Yeremia 33:1-26
33 Me lataha Yeremia ba Golayama Zanaro,+ mohede khönia Yehowa ba zi mendrua kali,
2 ”Daʼa niwaʼö Yehowa Samazökhi ulidanö, Yehowa zomböi ba sangaʼaroʼö; Yehowa döinia:
3 ’Miʼangaröfili ndraʼo. Utema liu ba uʼanemaiʼö uʼombakhaʼö khöu ngawalö zahöli-höli dödö si lö aboto ba dödöu, si lö irai öʼila.’”+
4 ”No iʼombakhaʼö Yehowa Lowalangi ndraono Gizaraʼeli hadia nifaluania ba nomo-omo si so ba mbanua daʼa hegöi ba gödo razo-razo Yehuda, si no idudugö udu me no aefa lafaʼuʼu ba lasuwö.+
5 Itutunö göi sanandrösa ba niha si möi molawa niha Galedaia hegöi sanandrösa ba mbanua daʼa safönu boto zi mate dania börö wönunia si hola-hola. No ibiniʼö mbawania ba mbanua daʼa börö waʼalösökhira.
6 Imane, ’Ufuli uʼazökhi ba uʼabölöʼö ia mangawuli.+ Ufadöhö ira ba ubeʼe khöra waʼatulö hegöi faʼahono dödö sebua.+
7 Uʼohe mangawuli niha Yehuda hegöi iraono Gizaraʼeli si no muʼoloiʼö.+ Ufuli uʼazökhi ira simane nifaluagu me mböröta.+
8 Uʼamoniʼö ira moroi ba golalöwara hegöi horö si no lafalua khögu,+ ba uʼefaʼö fefu zala awö horö si no lafalua khögu.+
9 Omuso dödögu na urongo döi mbanua daʼa me yaʼia mbörö wa lasuno ba lafolakhömi ndraʼo ba ngawalö soi, na larongo fefu zi sökhi si no ufalua ba nono mbanuagu.+ Ataʼu ba manizi-nizi ira+ me laʼila ngawalö zi sökhi hegöi faʼatulö nibeʼegu ba mbanua andre.’”+
10 ”Daʼa niwaʼö Yehowa, ’Hasambalö miwaʼö wa tanö si mate mbanua daʼa, lö hadöi niha mazui urifö si toröi ba daʼö, ba miwaʼö göi wa no muröi mbanua Yehuda hegöi lala ba Yeruzalema, lö hadöi niha mazui ono mbanua awö gurifö ba daʼö. Hizaʼi, ba nahia daʼa dania terongo
11 li waʼomuso dödö hegöi faʼiki,+ li marafule awö li niʼowalu, ba li niha sangumaʼö, ”Miʼandrö saohagölö khö Yehowa samatörö saradadu zorugo, börö me no si sökhi tödö Yehowa andrö;+ lö tebulö waʼomasinia si lö faröi sagötö faʼara!”’+
”’Laʼohe dania ba nomo Yehowa zumange fangandrö saohagölö,+ börö me uʼohe mangawuli nono mbanua si no muʼoloiʼö andre. Tobali ira simane me mböröta,’ iwaʼö Yehowa.”
12 ”Daʼa niwaʼö Yehowa samatörö saradadu zorugo: ’Ba danö si mate andre, si lö hadöi niha mazui urifö, awö ba mbanuania maʼafefu, hasambalö ifuli so mbenua soduʼu khö ndra kubalo, enaʼö tola laʼohe ngawawa guriföra ba daʼö.’+
13 ”’Lafuli laʼerai mbiri-biri awö nambira ira kubalo ba mbanua si so ba hili, ba mbanua saloʼo, ba mbanua tanö raya, ba danö Mbeniami awö ba zi fasui Yeruzalema+ hegöi banua si so ba Yehuda,’+ iwaʼö Yehowa.”
14 ”Imane Yehowa, ’Na irugi inötönia dania, hasambalö ufalua zi sökhi si no ufabuʼu ba ndraono Gizaraʼeli hegöi ba niha Yehuda.+
15 Ba luo daʼö, ufatumbuʼö khö Dawido liwiö* si sökhi amuata+ ba iʼadölöʼö dania huku satulö awö zindruhu ba soi daʼa.+
16 Ba ginötönia dania, teʼefaʼö Yehuda+ ba toröi ndraono Gizaraʼeli si fao faʼahono dödö.+ Labeʼe töinia: Yehowa No Faʼatulöda.’”+
17 ”Daʼa niwaʼö Yehowa: ’Lö tebulö modadao dania ngaʼötö Dawido ba dadaoma waʼarazo ndraono Gizaraʼeli.+
18 Simanö göi ngaʼötö Lewi, lö tebulö tobali ira ere fönagu ba wameʼe sumange nitunu maʼafefu, ba wanunu sumange niʼa* hegöi sumange tanö böʼö.’”
19 Imane nasa Yehowa khö Yeremia,
20 ”Daʼa niwaʼö Yehowa: ’No fawuʼu li ndraʼo khö zi maʼökhö hegöi khö zi bongi, irege alua zi maʼökhö hegöi si bongi ba ginötö si no muhonogöi. Na tola mifawuʼa mbuʼusa li daʼö,+
21 awena tola uwuʼai mbuʼusa ligu khö genonigu Dawido,+ irege lö hadöi ononia si tobali razo ba dadaomania,+ simanö göi mbuʼusa ligu khö ndra ere sangai halöwö khögu moroi ba ngaʼötö Lewi.+
22 Ufowinaeta waʼato ngaʼötö genonigu Dawido hegöi niha Lewi sangai halöwö khögu, irege tobali ira simane saradadu zorugo si tebai muʼerai waʼato awö gawu ba nasi si tebai musuʼa.’”
23 Imane nasa Yehowa khö Yeremia,
24 ”Hadia lö örongo me lawaʼö niha, ’Itimbagö Yehowa nösi nomo si dombua si no ifili’? Lö lafosumange nono mbanuagu ba tenga saʼae sambua soi ira ba wamaigi niha.
25 ”Daʼa niwaʼö Yehowa: ’Simane faʼaro mbuʼusa li si no uhonogöi khö zi maʼökhö hegöi khö zi bongi+ ba amakhoita sanandrösa ba mbanua si yawa awö danö,+
26 lö irai utimbagö ngaʼötö Yakobo hegöi ngaʼötö genonigu Dawido. Moroi ba ngaʼötönia ufili niha samatörö ngaʼötö Gaberahamo, Izaʼaki awö Yakobo. Hasambalö ufuli uʼowuloi nono mbanuara si no muʼoloiʼö+ ba uhakhösi tödö ira.’”+
