Sura Yakobo 1:1-27
1 Moroi khö Yakobo,+ sawuyu Lowalangi hegöi Soʼaya yaʼita Yesu Keriso, nifaʼema ba zi 12 mado si no muzawili.
Yaʼahowu!
2 Yaʼami ira talifusö, miʼomusoiʼö dödömi na göna ami ngawalö wanandraigö,+
3 simane si no miʼila, na no tetandraigö wamatimi, lua-luania so khömi waʼanau gölö.+
4 Yalötebulö miforomaʼö waʼanau gölö irugi gamozua, enaʼö moʼahonoa ami, lö mosinegu, ba lö moʼamböta gofu hadia ia.+
5 Na so zambö faʼatua-tua, böi miböhöli wangandrö khö Lowalangi,+ ba hasambalö mitema,+ börö me fahöna wameʼe Lowalangi ba lö iʼailasi niha.+
6 Böi miböhöli wangandrö si fao famati+ ba böi aombö dödömi,+ börö me niha saombö tödö hulö ndrulu nasi nifadaulu-daulu nangi misa.
7 Niha simane daʼö, lö hadöi sinangea itötöna moroi khö Yehowa.*
8 Sangiwa tödö ia,+ si lö tatu fangera-ngera.
9 Yaʼami ira talifusö si numana, miʼomusoiʼö dödömi börö me tebeʼe khömi dadaoma salawa.+
10 Yaʼami si kayo, miʼomusoiʼö dödömi ba dadaoma wondrege zide-ide.+ Amaedola mbunga ba mbenua, si taya ba saleu aefa daʼö mate.
11 Simane sinanö saleu börö waʼaukhu zino ba atoru mbowonia irege taya waʼasökhinia, simane daʼö göi niha si kayo, tekiko ia gasa-gasa wolohi faʼakayo andrö.+
12 Yaʼahowu niha sanau ölö ba wanaögö fanandraigö.+ Na no aefa itaögö wanandraigö andrö, itema dakula faʼauri+ nifabuʼu Yehowa* ba niha sangomasiʼö yaʼia.+
13 Na so zi göna fanandraigö, böi yamuwaʼö, ”No itandraigö ndraʼo Lowalangi,” börö me tebai tetandraigö Lowalangi ba lö göi itandraigö niha ba zi lö sökhi.
14 Hizaʼi, dozi niha tetandraigö na tedönisi ba teböbö ia* ba gisö-isö dödönia samösa.+
15 Aefa daʼö, na no abölö wangisönia andrö, ifalua horö, ba na no ifalua horö, lua-luania faʼamate.+
16 Yaʼami ira talifusö niʼomasiʼö, böi telimo ami.
17 Fefu mbuala si sökhi ba soʼahonoa tohare daʼö moroi yawa,+ moroi khö Nama umbu haga andrö,+ si lö tebulö. Tenga simane lumö-lumö si todege-dege.+
18 Börö gohitö dödönia, iʼorifi ita faoma taromali sindruhu+ enaʼö yaʼita zi oföna tefili moroi ba gotalua nifazökhinia maʼafefu.+
19 Yaʼami ira talifusö niʼomasiʼö, yaʼaboto ba dödömi daʼa: Dozi niha yamuʼalioʼö wamondrongo, böi yamufahulö wehede,+ ba böi alio mofönu,+
20 börö me fönu niha andrö, lö iʼasogö waʼatulö ba wamaigi Lowalangi.+
21 Börö daʼö, miböhöli ngawalö waʼaraʼiö hegöi faʼalösökhi.+ Mitemaʼö si fao fangide-ngideʼö daromali nitanö ba dödömi si möi fangorifimi* andrö.
22 Mifalua daromali,+ tenga ha asala mifondrondrongo manö. Böi milimo ami fangera-ngerami si fasala.
23 Na so zamondrongo taromali andrö ba na lö ifalua,+ fagölö ira simane niha samaigi yaʼia ba zörömi.
24 Na no ifaigi ia, aefa daʼö ilau mofanö ba olifu ia hewisa zikhalania saʼae.
25 Niha sangosisiʼö oroisa soʼahonoa+ soʼamakhaita ba wangefa ba si lö mamöhöli wamalua yaʼia, no niha samalua taromali, tenga ha samondrongo aefa daʼö iʼolifugö. Omuso dödönia börö me ifalua.+
26 Na so zangumaʼö tödönia samosumange Lowalangi ia,* ba na lö itaha* lelania,+ no ilimo ia ba zaya-zaya gölö wamosumangenia Lowalangi.
27 Daʼa wamosumange* sohau-hau ba si lö raʼiö moloʼö famaigi Lowalangi, Amada: tatolo zi lö ama si lö ina+ ba lakha mbanua+ si göna abula dödö,+ ba tafaigi enaʼö lö raʼiö ita börö niha gulidanö.+
Nisura ba gahe zura
^ Mazui ”tofesu ba lakhö”.
^ Mazui ”fangorifi nosomi”.
^ Mazui ”si lö faröi ba agama”.
^ Mazui ”ifatörö”.
^ Mazui ”Daʼa agama”.
