Yeremia 15:1-21
15 Aefa daʼö imane khögu Yehowa, ”Hewaʼae mozizio fönagu Moze simanö göi Zamueli,+ ba lö uhakhösi tödö soi daʼa. Heta ira ba duduma hörögu. Akha mofanö ira.
2 Na manofu ira khöu, ’Hadia zalua khöma?’ Ömane, ’Daʼa niwaʼö Yehowa:
”So ösa zi mate börö wökhö si möi famunu!
So göi zi mate ba mbawa wöda!+
Tanö böʼönia si mate ba waʼolofo!
So ösa göi niʼoloiʼö!”’+
3 ”’So öfa ngawalö wamakao* si no uhonogöi khöra,’+ iwaʼö Yehowa, ’Föda ba wamunu, asu sondröni, fofo ba dalu mbanua, ba urifö sagamuʼi ba mbenua si manga ba sangohori.+
4 Ubaliʼö ira si hokha mbu ndra samatörö ba gulidanö,+ börö gamuata Manase ono Hizikia razo Yehuda ba Yeruzalema.+
5 Haniha zahakhö tödö khöu Yeruzalema?
Haniha zoʼameʼegö tödö yaʼugö?
Haniha zi tebato ba wanofu turiamö?’
6 ’No öröi ndraʼo,’ iwaʼö Yehowa.+
’Lö öböhöli wangerogö yaʼo ba no aröu ndraʼugö khögu.*+
Andrö wa ufazawa dangagu ba ufakiko ndraʼugö.+
Afölido saʼae ba wohakhösi tödö yaʼugö.*
7 Utafiʼö ira* ba mbawandruhö soi daʼa simane na mutafi mbua nowi.
Uʼoloiʼö ndraonora.+
Uhori nono mbanuagu,Börö me lö omasi ira labulöʼö lalara.+
8 Uʼoyaʼö lakha mbanua khöra töra simane faʼoya gawu ba nasi.
Uʼasogö khöra wanudugö ba zi maʼökhö, khö ndra ina hegöi ba ndraono matua si bohou ebua.
Ba zi lö mudöna-döna, uʼasogö khöra waʼakaliru ba faʼataʼu.
9 Tebai ndra alawe si fitu ono;Ambö mbadunia.
Aekhu luo ba zi talu maʼökhö ba wamaiginia,Irege aila ia ba laʼoʼaya.’*
ʼLö ato niha si toröi ba gotaluara,Ululu ira ba mbawa wöda nudu,’ iwaʼö Yehowa.”+
10 He inagu, alai ndraʼo me no öʼadonogö ndraʼo,+Tobali ndraʼo niha si fakara-kara ba si faʼudu-udu ba soi misa.
Lö ubeʼe nifiza ba lö göi labeʼe nifizagu,Hizaʼi, laʼelifi ndraʼo.
11 Imane Yehowa, ”Hasambalö utolo ndraʼugö.
Möi ndraʼo ba wanolo yaʼugö ba ginötö waʼatosasa,Ba ginötö tosasa ndraʼugö na tohare nudu.
12 Hadia so zi tola manudugö siʼöli moroi yöuMazui sanudugö tembaga?
13 Utehegö larabu haratomi hegöi faʼakayomi,+Tenga ba wangalui kefe, hizaʼi börö horö ba zi fasui yaʼami.
14 Ubeʼe daʼö fefu ba nudumi,Enaʼö laʼohe ba soi si lö miʼila.+
Börö me no mohola wönugu,Ba mohola ia ba khömi.”+
15 He Yehowa, öʼila hadia zalua khögu.
Törö tödöu ndraʼo ba ameʼegö tödö ndraʼo.
Yaʼugö zanulöni ba niha samakao yaʼo.+
Böi mate* ndraʼo börö me talafo ahakhö dödöu ira.
Törö tödöu wa utaögö wangoʼaya andre börö ndraʼugö.+
16 Me utema daromalimö, utanögö ia bakha ba dödögu.*+
Taromalimö andrö zameʼe khögu faʼomuso dödö.
Börö me no uʼotöigö döimö Yehowa Lowalangi samatörö saradadu zorugo.
17 Lö modadao ndraʼo ba lö faodo ba gotalua niha somasi faʼomuso-muso dödö.+
Börö wanuturu lala si otarai ndraʼugö, andrö wa modadao ndraʼo ha yaʼo.
Börö me urasoi göi wönu nirasoimö.*+
18 Hana wa lö tebato waʼafökhö andrö ba tebai mufadöhö zokhogu?
Lö omasi ia döhö.
Hadia tobali ndraʼugö umbu nidanö si lö idanö,Si tebai mufaduhusi tödö?
19 Börö daʼö, daʼa niwaʼö Yehowa:
”Na öfuliʼö khögu, ba hasambalö utema ndraʼugö,Ba lö mamalö öfosumange ndraʼo.*
Na öfasafi zabölö ebua böli moroi ba zi lö böli,Tobali ndraʼugö simane bawagu samösa.*
Tohare ira khöu;Lö moguna möiʼö khöra.”
20 ”Ubaliʼö ndraʼugö simane towa saro moroi ba tembaga ba gotalua soi daʼa.+
Hasambalö lalawa ndraʼugö,Hizaʼi tebai lakalaisi,+Börö me fao ndraʼo khöu, ba wangorifi yaʼugö hegöi ba wangefaʼö,” iwaʼö Yehowa.
21 ”Hasambalö uʼefaʼö ndraʼugö moroi ba danga niha si lö sökhi,Ba uhöli ndraʼugö moroi ba danga niha safaito.”
Nisura ba gahe zura
^ Mazui te ”öfa ngawalö wanguhuku”. Sin.: ”daöfa fongambatö”.
^ Mazui te ”lö aetu öwuwu ndraʼugö furi”.
^ Mazui ”Aföli saʼae ndraʼo ba waniasa”.
^ Eluahania mufasafi gandru moroi ba gulinia.
^ Mazui te ”no aila ba alawö-lawö”.
^ Sin.: ”Böi halö”.
^ Sin.: ”Musöndra daromalimö, ba uʼa ia”.
^ Mazui ”Börö me öbeʼe khögu duria wanguhuku”.
^ Sin.: ”mozizioʼö fönagu”.
^ Mazui ”salahigu ba wahuhuosa”.
