Yeremia 11:1-23
11 Daʼa niwaʼö Yehowa khö Yeremia:
2 ”Dozi niha mifondrondrongo wehede si so ba mbuʼusa li daʼa!
”Faʼema daʼa* ba niha Yehuda hegöi ba nono mbanua Yeruzalema.
3 Ömane, ’Daʼa niwaʼö Yehowa Lowalangi ndraono Gizaraʼeli, ”Teʼelifi niha si lö moloʼö fehede si so ba mbuʼusa li andre.+
4 No uwaʼö daʼö khö ndra tuami me uheta ira ba danö Miserai,+ moroi ba naha wanunu siʼöli.+ Imane ba wawuʼusa li andrö, ’Miʼoʼö fefu goroisagu ba mifalua niʼandrögu khömi. Ba tobali dania ami ono mbanuagu ba Lowalangimi ndraʼo.+
5 Ufalua zi no ufabuʼu khö ndra tuami ba wameʼe khöra tanö si fahöna susu ba wewani.’+ Ba toröi ami ba mbanua daʼö iadaʼa.”’”
Aefa daʼö umane, ”Yaduhu,* Yehowa.”
6 Itohugö nasa Yehowa wangumaʼö khögu, ”Ombakhaʼö wehede daʼa ba mbanua Yehuda awö ba lala Yeruzalema, ’Mifondrondrongo wehede si so ba mbuʼusa li daʼa, ba mifalua.
7 Börö me no uforege wamangelama ira tuami me uheta ira ba danö Miserai. Irugi maʼökhö, lö aetu* ufangelama ira, ”Miʼoʼö wehedegu.”+
8 Hizaʼi, lö lafondrondrongo mazui laʼameʼegö tödö.* Abeʼe högöra ba laʼoʼö niwaʼö dödöra si lö sökhi.+ Andrö wa uhuku ira moloʼö si no tesura ba mbuʼusa li si no uwaʼö khöra enaʼö laʼoʼö, hizaʼi lö omasi ira.’”
9 Aefa daʼö imane khögu Yehowa, ”No hasara dödö niha Yehuda hegöi Yeruzalema ba wolawa yaʼo.
10 Lafuli lafalua horö nifalua ndra tuara me föna ba lö laʼoʼö daromaligu.+ Laʼoʼö ba lafosumange lowalangi böʼö.+ No lasawö iraono Gizaraʼeli hegöi niha Yehuda mbuʼusa ligu nibeʼegu khö ndra tuara.+
11 Börö daʼö imane Yehowa, ’Ufatörö khöra wamakao+ si tebai latimbagö. Lö ufondrondrongo na muʼao ira khögu ba wangandrö fanolo.+
12 Möi niha Yehuda awö Yeruzalema ba wangandrö fanolo khö lowalangira. Latunu zumange ba daʼö irege numalö miyawa zimbo.+ Hizaʼi, lö iʼorifi ira lowalangira andrö me göna ira famakao.
13 He Yehuda, simane faʼoya mbanuamö simane daʼö göi waʼoya lowalangimö. Simane faʼoya lala ba Yeruzalema, simanö göi waʼoya naha wanunu sumange si no öfazökhi khö lowalangi si möi fangaila andrö, yaʼia daʼö naha wanunu sumange khö Mbaʼali.’+
14 ”Ba yaʼugö,* böi angandrö salahi nono mbanua daʼa. Böi angaröfili döigu ba böi angandrö salahira,+ börö me lö ufondrondrongo weʼaora khögu na göna ira famakao.
15 Hadia sinangea toröi ba nomogu nono mbanua nihakhösigu tödö,Hewaʼae oya zamalua tandrawa si lö sökhi?
Ba ginötö göna khöu* wamakao, hadia tola latimbagö daʼö na labeʼe zumange,Irege ösöndra* waʼowua-wua dödö aefa daʼö?
16 No irai ifotöi ndraʼugö Yehowa eu zaitu satabö,Satabö ba si fahöna bua si sökhi.
Hizaʼi si fao feʼugu-ugu, itunu geu andrö,Ba ifatö ndrahania.
17 ”Yehowa samatörö saradadu zorugo zananö yaʼugö+ ba no iwaʼö wa göna khöu wamakao, börö waʼalösökhi ndraono Gizaraʼeli hegöi niha Yehuda. Labeʼe zumange khö Mbaʼali ba wangafökhöiʼö tödögu.”+
18 Ifatunö khögu Yehowa enaʼö uʼila.
He Lowalangi, me luo daʼö no öforomaʼö khögu gamuatara.
19 Hulö nono mbiri-biri soloʼö-loʼö manö ndraʼodo, niʼohe ba naha wanaba.
Lö uʼila wa no laʼera-era zi lö sökhi khögu, ba lamane,+
”Aine, datafakiko geu daʼö awö mbuania.
Databunu ia,Enaʼö lö saʼae itörö tödö niha döinia.”
20 Hizaʼi, ifatörö huku satulö Yehowa samatörö saradadu zorugo.
Ifareso nösi dödö niha hegöi era-erania si tobini.*+
He Lowalangi, foromaʼö khögu wolau balö nifaluamö khöra,Börö me no utouʼö ba dangau gamadöniwa salua khögu.
21 Börö daʼö, mohede Yehowa ba niha Ganatoti+ sedöna mamunu yaʼo, sangumaʼö khögu, ”Böi mamaʼeleʼö ndraʼugö ba döi Yehowa.+ Na öfalua daʼö hasambalö mabunuʼö.”
22 Daʼa niwaʼö Yehowa samatörö saradadu zorugo: ”Hasambalö uhuku ira. Mate dania ndraono matua si bohou ebua ba mbawa wöda.+ Mate nonora matua si gide-ide hegöi onora alawe börö waʼolofo.+
23 Samösa lö si toröi, börö me ufalua wamakao ba niha Ganatoti+ ba ndröfi wanguhukugu yaʼira.”
Nisura ba gahe zura
^ Hulö fareta nibeʼe khö Yeremia.
^ Mazui ”Yasimanö zalua”.
^ Sin.: ”maosodo sihulö wongi ba”.
^ Sin.: ”labeʼe mbörö dalingara”.
^ Eluahania Yeremia.
^ Eluahania Yehuda.
^ Eluahania Yehuda.
^ Sin.: ”bua”.
