Yeremia 18:1-23
18 Daʼa niwaʼö Yehowa khö Yeremia:
2 ”Ofanö ba aeʼe ba nomo zamöbözi tambu laʼuri.+ Ba daʼö fahuhuo ndraʼo khöu.”
3 Andrö wa möido ba nomo zamöbözi tambu laʼuri, ba mohalö-halöwö ia fönagu, iʼogunaʼö wakake ba wamöbözi tambu laʼuri.
4 Hizaʼi, lö tefaudu ba zomasi ia dambu laʼuri niböbözinia. Andrö wa ifuli iböbözi enaʼö tobali naha tanö böʼö moloʼö somasi dödönia.
5 Aefa daʼö imane khögu Yehowa,
6 ”’He yaʼami iraono Gizaraʼeli, hadia tebai ufalua zimane nifalua zamöbözi tambu laʼuri andrö?’ iwaʼö Yehowa. ’Simane laʼuri ba danga zamöbözi tambu laʼuri, simane daʼö göi ami ba dangagu.+
7 Ero na uwaʼö wa hasambalö udöni, ududugö, uhori zi sambua banua mazui famatörö,+
8 ba labato soi andrö ba wamalua ngawalö zi lö sökhi si no utötöi, andrö wa ubulöʼö wangera-ngeragu* sanandrösa ba wamakao si no uʼera-era khöra.+
9 Hizaʼi, ero na uwaʼö ufasindro ba utanö zi sambua soi mazui famatörö,
10 ba lafalua zi lö sökhi föna duduma hörögu ba lö laʼoʼö niwaʼögu, andrö wa ubulöʼö wangera-ngeragu* sanandrösa ba zi sökhi si no uʼera-era khöra.’
11 ”Iadaʼa, uʼandrö khöu ombakhaʼö daʼa khö ndra matua si so ba Yehuda hegöi ono mbanua Yeruzalema, ’Daʼa niwaʼö Yehowa: ”No ufaʼanö wamakao ba no uʼera-era ngawalö zi lö sökhi ba khömi. Mifalalini wangera-ngerami si lö sökhi andrö. Mifaböʼöni lala waʼaurimi hegöi amuatami.”’”+
12 Hizaʼi lamane, ”Lö eluahania!+ Hasambalö maʼoʼö lala wangera-ngerama samösa, ba mafalua zi lö sökhi nifakhoi dödöma ba si lö foloʼö.”+
13 Börö daʼö imane Yehowa,
”Tandraigö sofu ba soi böʼö.
Hadia so zi no irai mamondrongo daʼa?
No ifalua zi lö sökhi ono alawe Gizaraʼeli.+
14 Hadia taya esi andrö ba gara si so ba gahe hili Libano?
Hadia oköli nidanö sohau-hau sangele moroi ba mbanua saröu?
15 Hizaʼi, no laʼolifugö ndraʼo iraono mbanuagu.+
Labeʼe zumange* ba nadu si lö eluaha,+Ba laʼalui lala enaʼö alabu niha ba lala nitöröra ba zilalö,+Irege latörö lala sise-ise si lö alösö ba si lö adölö.
16 Börö daʼö, tobali dania nahia sataʼu ita soira andrö,+Nahia niʼoʼaya* niha sagötö faʼara.+
Dozi niha sanörö daʼö, lafaigi si fao faʼataʼu ba lafalikhö-likhö högöra.+
17 Simane angi moroi ba gatumbukha, ufazawili ira föna nudura.
Na no irugi inötö wamakaora, ubiniʼö mbawagu khöra.”*+
18 Aefa daʼö lamane, ”Aine, dataʼalui dandrawa ba wolawa Yeremia,+ börö me ira ere zi lö tebulö mamahaʼö yaʼita sanandrösa ba goroisa,* niha satua-tua zameʼe khöda mene-mene, ba ira samaʼeleʼö zamaʼema taromali. Aine, tafobahulu ia ba böi tafondrondrongo wehedenia.”
19 He Yehowa, faigi-faigi ndraʼo,Ba fondrondrongo niwaʼö nudugu.
20 Hadia sinangea musulöni zi sökhi faoma si lö sökhi?
No lakhao dögi ba wamunu yaʼo.+
Törö tödöu wa no mozizio ndraʼo fönau ba wangumaʼö si sökhi sanandrösa khöra,Enaʼö lö saʼae mofönuʼö khöra.
21 Börö daʼö, lulu saʼae ndraonora ba waʼolofo;Ba beʼe ira ba mbawa wöda.+
Akha tobali lakha mbanua woʼomora ira alawe ba mate ndraonora.+
Akha mate ndra matua börö wökhö sabölö-bölö,Ba mate ndraono si bohou ebua ba mbawa wöda börö wasuwöta.+
22 Akha terongo weʼao moroi ba nomora,Ba ginötö öfatenge zorabu ba zi lö mudöna-döna.
No lakhao dögi ba wondraʼu yaʼo,Ba no lafasa dandrawa ba gahegu.+
23 Hizaʼi, he yaʼugö Yehowa,No öʼila niʼera-erara ba wamunu yaʼo.+
Böi efaʼö zalara,Ba böi heta horö nifaluara fönau.
Akha alabu ira fönau+Ba ginötö öhuku ira ba wönumö andrö.+
Nisura ba gahe zura
^ Mazui ”wa maniasa ndraʼo”.
^ Mazui ”wa maniasa ndraʼo”.
^ Mazui ”Latunu zumange irege numalö miyawa zimbo”.
^ Sin.: ”Tobali tandrösa wikho-wikho”.
^ Sin.: ”uforomaʼö khöra hulugu, tenga bawagu”.
^ Mazui ”wanuturu lala”.
