Yeremia 10:1-25
10 He yaʼami iraono Gizaraʼeli, mifondrondrongo niwaʼö Yehowa.
2 Daʼa niwaʼö Yehowa:
”Böi mifomaha ami ba gamuata niha baero,+Ba böi miʼataʼufi dandra-tandra salua ba dalu mbanuaHewaʼae laʼataʼufi daʼö soi böʼö.+
3 Zaya-zaya gölö gamuatara andrö.
Hulö geu niʼobö zi fatuka ba gatuaBa ifazökhi daʼö tobali adu.+
4 Labeʼe wirö hegöi anaʼa ba wonönö faʼasökhinia,+Lataruʼö tou ba danö faoma fanoko ba laʼosö enaʼö lö aekhu tou.+
5 Simane famaedo niha si so ba kabu laʼizu, lö laʼila fahuhuo.+
Moguna mufazawa ira börö me lö laʼila mofanö.+
Böi miʼataʼufi ira börö me tebai lafaʼala nihaBa tebai lafalua zi sökhi.”+
6 He Yehowa, lö hadöi simane yaʼugö.+
Sindruhu wa yaʼugö wondrege zebua, ba tefolakhömi döimö safönu faʼabölö.
7 He yaʼugö Razo ba ngawalö soi,+ sinangea na laʼataʼufi ndraʼugö,Ba gotalua niha satua-tua ba soi böʼö awö ba zi sagörö famatöröra,Lö hadöi simane yaʼugö.+
8 Oi si bodo ira ba si lö fangera-ngera.+
Sindruhu wa zaya-zaya gölö mene-mene moroi ba zi sara töla geu.+
9 Laʼöli ngaʼörö-ngaʼörö wirö moroi ba Darisi,+ ba anaʼa moroi ba Gufa,Nihaogö zi samösa tuka hegöi samöbözi logaMoroi ba mbana sobalau nukhara ba si ungu laʼa-laʼa.
Tuka sonekhe zamazökhi yaʼira.
10 Hizaʼi, Yehowa andrö sindruhu-ndruhu Lowalangi.
Yaʼia Lowalangi sauri+ ba Razo irugi zi lö aetu.+
Modögö gulidanö börö wönunia,+Ba lö hadöi soi si tola manaögö fanguhukunia.
11 * Ömane khöra,
”Tehori dania lowalangi si lö mamazökhi banua si yawa hegöi tanö,Muhori ira moroi ba gulidanö hegöi barö mbanua si yawa.”+
12 Yaʼia andrö Samazökhi ulidanö ba waʼabölönia,Sangaʼasogö tanö satabö sinanö ba waʼatua-tuania,+Ba samologö banua si yawa ba waʼaboto ba dödönia.+
13 Me ifarongogö linia,Modulu nidanö si so ba mbanua si yawa,+Ba iʼohe miyawa lawuo* moroi ba wondrege danö.+
Ifatenge gari mbanua fabaya teu,*Ba ibeʼe baero nangi moroi ba nahia wangiröʼö khönia.+
14 Dozi niha lafalua gamuata si lö ikhamö fangera-ngerada ba lö faʼaboto ba dödöra.
Teʼailasi dania dozi niha samöbözi loga börö nadu nifoe andrö,+Börö me no falimosa nadu nifazökhira moroi ba loga,*Lö mohanu-hanu ira.+
15 Zaya-zaya gölö halöwö dangania andrö ba sinangea muʼoʼaya.+
Tehori ira dania ba ngaluo wanguhuku.
16 Hizaʼi, tenga simane daʼö Lowalangi Yakobo.
Börö me yaʼia zamazökhi fefu hadia ia,Ba okhötania sebua böli ndraono Gizaraʼeli.+
Töinia yaʼia daʼö Yehowa samatörö saradadu zorugo.+
17 He yaʼami ira alawe si toröi ba nahia si no mufaʼuʼu,Owuloi gama-gamamö si so tou ba danö.
18 Daʼa niwaʼö Yehowa:
”Iadaʼa, ufazaumba baero nono mbanua soi daʼa,+Ba uʼalui lala wamakao yaʼira.”
19 Alai ndraʼo börö waʼatekiko salua khögu!+
Tebai mufadöhö zokhogu.
Umane, ”Daʼa wökhögu, ba hasambalö utaögö ia.
20 No mududugö nosegu ba no muʼetuʼö fefu zinalinia.+
No laröi ndraʼo iraonogu; lö yaʼira saʼae.+
Lö hadöi saʼae sangehaogö osegu mazui samologö nukha nose.
21 Börö me sambö tödö ndra kubalo andrö,+Ba lö laʼandrö wanuturu lala moroi khö Yehowa.+
Andrö wa lö lafalua hadia ia si fao faʼaboto ba dödö,Ba oi muzawili fefu guriföra.”+
22 Mifondrondrongo! So gangombakhata!
So zi kaliru ba mbanua tanö yöu,+Tohare ndra saradadunia ba wanudugö Yehuda ba labaliʼö tanö si lö niha-niha irege tobali naha nasu gatua.+
23 He Yehowa, aboto ba dödögu wa lö faʼabölö ba niha gulidanö ba wotatugöi lala waʼaurinia.
Lö faʼabölö ba niha ba wotatugöi bekania.+
24 He Yehowa, amenesi ndraʼo si fao faʼatulö,Hizaʼi böi ofönu,+ enaʼö lö tehori ndraʼo.+
25 Falua wönumö ba ngawalö soi si no mangerogö yaʼugö,+Hegöi ba ngawalö mado si lö moʼangaröfili töimö.
Börö me no lafakiko Yakobo.+
No lafakiko irege lö hadöi saʼae,+Ba no ladudugö mbanuania.+
Nisura ba gahe zura
^ Ayati 11 si oföna sibai tesura ba li Garamo.
^ Mazui te ”Ifazökhi mbawandruhö lala deu”.
^ Mazui ”zau”.
^ Mazui ”nadu nifahele andrö khönia”.