Khö Dito 1:1-16
1 Moroi khö Waulo, sawuyu Lowalangi ba sinenge Yesu Keriso, moloʼö famati niha nifili Lowalangi hegöi faʼaboto ba dödö si tefaudu sanandrösa ba zindruhu, ba wamosumange Lowalangi soroi ba dödö,
2 ba teʼodane-dane ba wanötöna faʼauri si lö aetu+ si no ifabuʼu iʼotarai mböröta, börö me Lowalangi si tebai falimo ia,+
3 ba no iʼombakhaʼö daromalinia ba ginötö si no itatugöi, börö halöwö fanuriaigö nibeʼenia khögu,+ simane niwaʼö Lowalangi Sangorifi yaʼita.
4 Sura daʼö khö Dito, awögu si sara lala wamati si no amaedola nonogu.
Yaʼötema waʼasökhi dödö sebua* ba faʼohahau dödö moroi khö Namada Lowalangi, ba moroi khö Keriso Yesu Sangorifi yaʼita.
5 Uröi ndraʼugö ba Hulo Gereta enaʼö öʼatulöʼö nasa zinangea muʼadölöʼö ba öfataro ndra satua sokubaloi ero sambua banua moloʼö niwaʼögu andre:
6 Enaʼö lö mosinegu zatua sokubaloi, ha samösa woʼomonia ira alawe, mamati fefu ndraononia, laʼoʼö li zatuara ba lö hadöi si lö sökhi niböbögö khöra.+
7 Sohalöwö nifataro Lowalangi andrö tobali sondröniaʼö enaʼö si lö sinegu, lö ifalua manö zomasi dödönia,+ lö alio mofönu,+ lö mabu, lö faʼudu, lö iʼalui hare ba walimosa börö wakhögusa,
8 hizaʼi oböwö,*+ sangomasiʼö si sökhi, si so fangera-ngera si sökhi,+ somasi mamalua satulö, lö faröi,+ ba so khönia wanaha tödö,+
9 lö faröi ia ba daromali si tola mufaduhusi tödö ba ginötö mamahaʼö ia,+ irege tola ifarou dödö*+ niha ba wamahaʼö satulö ba tola itegu+ niha samadaö famahaʼö andrö.
10 Ato nasa zolawa, si fawea-wea manö, si falimo ba so ösa ba gotaluara zi fatandro ba wosuna niha.+
11 Lö tola löʼö muduhö mbawara, börö me lafawukaisi zi no mongambatö ba lafahaʼö zi tenga sinangea famahaʼö enaʼö lasöndra hare si lö atulö.
12 Samösa moroi ba gotaluara yaʼia daʼö samaʼeleʼö si otarai khöra imane, ”Si falimo niha Gereta andrö, urifö samuʼi, ha femanga ba femörö halöwöra.”
13 Sindruhu wamaduhuʼö andrö. Börö daʼö abeʼeʼö wangotuʼö yaʼira enaʼö aro wamatira,
14 lö lafondrondrongo hikaya niha Yahudi mazui oroisa niha sangerogö sindruhu.
15 Fefu hadia ia, sökhi ba niha si lö raʼiö,+ ba niha si lö sökhi ba si lö mamati, lö hadöi si sökhi börö me lö sökhi wangera-ngera hegöi tödöra side-ide.+
16 Lafaduhuʼö föna niha sato wa aboto ba dödöra Lowalangi, hizaʼi amuatara+ zangoromaʼö wa latimbagö ia, börö me sogoro ita nifaluara, lö moloʼö ba tenga sinangea mamalua halöwö si sökhi.
Nisura ba gahe zura
^ Faigi Geluaha Ngawua Wehede.
^ Mazui ”somasi manemaʼö tome”.
^ Mazui ”tola iʼamenesi”.
