Sanguhuku 8:1-35
8 Lamane ira niha Geferai khö Gideono, ”Hana wa mifalua zimane daʼö khöma? Hana wa lö mifaogö ndraʼaga ba wolawa niha Midiano?”+ Aefa daʼö, fabuʼa-buʼa ira khönia.+
2 Itema lira Gideono, ”Hadia tenga no abölö ebua nifaluami moroi ba nifaluagu? Hadia tenga no abölö sökhi zi toröi mbasitö Geferai+ moroi ba mbasitö nagu Gabiezeri?+
3 No ibeʼe ba dangami zondröniaʼö Midiano andrö Lowalangi sotöi Orebi hegöi Sebi.+ Hadia tenga no abölö ebua nifaluami moroi ba nifaluagu?” Ba me iwaʼö wehede daʼö, alö saʼae wönura.
4 Ba ofeta Gideono ba Nungo Nidanö Yoridano ba iʼötö nidanö andrö. Erege dödönia hegöi si 300 saradadu si fao khönia, hizaʼi lö laböhöli wolohi udura.
5 Imane ba niha Zukhota, ”Uʼandrö khömi, mibeʼe roti ba niha si fao khögu andre. Marase sibai ndraʼaga ba wolohi Seba hegöi Salamuna razo niha Midiano.”
6 Hizaʼi, lamane ira sondröniaʼö Sukhota, ”Hadia no tebeʼe ba dangau Zeba faoma Salamuna irege mabeʼe roti khö ndra saradadumö?”
7 Imane Gideono, ”Börö wehedemi andrö, na no dania ibeʼe ba dangagu Zeba faoma Salamuna Yehowa, ba ufalisi ami faoma duʼu sodoi ba eu sodoi si tumbu ba danö si mate.”+
8 Iʼotarai daʼö, numalö ia ba Wenueli ba ifuli zui mangandrö tolo ia simane daʼö. Hizaʼi, fagölö wehede niha mbanua Wenueli simane fehede niha mbanua Sukhota.
9 Imane göi ba niha mbanua Wenueli, ”Na lö hadia ia khögu na mangawulido, ududugö dania malige daʼa.”+
10 Me luo daʼö, ba Garakoro so Zeba faoma Salamuna, fao khöra ndra saradadu si 15.000 niha. Hatö yaʼira zaradadu si toröi ba Gatumbukha,+ börö me no ahori mate zaradadu tanö böʼö solohe föda si 120.000 waʼato.
11 Itohugö wofanö Gideono, itörö lala si toʼölö latörö niha si toröi ba nose-ose, tanö ba gatumbukha Noba hegöi Yogebeha,+ aefa daʼö isuwö nose andrö ba zi lö ladöna-döna.
12 Me moloi Zeba faoma Salamuna, igohi ira Gideono. Iraʼu razo Midiano si darua andrö, Seba ba Salamuna, irege kaliru fefu niha si toröi ba nose.
13 Me no awai fasuwö ira, mangawuli Gideono ono Yoasi itörö lala si numalö miyawa ba Heresi.
14 Ba wofanönia, iraʼu samösa nono matua moroi ba Zukhota ba manofu ia. Isura khönia ono matua andrö döi-töi zi 77 ndra sondröniaʼö hegöi satua mbanua ba Zukhota.
15 Aefa daʼö, möi Gideono wamalukhaisi niha mbanua Zukhota ba imane, ”Yaʼe Zeba faoma Salamuna. Me luo daʼö mangoʼaya ami, ’Hadia no tebeʼe ba dangau Zeba faoma Salamuna irege mabeʼe roti khö ndra saradadumö si no marase andrö?’”+
16 Iraʼu ndra satua mbanua andrö, aefa daʼö ibeʼe wamahaʼö ba niha mbanua Zukhota sanandrösa ba zinanö sodoi ba eu sodoi si tumbu ba danö si mate.+
17 Idudugö göi malige Wenueli+ ba ibunu niha mbanua daʼö fefu.
18 Manofu ia khö Zeba faoma Salamuna, ”Hewisa mboto niha nibunumi ba Dabora?” Latema linia, ”Simane yaʼugö. Hulö nono razo ba wamaigima.”
19 Imane Gideono, ”Yaʼira andrö talifusögu, ono ninagu. Faya wa no sauri Yehowa, na lö menaʼö mibunu ira ba lö göi ubunu ami.”
20 Aefa daʼö, imane khö nononia siaʼa sotöi Yeteri, ”Bunu ira.” Hizaʼi, lö isöbi wödania ono daʼö. Ataʼu ia börö me iraono nasa ia.
21 Lamane khönia ira Seba faoma Salamuna, ”Yaʼugö manö zamunu yaʼaga, ba daʼö oroma waʼabölö nono matua.” Börö daʼö, ibunu Zeba faoma Salamuna+ andrö Gideono ba ihalö gama-gama si hulö mbaŵa ba mbagi gondra khöra.
22 Lamane iraono Gizaraʼeli khö Gideono, ”Omasiga na yaʼugö, onomö hegöi maʼuwumö zi tobali sondröniaʼö yaʼaga börö me no öʼefaʼö ndraʼaga ba danga niha Midiano.”+
23 Hizaʼi imane khöra Gideono, ”Yaʼo hegöi onogu, lö omasiga tobali sondröniaʼö yaʼami. Yehowa zondröniaʼö yaʼami.”+
24 Imane nasa Gideono, ”Uʼandrö khömi ero samösa enaʼö mibeʼe khögu sambua gati-ati si no mirabu nifasa ba nikhu.” Börö me ngaʼötö niha Zimaʼeli nudura, andrö wa so khöra gati-ati anaʼa nifasa ba nikhu.+
25 Lamane, ”Hasambalö mabeʼe khöu.” Aefa daʼö, labologö sambua mbaru sebua ba labeʼe ero samösa gati-ati si no larabu nifasa ba nikhu.
26 Faʼabua gati-ati anaʼa niʼandrönia töra 19 kilogram,* baero nasa gama-gama si hulö mbaŵa, aya, baru sebua si ungu laʼa-laʼa* nifake ndra razo niha Midiano, ba aya ba mbagi gondra khöra.+
27 Ifazökhi daʼö Gideono tobali nukha gere*+ ba iforomaʼö ba mbanuania, ba Gofera.+ Aefa daʼö, ibörögö lafosumange nukha gere andrö iraono Gizaraʼeli maʼafefu+ ba tobali tandrawa daʼa khö Gideono hegöi ba nösi nomonia.+
28 Simane daʼö waʼakala niha Midiano+ föna ndraono Gizaraʼeli, ba ataʼu niha Midiano wolawa soi daʼö.* Lasöndra waʼohahau dödö soi daʼö ba zi 40 fakhe waʼara ba götö Gideono.+
29 Mangawuli ba nomo Yerubi-mbaʼali+ ono Yoasi ba toröi manö ia ba daʼö.
30 So 70 nono matua khö Gideono börö me ato woʼomonia.
31 Tumbu göi khönia nono matua nifotöinia Abimelekhi,+ moroi khö woʼomonia ba döi si so ba Zikhema.
32 Alawa ndröfi Gideono ono Yoasi me mate ia, ba lakoʼo ia ba lewatö namania Yoasi, ba Gofera banua niha Gabiezeri.+
33 Me no mate Gideono, lafuli zui lafosumange* Mbaʼali+ iraono Gizaraʼeli ba labaliʼö lowalangira Mbaʼali-mberiti.+
34 Olifu ira Yehowa Lowalangira+ si no mangeheta yaʼira moroi ba danga nudu ba zi fasuira.+
35 Faröi ira* göi ba nösi nomo Yerubi-mbaʼali, yaʼia daʼö Gideono, ba lö lasulöni zi sökhi nifaluania ba ndraono Gizaraʼeli.+
Nisura ba gahe zura
^ Mazui ”sobowo doru”.
^ Mazui ”efod”. Daʼa mbaru sebua si so tanö föna ba tanö furi.
^ Sin.: ”tebai lafaöga mbawara”.
^ Mazui ”lafalua wohorö ba wamati khö”.
^ Mazui ”Lö laforomaʼö waʼomasi si lö faröi”.
