.”
27 Ifalua daʼö Gideono ba dafulu genoninia si fao khönia, simane niwaʼö Yehowa. Hizaʼi, lö ifalua daʼö ba zi maʼökhö, börö waʼataʼunia ba nösi nomo namania hegöi niha mbanua. Andrö wa ba zi bongi ifalua.
28 Me maoso niha mbanua sihulö wongi daʼö, laʼila wa no adudu naha wanunu sumange khö Mbaʼali, no afufu göi döla-döla niʼamoniʼö* ba zi tambainia, ba so zawi si matua sawuyu-wuyu ba dete naha wanunu sumange si no mufazökhi.
29 Faoma lamane khö nawöra, ”Haniha zamalua daʼa?” Me no lafareso lamane, ”Gideono ono Yoasi.”
30 Lamane niha sato khö Yoasi, ”Ohe baero nonomö! Si mate ia börö me no idudugö naha wanunu sumange khö Mbaʼali awö döla-döla niʼamoniʼö* ba zi tambainia.”
31 Imane Yoasi+ ba nudunia, ”Hadia faʼawö ami khö Mbaʼali? Hadia moguna milumöʼö ia? Gofu haniha zangoʼawögö Baʼali, lö tola löʼö labunu ia sihulö wongi daʼa.+ Na lowalangi atö ia, yaʼiʼoʼawögö ia samösa+ börö me no adudu naha wanunu sumange khönia.”
32 Me luo daʼö, Yoasi zamotöi Gideono tobali Yerubi-mbaʼali* imane, ”Yaʼiʼoʼawögö ia samösa Baʼali börö me no adudu naha wanunu sumange khönia.”
33 Hasara dödö ndra saradadu Midiano,+ Amaleki+ hegöi niha moroi ba Gatumbukha,+ ba laʼötö nidanö numalö ba Ndraso Yezereʼeli, lafazökhi nosera ba daʼö.
34 Aefa daʼö, itema geheha niʼamoniʼö Gideono+ moroi khö Yehowa ba ifoli dorofe nifazökhi moroi ba dandru+ irege tohare niha Gabiezeri+ ba laʼoʼö ia.
35 Ifatenge denge-tengenia ba zi sagörö mado Manase, Aseri, Sebuloni ba Nafetali, irege laʼondrasi ia.
36 Imane Gideono khö Lowalangi sindruhu, ”Na sindruhu yaʼo niʼogunaʼömö ba wangefaʼö iraono Gizaraʼeli, simane nifabuʼumö,+
37 beʼe khögu dandra. Bu mbiri-biri andre ubeʼe ba naha wamöbörö. Na abasö mbu mbiri-biri andrö ba namo ba oköli danö ba zi fasuinia, aboto ba dödögu wa öʼogunaʼö ndraʼo ba wangefaʼö iraono Gizaraʼeli simane nifabuʼumö.”
38 Daʼö zalua. Me maoso ia sihulö wongi daʼö, iferaʼö mbu mbiri-biri andrö ba so sambua mako sebua waʼoya namonia.
39 Hizaʼi, imane Gideono khö Lowalangi sindruhu, ”Böi ofönu khögu, so sambua tö gangandröwagu. Tehegö khögu sakali tö ba wangandrö tandra ba mbu mbiri-biri andre. Sakali daʼa, basöi fefu danö faoma namo hizaʼi böi abasö mbu mbiri-biri andrö.”
40 Daʼö nifalua Lowalangi ba zi bongi daʼö. Fefu danö oi abasö ba namo, hatö bu mbiri-biri andrö zi lö abasö.
Nisura ba gahe zura
^ Mazui te ”nahia wamini ba narö danö”.
^ Sin.: ”moroi ba nomo wangosawuyu”.
^ Mazui ”miʼoʼö”.
^ Eluahania malaʼika Yehowa.
^ Sin.: ”si saribu tana khögu”.
^ Mazui ”Yehowa-syalom”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Eluahania ”Yaʼiʼoʼawögö Ia Baʼali Föna Zanguhuku”.
