Yeremia 23:1-40
23 ”Alai gubalo andrö samunu biri-biri ba samazawili yaʼira ba mbenua khögu!” iwaʼö Yehowa.+
2 Börö daʼö, daʼa niwaʼö Yehowa Lowalangi ndraono Gizaraʼeli sanandrösa khö ndra kubalo sokubaloi ono mbanuania: ”No mifazawili mbiri-birigu. Lö miböhöli wamazawili yaʼira, ba lö mirorogö.”+
”Uhuku ami börö gamuatami si lö sökhi,” iwaʼö Yehowa.
3 ”Aefa daʼö, ufuli uʼowuloi mbiri-birigu si lö si mate ba si no ufazawili ba soi misa.+ Uʼohe ira wangawuli ba mbenua soduʼu,+ ba momaʼuwu ira ba daʼö ba monönö waʼatora.+
4 Ufataro gubalo sokubaloi yaʼira.+ Lö saʼae khöra faʼataʼu mazui fanizi-nizi, ba sambua lö si taya,” iwaʼö Yehowa.
5 Imane Yehowa, ”Na irugi inötönia dania, ubeʼe liwiö* si sökhi amuata khö Dawido.+ Mamatörö dania samösa razo,+ yaʼia andrö razo satua-tua ba sangadölöʼö huku satulö awö zindruhu ba soi daʼa.+
6 Ba götö daʼö dania, teʼefaʼö Yehuda+ ba toröi ndraono Gizaraʼeli si fao faʼahono dödö.+ Labeʼe töinia: Atulö Ita Börö Yehowa.”+
7 Imane Yehowa, ”Hizaʼi, na irugi inötönia dania lö saʼae lamane, ’Faya wa no sauri Yehowa sangeheta iraono Gizaraʼeli moroi ba danö Miserai!’+
8 hizaʼi lamane, ’Faya wa no sauri Yehowa sangeheta ba solohe mangawuli ngaʼötö Gizaraʼeli moroi ba soi tanö yöu hegöi ba soi böʼö misa si no laʼiagö me no aefa ifazawili ira,’ ba toröi ira dania ba soira.”+
9 Sanandrösa khö ndra samaʼeleʼö:
No arasa dölagu bakha ba mbotogu.
Manizi-nizi fefu dölagu.
Hulö niha si mabu ndraʼo,Simane niha samadu agu soya,Me urongo daromali niʼamoniʼö andrö moroi khö Yehowa.
10 No afönu soi daʼa niha sohorö-horö.+
Göna ira faʼabu dödö börö wangelifi andrö,+Ba oköli ndruʼu ba mbenua.+
Lafalua zi lö sökhi ba laʼogunaʼö waʼabölöra ba zi fasala.
11 ”No laröi zindruhu ira* samaʼeleʼö hegöi ira ere.+
Uʼila samösa zi lö sökhi nifaluara ba nomogu,”+ iwaʼö Yehowa.
12 ”Andrö wa aelo ba ogömi lala nitöröra;+Latuliʼö ira ba alabu.
Börö me uʼasogö khöra wamakao,Ba ndröfi wanguhukugu yaʼira,” iwaʼö Yehowa.
13 ”No uʼila ngawalö zi raʼiö ba gotalua ndra samaʼeleʼö ba Zamaria.+
Mamaʼeleʼö ira ba döi Mbaʼali,Irege lafaelungu nono mbanuagu Izaraʼeli.
14 Uʼila göi ngawalö zi raʼiö ba gotalua ndra samaʼeleʼö ba Yeruzalema.
Mohorö ira+ ba afönu falimosa waʼaurira.+
Laʼoʼawögö niha si lö sökhi,Ba lö lafalalini gera-erara.
Hulö Zodoma ira ba wamaigigu,+Ba hulö Gomora nono mbanuania.”+
15 Börö daʼö, daʼa niwaʼö Yehowa samatörö saradadu zorugo andrö sanandrösa khö ndra samaʼeleʼö:
Ubeʼe dania öra zinanö safeto,Ba ufabadugö khöra langu.+
No faröi soi daʼö ba zindruhu börö ndra samaʼeleʼö si so ba Yeruzalema.”
16 Daʼa niwaʼö Yehowa samatörö saradadu zorugo:
”Böi mifondrondrongo niwaʼö ndra samaʼeleʼö khömi.+
Lafaelungu ami.*
Nifakhoi dödöra gangilata niʼombakhaʼöra khömi,+Tenga moroi ba mbawa Yehowa.+
17 Lö aetu lamane ba niha si lö mamosumange yaʼo,’Imane Yehowa, ”Hasambalö misöndra waʼohahau dödö.”’+
Ba lamane ba niha soloʼö nifakhoi dödöra samösa hegöi si lö moloʼö,’Lö göna ami famakao.’+
18 Haniha zosindro ba gotalua niha si fahuwu khö YehowaBa wamondrondrongo hegöi ba wangokhögö faʼaboto ba dödö sanandrösa ba daromalinia?
Haniha zoʼameʼegö tödö ba samondrondrongo taromalinia?
19 Hiza! Alua khöra wönu Yehowa simane angi sabölö-bölö.
Simane tawuyu nangi si göna ba högö niha si lö sökhi.+
20 Lö alö wönu Yehowa,Fatua lö ifalua ba iʼoʼozui zomasi dödönia.
Ba gafuriata götö daʼö, awena dania aboto ba dödömi fefu daʼa.
21 Lö mufatengegu ira, hizaʼi fagohi ndra samaʼeleʼö andrö weʼamöi ba daʼö.
Lö si fahuhuo ndraʼo khöra, hizaʼi lalau mamaʼeleʼö.+
22 Na mozizio ira menaʼö ba gotalua niha si fahuwu khögu,Tatu no lafarou nono mbanuagu ba wamondrondrongo taromaligu,Enaʼö lafalalini lala waʼaurira hegöi amuatara si lö sökhi.”+
23 Imane Yehowa, ”Hadia ha salua ba zi fasuigu niʼilagu ba lö uʼila hadia zalua ba zaröu?”
24 Imane Yehowa, ”Hadia tola ibiniʼö ia niha irege lö uʼila ia?”+
Imane Yehowa, ”Hadia tenga yaʼo zamoʼösi banua hegöi tanö?”+
25 ”No urongo wehede ndra samaʼeleʼö sofaya andrö ba döigu me lamane, ’No mangifido! No mangifido!’+
26 Hawaʼara laböhöli ira samaʼeleʼö andrö ba wangombakha famaʼeleʼö faya? No lafaʼema walimosa nifakhoi dödöra samösa.+
27 Faoma latutunö wangifira andrö ira samaʼeleʼö, enaʼö laʼolifugö döigu iraono mbanuagu, simane nifalua ndra tuara me laʼolifugö döigu börö Mbaʼali.+
28 Akha ifatunö wangifinia niha samaʼeleʼö andrö, hizaʼi niha sangokhögö taromaligu, akha ihaogö itutunö daʼö ba zindruhu.”
”Hadia tola lafaomagö döla wakhe ba gandru?” iwaʼö Yehowa.
29 Imane Yehowa, ”Hadia tenga simane alitö daromaligu,+ ba simane farökha sanudugö hili sokara?”+
30 ”Andrö wa uhuku dania ndra samaʼeleʼö andrö si no managö taromaligu moroi ba nono mbanuagu,”+ iwaʼö Yehowa.
31 Imane Yehowa, ”Uhuku ndra samaʼeleʼö sangogunaʼö lelara ba wangumaʼö, ’Daʼa niwaʼö Lowalangi!’”+
32 ”Uhuku ndra samaʼeleʼö sanutunö fangifi faya,” iwaʼö Yehowa, ”samaelungu ono mbanuagu si fao falimosa ba faʼasiliyawa.”+
”Lö nifatengegu ira ba lö niwaʼögu khöra. Sindruhu-ndruhu wa lö hadöi gunara ba soi andre,”+ iwaʼö Yehowa.
33 ”Na lamane khöu soi daʼa mazui ira samaʼeleʼö hegöi ira ere, ’No tobali noro dödöda duria andre* niwaʼö Yehowa,’ ömane khöra, ’”Yaʼami zi tobali noro dödö! Utiboʼö ami,”+ iwaʼö Yehowa.’
34 Na lamane ira samaʼeleʼö, ere mazui ono mbanua ba soi daʼa, ’No tobali noro dödö khöda duria andrö moroi khö Yehowa!’ hasambalö uhuku niha daʼö hegöi ösi nomonia.
35 Manofu ami khö nawömi hegöi khö dalifusömi, ’Hadia wanema li nibeʼe Yehowa? Hadia niwaʼö Yehowa?’
36 Hizaʼi, böi miwaʼö wa no tobali noro dödömi duria andrö moroi khö Yehowa. Tobali noro dödömi daʼö börö wehedemi samösa ba börö me no mibulöʼö daromali moroi khö Lowalangi sauri, Yehowa samatörö saradadu zorugo, Lowalangida.
37 ”Ömane khö ndra samaʼeleʼö: ’Hadia wanema li nibeʼe Yehowa? Hadia niwaʼö Yehowa?’
38 Na lö miböhöli wangumaʼö, ”No tobali noro dödöda duria andre niwaʼö Yehowa!” daʼa niwaʼö Yehowa: ”Börö me lö miböhöli wangumaʼö, ’No tobali noro dödöda daromali Yehowa,’ hewaʼae no uwaʼö khömi, ’Böi miwaʼö wa no tobali noro dödö daromali Yehowa,’
39 ufazawa ba uheta ami dania moroi ba duduma hörögu, he yaʼami hegöi banua si no irai ubeʼe khömi awö khö ndra tuami.
40 Ubaliʼö ami fangoʼaya ba laʼailasi ami sagötö faʼara, ba lö irai muʼolifugö daʼö.”’”+
Nisura ba gahe zura
^ Mazui ”samösa zanema ondröita”.
^ Mazui ”No raʼiö ndra”.
^ Mazui ”Labeʼe dötönafö faya”.
^ Mazui ”turia si tobali noro dödö”. Ba li Heberaiʼo eluahania ”turia sabölö moguna” mazui ”si tobali noro dödö”.
