Sura Yakobo 4:1-17
4 Hadia mbörö wa faʼudu ba fakara ami? Hadia tenga börö gisö-isö dödömi sanao horö si fasuwö ba mbotomi?+
2 Daʼö mbörö wa lö miʼokhögö zomasi dödömi. Mibunu niha ba miʼisö gokhöta niha böʼö, hizaʼi lö misöndra. Lö miböhöli fasöndra ba fasuwö.+ Lö mitema börö me lö niʼandrömi.
3 Me miʼandrö ba lö mitema börö me lö sökhi niʼera-erami, yaʼia daʼö miʼogunaʼö ba gisö-isö mbotomi sanao horö.
4 Yaʼami sohorö,* hadia lö aboto ba dödömi wa si fahuwu ba gulidanö eluahania si faʼudu khö Lowalangi? Tobali, haniha zi fahuwu ba gulidanö sindruhunia no ibaliʼö ia si faʼudu khö Lowalangi.+
5 Hadia mimane tödömi lö eluaha niwaʼö ba ayati daʼa, ”Börö waʼafökhö dödöda andrö wa taʼisö zoya ngawalö”?+
6 Hizaʼi, noa sa abölö tohude waʼasökhi dödö sebua* nibeʼenia moroi ba wangisö andrö. So ba zura, ”Itimbagö zi fayawa Lowalangi,+ ba iforomaʼö waʼasökhi dödönia sebua* ba niha sangide-ngideʼö.”+
7 Miʼangalulu khö Lowalangi,+ milawa Gafökha+ ba iröi ami.+
8 Miʼondrasi Lowalangi ba iʼondrasi ami.+ Mihaogö dödömi moroi ba zi lö sökhi yaʼami sebua horö,+ miʼohau-hauʼö dödömi yaʼami sangiwa tödö.+
9 Miʼabusi tödö, miʼangenu-ngenu, ba miʼeʼe.+ Mifalalini waʼikimi faoma feʼe, ba faʼomuso dödömi faoma faʼabu dödö.
10 Miʼide-ideʼö ami föna Yehowa*+ ba iʼalawaʼö ami.+
11 Yaʼami ira talifusö, böi faoma miʼoʼaya nawömi.+ Na so zangoʼaya mazui sanguhuku talifusönia, no iʼoʼaya ba no ihuku goroisa. Na mihuku goroisa, lö niʼoʼömi oroisa, hizaʼi no mibaliʼö ami sanguhuku yaʼia.
12 Ha samösa Zameʼe Oroisa ba Sanguhuku,+ yaʼia daʼö Lowalangi si tola mangohori ba mangorifi niha.+ Hizaʼi, haniha ami andrö wa mihuku nawömi?+
13 Mifondrondrongo, so ba gotaluami zangumaʼö, ”Maʼökhö mazui mahemolu möiga ba mbanua sebua andrö ba toröiga ba daʼö döfi waʼara. Malau mogale ba masöndra hare,”+
14 hizaʼi lö miʼila hewisa waʼaurimi mahemolu.+ Yaʼami andrö amaedola zau si tohare sabata aefa daʼö taya.+
15 Si sökhinia mimane wangumaʼö, ”Na itehegö Yehowa,*+ tola auri ndraʼaga ba mafalua daʼa mazui daʼö.”
16 Hizaʼi, omuso dödömi ba wayawasami andrö. Lö sökhi wayawasa simane daʼö.
17 Na so zangila mamalua si sökhi, ba tobali horö khönia na lö ifalua.+
Nisura ba gahe zura
^ Mazui ”niha si faröi”.
^ Faigi Geluaha Ngawua Wehede.
^ Faigi Geluaha Ngawua Wehede.
