Yeremia 25:1-38
25 Me no öfa fakhe mamatörö Yoyaki+ ono Yosia razo Yehuda, yaʼia daʼö me döfi siföföna mamatörö Nebukanesa* razo Mbabilona, ifaʼema Lowalangi daromalinia khö Yeremia sanandrösa ba niha Yehuda maʼafefu.
2 Daʼa niwaʼö Yeremia samaʼeleʼö ba* niha Yehuda hegöi ba nono mbanua Yeruzalema maʼafefu:
3 ”Ba zi 23 fakhe, ifaʼoheʼö khögu daromalinia Yehowa, iʼotarai me no 13 fakhe mamatörö Yosia+ ono Gamoni razo Yehuda irugi maʼökhö. Lö uböhöli fahuhuo* khömi, hizaʼi lö omasi ami mifondrondrongo.+
4 No ifatenge khömi ndra samaʼeleʼönia Yehowa, lö ibato wamatenge* yaʼira khömi. Hizaʼi, lö omasi ami mifondrondrongo ba lö miʼameʼegö tödö.*+
5 Lamane khömi ira samaʼeleʼö, ’Miröi lala waʼaurimi awö gamuatami si lö sökhi,+ enaʼö lö tebulö toröi ami ba danö nibeʼe Yehowa khömi hegöi khö ndra tuami.
6 Böi miʼoʼö lowalangi böʼö ba böi mifosumange mazui mangalulu ami fönania. Böi mifazökhi nadu ba wangafökhöiʼö tödögu. Na mifalua daʼö, uʼasogö khömi wamakao.’
7 ”’Hizaʼi lö mifondrondrongo ndraʼo,’ iwaʼö Yehowa. ’Mifazökhi nadu ba wangafökhöiʼö tödögu irege alua khömi wamakao.’+
8 ”Daʼa niwaʼö Yehowa samatörö saradadu zorugo: ’”Börö me lö miʼoʼö daromaligu,
9 ukaoni fefu ngawalö soi moroi yöu,+ ba ukaoni Nebukanesa,* razo Mbabilona, enonigu andrö,”+ iwaʼö Yehowa. ”Ufatenge ira ba wanuwö soi daʼa,+ ono mbanuania ba fefu soi ba zi fasuinia.+ Uhori dania ira, ba tobali ira fametaʼu ba famaʼiki niha.* Hasambalö ududugö irugi zi lö aetu.
10 Ubatogö dania waʼiki-iki ba faʼomuso dödöra,+ li marafule awö li niʼowalu,+ simanö göi li gara wogili hegöi haga wandru.
11 Adudu fefu soi daʼa ba tobali nahia sataʼu niha. Tobali enoni razo Mbabilona soi daʼa ba zi 70 fakhe.”’+
12 ”’Hizaʼi na no aefa zi 70 fakhe,+ uhuku razo Mbabilona awö soi daʼö börö zala si no lafalua,’+ iwaʼö Yehowa, ’ba ubaliʼö soi si lö niha-niha dania mbanua Galedaia irugi zi lö aetu.+
13 Hasambalö ufalua zi no uwaʼö ba soi andrö, yaʼia daʼö fefu zi no tesura ba mbuku andre, si no ifaʼeleʼö Yeremia sanandrösa ba soi misa.
14 Tobali dania ira sawuyu+ ba soi böʼö misa hegöi khö razo sagabölö.+ Hasambalö usulöni khöra gamuatara hegöi nibabaya dangara.’”+
15 Daʼa niwaʼö Yehowa khögu, Lowalangi ndraono Gizaraʼeli. ”Halö ba dangagu mako si no mufoʼösi agu si no amaedola wönugu. Gofu hezo soi ufatenge ndraʼugö, fabadugö khöra nagu andrö.
16 Hasambalö labadu ba mukhölö khöra danö. Hulö niha sowöhö ira ba ginötö uʼasogö wöda ba gotaluara.”+
17 Andrö wa uhalö mako andrö ba danga Yehowa, ba gofu hezo ifatenge ndraʼo Yehowa, hasambalö ufabadugö khöra nagu andrö:+
18 iʼotarai ba mbanua Yeruzalema awö mbanua Yehuda,+ simanö göi khö ndra razo awö zondröniaʼö, enaʼö tekiko nahiara andrö fefu ba ataʼu niha wamaigi. Laʼoʼaya ira* ba laʼogunaʼö döira tobali fangelifi,+ simane salua ba zi maʼökhö andre;
19 aefa daʼö, möido khö Waraʼo razo Miserai, khö ndra enoninia, khö ndra sondröniaʼö hegöi ba nono mbanuania maʼafefu,+
20 dozi niha si fatewu ba soi daʼö; fefu razo ba Gusi; fefu razo ba mbanua niha Wilisiti,+ Asekalo,+ Gaza, Ekerona hegöi niha si toröi ba Gasoto;
21 Edomo,+ Moabi+ awö niha Gamoni;+
22 fefu razo Diro, razo Zidona+ hegöi razo ba hulo si so ba nasi;
23 Dedano,+ Tema, Busi hegöi niha sanaba bu dangi-danginia;+
24 fefu razo Garabi+ hegöi razo moroi ba ngawalö soi si toröi ba danö si mate;
25 fefu razo Zimeri, razo Gelama+ awö razo Media;+
26 fefu razo moroi yöu, he sahatö hegöi saröu. Möido ufalukhaisi ira ero samösa, ba möido göi uʼondrasi wamatörö si so ba gulidanö maʼasagörö. Na no aefa labadu nösi mako andrö, Razo Zezakhi*+ zamadu ba gafuriata.
27 ”Ombakhaʼö khöra, ’Daʼa niwaʼö Yehowa samatörö saradadu zorugo, Lowalangi ndraono Gizaraʼeli: ”Mibadu irege mabu ami, ba miʼutaʼö. Akha tegaölö ami ba böi mifaoso saʼae.+ Börö me uʼasogö wasuwöta ba gotaluami.”’
28 Na lö omasi lahalö mako andrö ba dangamö ba lö labadu, ömane khöra, ’Daʼa niwaʼö Yehowa samatörö saradadu zorugo: ”Hasambalö mibadu daʼa!
29 Hiza! Banua si no mangotöigö töigu manö, oföna itema wamakao moroi khögu,+ ba hewisa wa lö alua khöu wanguhuku?”’+
”’Hasambalö tehuku ndraʼugö, börö me no uʼasogö wöda ba wanuwö fefu niha gulidanö,’ iwaʼö Yehowa samatörö saradadu zorugo.
30 ”Faʼema wamaʼeleʼö andre khöra,’Muʼao dania Yehowa moroi ba nahia salawa,Ba ifarongogö linia moroi ba nahiania niʼamoniʼö.
Iʼebuaʼö linia weʼao ba nahia waʼatoröinia ba gulidanö,Muʼao ia simane niha sohundra-hundra bua nagu ba naha wamöbörö,Ba iʼanunöisi zinunö faʼamöna ba niha gulidanö maʼafefu.’
31 ’Terongo dania waʼakaliru irugi ba wondrege danö,Börö me so gamadöniwa ba gotalua Yehowa hegöi soi böʼö.
Ihuku niha gulidanö maʼafefu,+Ba fefu niha si lö sökhi ilulu ba mbawa wöda,’ iwaʼö Yehowa.
32 Daʼa niwaʼö Yehowa samatörö saradadu zorugo:
’Alua wamakao ba ngawalö soi,+Ba muʼefasi nangi sabölö-bölö moroi ba wondrege danö.+
33 ”’Muzawili misa ba danö fefu niha nibunu Yehowa ba luo daʼö, iʼotarai ba wondrege danö numalö ba wondrege danö misa. Lö hadöi sangeʼesi yaʼira, ba lö laʼowuloi mazui lakoʼo. Tobali ira fangatabö zinanö ba danö.’
34 Miʼebuaʼö limi wege-ege, he yaʼami kubalo. Miʼao!
Mifagaölö-gaölö ami, he yaʼami sondröniaʼö ba gotalua ngawawa,Börö me no irugi inötö ba wanaba yaʼami hegöi ba wamazawili,Aekhu ami tou ba aboto simane gama-gama sebua böli moroi ba dambu laʼuri!
35 Tebai moloi ndra kubalo gofu hezo,Ba ira sondröniaʼö, tebai laʼorifi ira samösa.
36 Mifondrondrongo weʼao ndra kubalo,Hegöi feʼe ndra sondröniaʼö ba gotalua ngawawa,Börö me no idudugö Yehowa danö soduʼu khöra.
37 Lö hadöi fangorifi ba nahia waʼatoröi safönu faʼatulö,Börö me no mohola wönu Yehowa.
38 Hulö zingo sawuyu-wuyu ia si möi baero moroi ba nahiania,+Ba tobali nahia sataʼu ita soira.
Alua daʼö börö wöda satarö sibaiBa börö me no mohola wönunia.”
Nisura ba gahe zura
^ Sin.: ”Nebukaresa”, amalalata döinia tanö böʼö.
^ Mazui ”sanandrösa ba”.
^ Sin.: ”maoso ndraʼo sihulö wongi ba wahuhuosa”.
^ Sin.: ”wemaoso sihulö wongi ba wamatenge”.
^ Sin.: ”lö mibeʼe mbörö dalingami”.
^ Sin.: ”Tobali ira tandrösa wikho-wikho”.
^ Sin.: ”Nebukaresa”, amalalata döinia tanö böʼö.
^ Sin.: ”Tobali ira tandrösa wikho-wikho”.
^ Te daʼa döi nibiniʼö khö Mbabeli (Babilona).
