Yeremia 26:1-24
26 Me awena mamatörö Yoyaki+ ono Yosia razo Yehuda, imane Yehowa,
2 ”Daʼa niwaʼö Yehowa: ’Ozizio föna golayama nomo Yehowa, tutunö ba* nono mbanua si toröi ba Yehuda si möi mangalulu ba nomo Yehowa. Ombakhaʼö fefu hadia zi no uwaʼö khöu. Böi alösi zambua fehede.
3 Maʼatö lafondrondrongo ba labulöʼö lala waʼaurira si lö sökhi. Ubulöʼö göi wangera-ngeragu* sanandrösa ba wamakao sedöna ufalua khöra börö gamuatara si lö sökhi.+
4 Ömane khöra, ”Daʼa niwaʼö Yehowa: ’Na lö omasi mifondrondrongo ndraʼo, ba lö miʼoʼö goroisa* si no ubeʼe khömi,
5 ba lö mifondrondrongo wehede ndra samaʼeleʼö khögu, hewaʼae lö uböhöli wamatenge yaʼira* khömi hizaʼi lö mifondrondrongo,+
6 Ubaliʼö simane Silo+ dania nomo daʼa, ba muʼogunaʼö döi mbanua andre tobali fangelifi ba ngawalö soi ba gulidanö.’”’”+
7 Larongo ira ere, samaʼeleʼö hegöi ono mbanua maʼafefu me ifaʼema wehede daʼö Yeremia ba nomo Yehowa.+
8 Me no awai ifaʼema Yeremia ba niha sato wehede Yehowa, möi ndra ere, samaʼeleʼö hegöi ono mbanua ba wondraʼu yaʼia ba lamane, ”Hasambalö mateʼö.
9 Hana wa mamaʼeleʼö ndraʼugö ba döi Yehowa, ’Tobali simane Silo dania nomo daʼa, ba lafakiko mbanua daʼa irege lö hadöi sangiagö saʼae’?” Lahurufai Yeremia niha sato ba nomo Yehowa.
10 Me larongo fefu daʼa ira sondröniaʼö Yehuda, mofanö ira moroi ba gödo razo numalö ba nomo Yehowa ba modadao ira föna mbawa göli si bohou ba nomo Yehowa.+
11 Aefa daʼö, lamane ira ere hegöi ira samaʼeleʼö khö ndra sondröniaʼö awö niha sato, ”Sinangea na muʼetuʼö huku famunu ba niha daʼa,+ börö me ifaʼeleʼö wamakao ba mbanua daʼa, simane nirongo dögi dalingami samösa.”+
12 Andrö wa imane Yeremia khö ndra sondröniaʼö hegöi ba niha sato, ”Yehowa zamatenge yaʼo ba wamaʼema famaʼeleʼö andre nirongomi+ sanandrösa ba nomo awö mbanua daʼa.
13 Iadaʼa, mibulöʼö lala waʼauri hegöi amuatami. Miʼoʼö wehede Lowalangimi Yehowa enaʼö ibulöʼö wangera-ngerania* Yehowa sanandrösa ba wamakao si no iʼombakhaʼö khömi.+
14 Hizaʼi khömi gangetula,* gofu hadia nifaluami khögu moloʼö si sökhi mazui si lö sökhi ba wamaigimi.
15 Böi zi lö aboto ba dödömi, na mibunu ndraʼo, ba fasala ami hegöi banua andre börö me no mibunu niha si lö olalöwa. Sindruhu wa Yehowa zamatenge yaʼo ba wamaʼema fehede daʼa.”
16 Aefa daʼö, lamane ira sondröniaʼö hegöi niha sato khö ndra ere awö ndra samaʼeleʼö, ”Tenga sinangea laʼetuʼö huku famunu ba niha daʼa, börö me fahuhuo ia khöda ba döi Lowalangida Yehowa.”
17 Baero daʼö, so ösa ndra satua mbanua ba soi daʼö zi möi föna ba lamane ba niha sato si no owulo,
18 ”No irai mamaʼeleʼö Mikha+ moroi ba Moreseti ba götö Hizikia+ razo Yehuda. Imane ba niha Yehuda maʼafefu, ’Daʼa niwaʼö Yehowa samatörö saradadu zorugo:
”Mufaku Ziona hulö nowi,Ba tobali adudula dania Yeruzalema,+Ba hulö gatua dania hili nomo* Lowalangi andrö.”’+
19 Hadia möi Hizikia razo Yehuda awö niha Yehuda maʼafefu ba wamunu Mikha? Hadia tenga no ataʼu razo khö Yehowa ba iʼandrö waʼahakhö dödö Yehowa? Ibulöʼö wangera-ngerania* Yehowa sanandrösa ba wamakao si no iʼombakhaʼö khöra.+ Börö daʼö, na tabunu Yeremia, no taʼasogö wamakao sebua ba waʼaurida.
20 So göi niha böʼö si no irai mamaʼeleʼö ba döi Yehowa yaʼia daʼö Uria ono Zemaya moroi ba Giriati-yeari.+ Ifaʼeleʼö göi zalua ba mbanua daʼa hegöi ba soi andre simane famaʼeleʼö Yeremia.
21 Me irongo wehedenia andrö Razo Yoyaki+ awö ndra saradadu hegöi ira sondröniaʼö, iʼalui lala ba wamunu Uria.+ Me irongo daʼö Uria, ataʼu ia ba moloi ia ba danö Miserai.
22 Aefa daʼö, ifatenge niha Razo Yoyaki yaʼia daʼö Elinata+ ono Nakhibora hegöi si fao khönia weʼamöi ba Miserai.
23 Laraʼu Guria moroi ba danö Miserai ba laʼohe föna Razo Yoyaki. Aefa daʼö ibunu ia Razo faoma föda+ ba latiboʼö mbotonia ba lewatö niha si toʼölö.”
24 Hizaʼi, möi Gahika+ ono Zafana+ ba wolumöʼö Yeremia faböi labeʼe ia ba danga niha sato ba wamunu yaʼia.+
Nisura ba gahe zura
^ Mazui ”sanandrösa ba”.
^ Mazui ”Maniasa ndraʼo”.
^ Mazui ”wanuturu lala”.
^ Sin.: ”maosodo sihulö wongi ba wahuhuosa ba ufatenge ira”.
^ Mazui ”maniasa”.
^ Mazui ”Hizaʼi ba dangami so ndraʼo”.
^ Mazui ”gosali”.
^ Mazui ”Maniasa”.
