Sanguhuku 7:1-25
7 Ihulö wongi wemaoso Yerubi-mbaʼali yaʼia daʼö Gideono+ awö zaradadunia ba nosera sahatö ba Gumbu Nidanö Harodi. Lafazökhi göi nosera tanö yöu ira niha Midiano ba zi tambai ndraso Hili More.
2 Imane Yehowa khö Gideono, ”Ato sibai ndra saradadumö. Na ubeʼe ba dangara niha Midiano,+ tola manö fayawa ndraono Gizaraʼeli ba lamane khögu, ’Tangama andre zangefaʼö yaʼaga.’+
3 Börö daʼö ombakhaʼö khöra, ’Haniha zataʼu ba sanizi, yamangawuli ia.’”+ Itandraigö ira Gideono ba tesöndra 22.000 niha zangawuli ba hatö 10.000 niha zi toröi.
4 Imane Yehowa khö Gideono, ”Ato sibai nasa. Waʼö khöra weʼamöi mitou ba nungo nidanö enaʼö utandraigö ira ba daʼö khöu. Na umane, ’Daʼa zi fao’, ba hasambalö wa fao ia. Na umane, ’Tebai fao daʼa’, ba hasambalö wa tebai.”
5 Börö daʼö, iʼohe ira mitou ba nungo nidanö.
Imane Yehowa khö Gideono, ”Niha samadu idanö moroi ba laluʼania hulö nasu samelai idanö, daʼö niha nifasafimö moroi khö ndra niha samalöduhini tanö ba wamadu idanö.”
6 So 300 zamadu idanö moroi ba laluʼara, ba tanö böʼönia labalöduhini danö wamadu idanö.
7 Imane Yehowa khö Gideono, ”Niha si 300 samadu idanö andrö moroi ba laluʼara, daʼö niʼogunaʼögu ba wangefaʼö yaʼami, ba ubeʼe ba dangau niha Midiano.+ Fofanö danö böʼö enaʼö mangawuli ira ba nomora.”
8 Niha si 300 andrö lahalö zoguna khöra moroi ba ndraono Gizaraʼeli daʼö no mege hegöi torofe nifazökhi moroi ba dandru. Ifofanö fefu ndraono Gizaraʼeli ba hatö si 300 niha andrö zi toröi. Me luo daʼö, ba ndraso tanö tou so nose niha Midiano.+
9 Imane khönia Yehowa ba zi bongi daʼö, ”Faoso, suwö nose niha Midiano börö me no ubeʼe ira ba dangamö.+
10 Hizaʼi, na ataʼu ndraʼugö fasuwö, ohe awöu genonimö andrö sotöi Fura weʼamöi mitou ba nose.
11 Fondrondrongo hadia niwaʼöra aefa daʼö öʼokhögö waʼabarani* ba wanuwö ose andrö.” Ba mofanö ia mitou ba zinga nose zaradadu, fao khönia Wura sawuyunia andrö.
12 No owulo niha Midiano, niha Gamaleki hegöi niha moroi ba Gatumbukha,+ lafönui ndraso andrö hulö damo, ba tebai muʼerai waʼoya gondra khöra+ hulö simane gawu ba zinga nasi.
13 Me ofeta Gideono, so niha sanutunö fangifinia khö nawönia, ”Ba wangifigu, so roti barli niʼogaolo si tegaölö ba nose niha Midiano. Roti daʼö, abölö-bölö sibai wanandrunia ose andrö irege adudu.+ Asoʼa nose daʼö ba fadaya tou ba danö.”
14 Imane awönia, ”Föda Gideono daʼö,+ ono Yoasi niha Gizaraʼeli andrö. No ibeʼe ba dangara niha Midiano Lowalangi awö nosera maʼafefu.”+
15 Me irongo wangifi daʼö Gideono awö geluahania,+ ituhi danö föna Lowalangi. Lö ara, mangawuli ia ba nose ndraono Gizaraʼeli ba imane, ”Faoso, no ibeʼe ba dangami nose niha Midiano Yehowa.”
16 Aefa daʼö, ifotölu ngawawa niha si 300 andrö ba ibeʼe khöra dorofe nifazökhi moroi ba dandru+ hegöi naha nidanö sebua ba no mubeʼe bakha ba daʼö solo.
17 Imane khöra, ”Mifaigi ndraʼo ba mifalua zimane nifaluagu. Miʼoʼö zimane nifaluagu na urugi zinga nose.
18 Ba ginötö ufoli dorofe hegöi ngawawa si fao khögu, ba mifoli göi dorofe ba zi fasui nose ba miʼao, ’Föda Yehowa ba föda Gideono!’”
19 Me arakhagö talu mbongi, aefa sibai falali ndra sanaro* ba nose andrö, ofeta Gideono awö zi 100 niha si fao khönia ba zinga nose. Lafoli dorofe nifazökhi moroi ba dandru+ ba laboto naha nidanö sebua si so ba dangara.+
20 Si tölu ngawawa andrö lafoli dorofe nifazökhi moroi ba dandru ba laboto naha nidanö sebua niʼohera. Lafazawa solo faoma tangara kabera ba lafoli dorofe ba dangara kambölö. Aefa daʼö muʼao ira, ”Föda Yehowa ba föda Gideono!”
21 Mosindro manö ira ba nahiara zamösana ba zi fasui ose, ba moloi fefu ndra saradadu Midiano si fao feʼira-ira.+
22 Lö aetu lafoli dorofe nifazökhi moroi ba dandru ira niha si 300 andrö, ba ifawukaisi niha si so ba nose andrö Yehowa irege lasuwö nawöra zamösana.+ Moloi ndra saradadu andrö irugi Mbeti-hasita, ba Zereda ofeta ba Habeli-mehola+ ahatö ba Dabata.
23 Laʼowuloi fefu ndraono Gizaraʼeli moroi ba Nafetali, Aseri, ba fefu niha Manase,+ lagohi niha Midiano.
24 Ifaʼoheʼö goroisania Gideono ba mbanua hili Geferai maʼafefu, ”Miʼae mitou ba wanuwö niha Midiano ba mirabu nahia götöna ofeta ba Mbeti-bara hegöi Ungo Nidanö Yoridano.” Owulo fefu niha Geferai ba larabu nungo nidanö andrö irugi Mbeti-bara hegöi Ungo Nidanö Yoridano.
25 Laraʼu göi zondröniaʼö Midiano si darua yaʼia daʼö Orebi ba Sebi. Labunu Gorebi+ ba dete Gara Gorebi ba labunu Zebi ba Naha Wamera Agu Zebi. Lö laböhöli wolohi niha Midiano+ ba laʼohe högö Gorebi hegöi Sebi khö Gideono ba zinga Nungo Nidanö Yoridano.
Nisura ba gahe zura
^ Sin.: ”abölö dania dangau”.
^ Sin.: ”Böröta wamalali sozago ba zi talu mbongi”, te mato bözi 10 ba zi bongi irugi bözi 2 arakhagö moluo.
