Yeremia 19:1-15
19 Daʼa niwaʼö Yehowa: ”Öli sambua mbuli-buli nifazökhi moroi ba dambu laʼuri khö zi samösa samöbözi tambu laʼuri.+ Kaoni mato hadauga ndra sondröniaʼö* soi daʼa hegöi ira ere si no ara.
2 Aefa daʼö, aeʼe ba Ndraso Ndraono Hinomo+ tanö föna Mbawa Göli Gakhökhöla Dambu Laʼuri. Ba daʼö ombakhaʼö hadia niwaʼögu khöu.
3 Ömane, ’Mifondrondrongo niwaʼö Yehowa, he yaʼami razo-razo Yehuda awö nono mbanua Yeruzalema. Imane Yehowa samatörö saradadu zorugo, Lowalangi ndraono Gizaraʼeli,
”’”Uʼasogö wamakao ba nahia daʼa. Hasambalö tokea* niha samondrondrongo daʼa.
4 Ufalua daʼö börö me no miröi ndraʼo+ ba no mibaliʼö danö andre tanö si lö laʼila niha.+ Ba daʼa, mibeʼe zumange khö lowalangi böʼö si lö miʼila, si lö laʼila ira tuami hegöi razo-razo niha Yehuda. No mifönui nahia daʼa do niha si lö fasala.+
5 No mifazökhi naha wamosumange* khö Mbaʼali ba wanunu onomi ba galitö si tobali sumange nitunu khö Mbaʼali.+ Lö irai uʼoroisi khömi wamalua daʼö mazui fahuhuo ndraʼo sanandrösa ba daʼö, ba lö irai tumbu ia ba wangera-ngeragu.”’*+
6 ”’Imane Yehowa, ”Na irugi inötönia dania, lö saʼae lafotöi nahia daʼa Dofeti mazui Daso Ndraono Hinomo, hizaʼi lafotöi ia Daso Wabunusa.+
7 Lö aʼozu dania nifakhoi niha Yehuda ubeʼe awö Yeruzalema ba nahia andre. Utehegö mate ira ba mbawa wöda nudu hegöi ba danga niha somasi mamunu yaʼira. Ba ubeʼe ö wofo ba dalu mbanua gamatelara hegöi ö gutu ndruʼu ba gulidanö.+
8 Ubaliʼö dania nahia si hokha mbu mbanua daʼa ba niʼoʼaya niha.* Dozi niha sanörö daʼö, lafaigi si fao faʼataʼu ba laʼoʼaya,* börö zi lö sökhi salua khönia.+
9 Laʼa dania nonora matua awö ndraonora alawe. Dozi niha laʼa nagole nawöra zamösana, börö me no tefaʼuʼu ira irege lö hadöi si tola lafalua me lafasui ira udura hegöi niha somasi mamunu yaʼira.”’+
10 ”Rasa mbuli-buli daʼö föna niha si fao khöu.
11 Ömane khöra, ’Daʼa niwaʼö Yehowa samatörö saradadu zorugo: ”Simane daʼa dania wanudugögu soi daʼa hegöi ono mbanuania. Urasa ia simane nifalua niha sorasa naha nifazökhi moroi ba dambu laʼuri irege tebai mufazökhi mangawuli. Lakoʼo dania niha si mate ba Dofeti irege lö hadöi naha saʼae.”’+
12 ”Imane Yehowa, ’Daʼö dania nifaluagu ba nahia daʼa awö ba nono mbanuania. Ubaliʼö simane Tofeti dania mbanua daʼa.
13 Raʼiö dania nomo si so ba Yeruzalema hegöi gödo razo ba Yehuda simane Tofeti.+ Labeʼe zumange ba dete nomora khö ndra saradadu zorugo+ ba lafaduwa zumange nibadu khö lowalangi tanö böʼö.’”+
14 Me no mangawuli Yeremia moroi ba Dofeti, ba nahia me ifatenge ia Yehowa ba wamaʼeleʼö, mozizio ia ba golayama nomo Yehowa ba imane ba niha fefu,
15 ”Daʼa niwaʼö Yehowa samatörö saradadu zorugo, Lowalangi ndraono Gizaraʼeli: ’Uʼasogö wamakao ba mbanua segebua hegöi ba mbanua si gide-ide simane si no uwaʼö, börö waʼabeʼe högöra* latimbagö woloʼö taromaligu.’”+
Nisura ba gahe zura
^ Mazui ”satua mbanua”.
^ Sin.: ”moʼugu dalinga”.
^ Sin.: ”nahia sagalawa”.
^ Mazui ”tumbu ba dödögu”.
^ Sin.: ”ba tandrösa wikho-wikho”.
^ Sin.: ”labaliʼö tandrösa wikho-wikho”.
^ Sin.: ”mbörö tuʼira”.
