Yeremia 24:1-10
-
Bua ara si sökhi ba si lö baga (1-10)
24 Ifaʼeleʼö khögu Yehowa dombua raga-raga mbua ara si no mubeʼe föna gosali Yehowa. Ifalua daʼö me no aefa tohare Nebukanesa* razo Mbabilona ba wangoloiʼö Yekhonia*+ ono Yoyaki+ razo Yehuda, simanö göi ndra sondröniaʼö ba Yehuda, samöbözi loga* hegöi tuka sonekhe tanö böʼö. Iʼoloiʼö ira moroi ba Yeruzalema numalö ba Mbabilona.+
2 Raga-raga si sambua, ösinia bua ara fondrege zi sökhi, simane bua zinanö siföföna. Raga-raga si sambua tö, ösinia bua ara si lö baga, fondrege waʼalöbaga irege tebai muʼa.
3 Aefa daʼö imane khögu Yehowa, ”Hadia niʼilamö Yeremia?” Ba umane, ”Bua ara. Bua si sökhi andrö fondrege zi sökhi, hizaʼi si lö baga ba no fondrege waʼalöbaga irege tebai muʼa.”+
4 Aefa daʼö, imane khögu Yehowa,
5 ”Daʼa niwaʼö Yehowa Lowalangi ndraono Gizaraʼeli: ’Niha Yehuda si no ufofanö moroi ba nahia andre ba si no muʼoloiʼö ba mbanua niha Galedaia, hulö mbua ara si sökhi ira ba wamaigigu.
6 Uʼameʼegö tödö ira enaʼö lasöndra waʼohahau dödö ba uʼohe ira mangawuli ba mbanua daʼa.+ Ufazökhi ira ba lö ufuli ududugö. Utanö ira ba lö ufuli udeha.+
7 Ba ubeʼe khöra dödö sedöna mangokhögö faʼaboto ba dödö sanandrösa ba khögu, wa no yaʼo Yehowa.+ Tobali ira ono mbanuagu ba Lowalangira ndraʼo,+ börö me lafuli ira khögu soroi ba dödö.+
8 ”’Hizaʼi, daʼa niwaʼö Yehowa sanandrösa ba mbua ara fondrege zi lö baga irege tebai muʼa,+ ”Ba wamaigigu, simane daʼö Zedekia+ razo Yehuda, ira sondröniaʼö hegöi ono mbanua Yeruzalema si toröi ba soi daʼa awö zi toröi ba Miserai.+
9 Ubaliʼö ira si hokha mbu ndra samatörö ba gulidanö me no laʼila wamakao salua khöra.+ Laʼailasi ba tobali ira amaedola fangoʼaya. Laʼoʼaya ba laʼelifi ira niha,+ ba ufazawili ira misa gofu hezo manö.+
10 Uhuku ira faoma föda,+ lofo hegöi fökhö waba,+ irege lö yaʼira ba danö si no ubeʼe khöra hegöi khö ndra tuara.”’”
Nisura ba gahe zura
^ Sin.: ”Nebukaresa”, amalalata döinia tanö böʼö.
^ Töi böʼö khö Yoyakhi ba Konia.
^ Mazui te ”samazökhi baʼa-baʼa”.
