Yeremia 28:1-17
-
Yeremia hegöi samaʼeleʼö faya sotöi Hanania (1-17)
28 Ba ndröfi daʼö, me awena mamatörö Zedekia+ razo Yehuda, ba ndröfi si öfa me baŵa si lima, imane khögu Hanania samaʼeleʼö ono Gasuri moroi ba Gibeona+ ba nomo Yehowa, föna ndra ere hegöi niha sato maʼafefu,
2 ”Daʼa niwaʼö Yehowa samatörö saradadu zorugo, Lowalangi ndraono Gizaraʼeli: ’Ufatö dania kalo mbagi razo Mbabilona.+
3 Ha ba zi dua fakhe, ufuli ba daʼa fefu gama-gama nomo Yehowa nihalö Nebukanesa razo Mbabilona, si no iʼohe ba Mbabilona.’”+
4 ”’Ba uʼohe mangawuli ba daʼa Yekhonia+ ono Yoyaki+ razo Yehuda, awö niha Yehuda niʼoloiʼö ba Mbabilona,+ börö me no ufatö kalo mbagi razo Mbabilona,’ iwaʼö Yehowa.”
5 Aefa daʼö, mohede Yeremia samaʼeleʼö khö Hanania samaʼeleʼö föna ndra ere hegöi niha sato sozizio ba nomo Yehowa.
6 Imane, ”Yaduhu!* Yaʼifalua daʼö Yehowa! Yaʼalua wamaʼeleʼömö andrö ibeʼe Yehowa, enaʼö iʼohe mangawuli ba daʼa gama-gama nomo Yehowa hegöi niha niʼoloiʼö ba Mbabilona maʼafefu!
7 Hizaʼi uʼandrö khöu, fondrondrongo duria andre nifaʼemagu khöu awö ba niha sato maʼafefu.
8 Me föna, ira samaʼeleʼö fatua lö yaʼo ba yaʼugö, asese mamaʼeleʼö ira sanandrösa ba ngawalö soi hegöi famatörö sebua, sanandrösa ba wasuwöta, famakao awö wökhö waba.
9 Na so zamaʼeleʼö sanandrösa ba waʼahono dödö ba na itörö niwaʼönia andrö, aboto ba dödö niha wa sindruhu-ndruhu nifatenge Yehowa ia.”
10 Me irongo daʼö Hanania samaʼeleʼö, ihalö kalo mbagi andrö moroi ba mbagi Yeremia ba ifatö.+
11 Aefa daʼö imane Hanania föna niha sato, ”Daʼa niwaʼö Yehowa: ’Simane daʼa wamatögu kalo mbagi Nebukanesa razo Mbabilona si so ba mbagi ngawalö soi, ha ba zi dua fakhe.’”+ Ba mofanö Yeremia samaʼeleʼö moroi ba daʼö.
12 Me no aefa ifatö kalo mbagi andrö Hanania samaʼeleʼö moroi ba mbagi Yeremia samaʼeleʼö, imane Yehowa khö Yeremia,
13 ”Ofanö ba waʼö khö Hanania, ’Daʼa niwaʼö Yehowa: ”No öfatö kalo mbagi nifazökhi moroi ba geu,+ ba si tobali fangalinia, fazökhi kalo mbagi moroi ba ziʼöli.”
14 Daʼa niwaʼö Yehowa samatörö saradadu zorugo, Lowalangi ndraono Gizaraʼeli, ”Ufasa kalo mbagi siʼöli ba mbagi ngawalö soi andre, enaʼö tobali ira enoni Nebukanesa razo Mbabilona. Tobali ira sangai halöwö khönia.+ Ubeʼe khönia gurifö samuʼi si so ba mbenua.”’”+
15 Aefa daʼö, imane Yeremia samaʼeleʼö khö Hanania+ samaʼeleʼö, ”He Hanania, uʼandrö khöu fondrondrongo! Tenga yaʼugö nifatenge Yehowa, hizaʼi no öʼabeʼeʼö dödö niha irege faduhu dödöra ba walimosamö.+
16 Börö daʼö imane Yehowa: ’Uhori ndraʼugö moroi ba gulidanö. Hasambalö mate ndraʼugö ba ndröfi daʼa, börö me no öfaweʼe niha sato ba wolawa Yehowa.’”+
17 Mate Hanania samaʼeleʼö ba ndröfi daʼö, ba mbaŵa si fitu.
Nisura ba gahe zura
^ Mazui ”Yasimanö zalua!”
