Sura Yakobo 5:1-20
5 Yaʼami niha si kayo, mifondrondrongo niwaʼögu. Miʼeʼe ba miʼangenu-ngenu ba wamakao si göna yaʼami.+
2 No obou haratomi, ba no iʼa hama nukhami.+
3 No mohowu ganaʼami hegöi firömi, ba howu andrö zamaduhuʼö wa fasala ami ba tobali si manga dölami. Hadia zi no miʼiröʼö tobali alitö ba ngaluo safuria.+
4 Mifondrondrongo! Lö tebato muʼao luo zohalöwö ba nowi khömi börö me mitaha gazira, ba no ofeta ba dalinga Yehowa* samatörö saradadu zorugo.+
5 Miʼomuso-musoiʼö dödömi ba migohi gisö-isö dödö ba gulidanö andre. Miʼataböʼö ami ba ngaluo wanaba.+
6 Miʼoʼaya ba mibunu niha satulö. Hadia tenga daʼö mbörö wa lalawa ami?
7 Yaʼami ira talifusö, mibologö dödömi irege tohare Zoʼaya.+ Mifaigi atö zohalöwö ba danö, labaloi mbua si sökhi moroi ba danö ba labologö dödöra irege tohare deu siföföna ba teu safuria.+
8 Simanö göi ami, mibologö dödömi.+ Miʼaroʼö dödömi, börö me lö ara tö tohare Zoʼaya.+
9 Yaʼami ira talifusö, böi mukökö-kökö ami khö nawömi enaʼö lö tehuku ami.+ Hiza, no mosindro ba mbawandruhö Zanguhuku.
10 Yaʼami ira talifusö, miʼoʼö duma-duma ndra samaʼeleʼö si fahuhuo ba döi Yehowa,*+ sanaögö famakao+ ba sebolo tödö.+
11 Tafotöi niha sanau ölö andrö sohau-hau tödö.*+ No mirongo waʼanau gölö Yobi+ ba miʼila hewisa wamahowuʼö Yehowa* yaʼia,+ irege aboto ba dödömi wa safönu faʼomasi Yehowa* ba sahakhö tödö.+
12 Sabölö moguna yaʼami ira talifusögu, böi miʼae ba hölu börö zorugo, hegöi ulidanö, mazui gofu hadia ia. Na mohede ami ”Yaʼia” na yaʼia, ”Tenga” na tenga,+ enaʼö lö tehuku ami.
13 Hadia so ba gotaluami zi göna abula dödö? Böi yaʼiböhöli wangandrö.+ Hadia so zomuso tödö? Böi yaʼiböhöli wanunö.+
14 Hadia so zofökhö ba gotaluami? Yaʼiʼalui ndra satua sokubaloi+ ba mbanua niha Keriso, enaʼö mangandrö ira salahinia ba labayoini ia faoma fanikha+ ba döi Yehowa.*
15 Fangandrö nifaʼema si fao famati, daʼö zamadöhö sofökhö* andrö ba Yehowa* zangabölöʼö famatinia. Aefa daʼö, na no ifalua horö, ba tola teʼefaʼö khönia.
16 Andrö, faoma miʼombakhaʼö zalami+ khö nawömi ba faoma miʼangandrö salahi nawömi enaʼö tefadöhö ami. Mofaʼabölö wangandrö niha satulö.+
17 Elia andrö niha simane yaʼita, hizaʼi me mangandrö ia soroi ba dödö enaʼö lö moteu, ba lö alua deu ba mbanua andrö tölu fakhe a matonga.+
18 Ifuli mangandrö ia ba alua deu moroi ba mbanua si yawa ba mowua zinanö ba gulidanö.+
19 Yaʼami ira talifusögu, na so ba gotaluami zi no elungu moroi ba zindruhu ba tanö böʼö zanolo yaʼia wangawuli,
20 yaʼaboto ba dödömi niha sanolo yaʼia andrö+ zangefaʼö yaʼia* moroi ba waʼamate, ba teʼefaʼö horönia soya.+
