Yeremia 2:1-37
2 Imane khögu Yehowa,
2 ”Ofanö ba ombakhaʼö ba Yeruzalema, ’Daʼa niwaʼö Yehowa:
”Lö olifudo waʼomasiu si lö faröi me awuyu nasa ndraʼugö,+Faʼomasi niforomaʼöu me famatua ndraʼugö khögu.+
Öʼoʼö ndraʼo ba danö si mate,Ba danö si lö mufazaewe tanömö zinanö.+
3 No niʼamoniʼö khö Yehowa ndraono Gizaraʼeli andrö,+ siaʼa mbua zinanönia.”’
’Gofu haniha zamakiko yaʼia hasambalö fasala.
Alua khöra wamakao,’ iwaʼö Yehowa.”+
4 Mifondrondrongo daromali Yehowa, he yaʼami ngaʼötö Yakobo,Hegöi ösi nomo ndraono Gizaraʼeli maʼafefu.
5 Daʼa niwaʼö Yehowa:
”Hadia zalagu khö ndra tuami,+Irege aröu ira khögu,Ba laʼoʼö nadu si lö eluaha+ irege lö eluaha waʼaurira göi?+
6 Lö lamane, ’Aine, dataʼalui Yehowa,Sangeheta yaʼita moroi ba danö Miserai,+Solohe yaʼita ba danö si mate,Ba danö si lö niha-niha+ si so koho-koho,Ba danö soköli+ ba sogömi-gömi,Ba mbanua si lö irai latörö nihaBa si lö sowanua ba daʼö.’
7 Uʼohe ami ba mbanua satabö sinanö,*Enaʼö miʼa mbua zinanö ba mitema mbua si sökhi.+
Hizaʼi, tohare ami ba mitaʼunöisi danögu.
Börö ami wa ogoro ndraʼo nono mbanuagu.*+
8 Lö laʼalui Yehowa ira ere.+
Niha samahaʼö Oroisa lö aboto ba dödöra ndraʼo.
Mamadaö khögu ndra kubalo,+Ba mamaʼeleʼö ndra samaʼeleʼö ba döi Mbaʼali.+
Laʼoʼö lowalangi si lö moguna.
9 ’Börö daʼö wa ulawa ami,’+ iwaʼö Yehowa,’Ba ulawa göi dania ngaʼötömi.’
10 ’Miʼae ba hulo niha Gitimi+ ba faigi atö!
Fatenge niha ba Gedara+ ba haogö woʼangeragö.
Faigi hadia no irai alua ba zilalö zimane daʼa.
11 Hadia no irai so zamalalini lowalanginia ba soi tanö böʼö ba zi tenga lowalangi?
Hizaʼi, lafalalini lakhömigu ono mbanuagu andrö khö lowalangi si lö eluaha.+
12 He yaʼami banua si yawa, mifaigi daʼa si fao faʼahöli-höli dödö,Yamuhokha mbumi börö waʼataʼu,’ iwaʼö Yehowa.
13 ’Börö me lafalua zi dombua ngawalö andre ono mbanuagu:
Laröi ndraʼo, umbu nidanö fangorifi,+Ba lakhao* mbaʼa khöra samösa,Baʼa si no asila, si tebai muhöna idanö.’
14 ’Hadia enoni Gizaraʼeli andrö mazui sawuyu si tumbu ba nomo zokhö yaʼia?
Na simane daʼö, hana wa tobali ia niha niʼoloiʼö?
15 Muʼao khöra zingo sawuyu-wuyu,+Lafarongogö lira.
Labaliʼö nahia si hokha mbu niha soira.
Latunu mbanuara, irege lö hadöi niha si toröi ba daʼö.
16 Niha Nofi*+ awö Dakhifane+ dania zorabu banuamö.*
17 Hadia tenga börö ndraʼugö wa alua daʼa?
Börö me faröi ndraʼugö khö Lowalangiu Yehowa,+Me ituturu lalamö ba wofanö.
18 Hana wa möiʼö ba Miserai,+Ba wamadu idanö Zihora?*
Hana wa mofanöʼö ba Asiria,+Ba wamadu idanö moroi ba Nungo Nidanö Oiferati?
19 Moguna öhalö wamahaʼö moroi ba gamuatamö si lö sökhi.
Moguna mubeʼe khöu degu-degu börö me faröi ndraʼugö.
Yaʼaboto ba dödöu ba yaʼöʼila, hewisa waʼalösökhi ba faʼafökhö+Na öröi Lowalangimö Yehowa.
Sindruhu-ndruhu wa lö öʼataʼufi ndraʼo,’+ iwaʼö Lowalangi Fondrege Zalawa, Yehowa samatörö saradadu zorugo andrö.
20 ’Me föna no ududugö kalo mbagi khöu+Ba muʼefaʼö ratemö.
Hizaʼi, ömane, ”Lö omasido ufosumange ndraʼugö.”
Ba zuzu hili salawa maʼafefu hegöi ba narö geu satabö,+Ölau mörö ba öʼoroʼö ndraʼugö ba wohorö.+
21 No utanö ndraʼugö simane tanömö agu soyo fondrege zi sökhi,+ maʼifu lö si tekiko danömönia.
Hizaʼi, hewisa wa tobali ndraʼugö liwiö si lö sökhi moroi ba danömö nagu ndruʼu?’+
22 ’Hewaʼae mondri ndraʼugö ba nidanö soda hegöi öʼoyaʼö wamake sabu,*Hizaʼi lö aheta zala nifaluamö hulö daʼunö si tebai aheta, hasambalö oroma khögu,’+ iwaʼö Lowalangi Yehowa Fondrege Zalawa.
23 Hewisa wa tola öwaʼö daʼa, ’Lö irai raʼiö ndraʼo.
Lö irai uʼoʼö Mbaʼali’?
Faigi atö lalamö ba ndraso.
Angeragö hadia zi no öfalua.
Fagölö ami gondra si alawe sawuyu-wuyu salio ahe,Si fagohi gofu hezo so ba si lö tatu töröwa.
24 Hulö galide gatua si tola auri ba danö si mate,Sangago si fasuinia ba wangalui urifö si matua börö waʼelowunia.
Haniha zi tola manaha yaʼia na elowu ia?
Lö marase zangalui yaʼia.
Lasöndra ia na no mangalau ia ba zi matua.
25 Böi atage gaheu,Ba böi oköli dölö-tölöu.
Hizaʼi ömane, ’Lö eluahania!+
Löʼö! Omasido khö lowalangi niha baero,*+Ba hasambalö uʼoʼö ira.’+
26 Teʼailasi ndraono GizaraʼeliHulö simane waʼaila zanagö si no mufaʼuʼu,Teʼailasi göi razora, ira sondröniaʼö,Ira ere awö zamaʼeleʼö andrö khöra.+
27 Lamane ba geu, ’Yaʼugö namama,’+
Ba lamane ba gara, ’Yaʼugö ninama.’
Hizaʼi, labiniʼö mbawara khögu.*+
Na göna ira famakao lamane,’Faoso, orifi ndraʼaga!’+
28 Hezo so lowalangi nifazökhimö?+
Akha laʼefaʼö ndraʼugö ba ginötö gönaʼö famakao.
Hadia tenga no fagölö waʼato lowalangimö simane faʼoya mbanua Yehuda?+
29 ’Hana wa lö öbato wolawa yaʼo?
Hana wa mamadaö ami khögu?’+ iwaʼö Yehowa.
30 Zaya-zaya gölögu wamözi onomö.+
Lö omasi ira latema degu-tegu.*+
Födamö andrö zi manga ira samaʼeleʼö khöu,+Simane singo sangalui önia.
31 He yaʼami sauri ba götö daʼa, miʼangeragö daromali Yehowa.
Hadia tobalido tanö si mate ba ndraono GizaraʼeliMazui tanö sogömi-gömi?
Hana wa lamane ono mbanuagu, ’Si lö tatu töröwa ndraʼaga.
Lö saʼae mafuli ndraʼaga khöu’?+
32 Hadia tola olifu zi samösa ono alawe gama-gamania?
Hadia tola olifu niʼowalu mböbö löwinia?
Hizaʼi, no ara olifu nono mbanuagu khögu.+
33 Onekhe sibai ndraʼugö wangalui lala ba wolohi faʼomasi!
Atua-tua sibai ndraʼugö ba wamalua si lö sökhi.+
34 No taʼunö mbarumö do niha si numana si lö fasala.+
Hewaʼae lö nibotora nomou,Afönu mbarumö dora.+
35 Hizaʼi ömane, ’Lö fasala ndraʼodo.
Tatu lö mofönu ia khögu saʼae.’
Iadaʼa, hasambalö uhuku ndraʼugöBörö me ömane, ’Lö horögu.’
36 Hana wa öbulöʼö lalau ba zomasi-masi dödöu?
Teʼailasi dania ndraʼugö börö Miserai,+Simane me teʼailasi ndraʼugö börö Asiria.+
37 Börö daʼö, mofanöʼö dania si fao faʼaila ba no öbeʼe dangau yawa ba högöu,+Börö me no itimba Yehowa fefu niʼodaligöu.
Tebai latolo ndraʼugö enaʼö mofozu waʼauriu.”
Nisura ba gahe zura
^ Mazui ”safönu bua zinanö”.
^ Mazui ”gondröitagu”.
^ Mazui ”lataba ba wangaʼazökhi”, te eluahania lataba gara.
^ Mazui ”Mefisi”.
^ Sin.: ”zi manga ba zuzu högöu”.
^ Sambua moroi ba nono Nungo Nidanö Nilo.
^ Mazui ”nasio alkali”.
^ Mazui ”ba niha si lö uʼila”.
^ Sin.: ”labeʼe khögu duʼi-tuʼira, tenga bawara”.
^ Mazui ”mene-mene”.
