Yeremia 37:1-21
37 Mamatörö Razo Sedekia+ ono Yosia fangali Gonia*+ ono Yoyaki. Nebukanesa* razo Mbabilona zamataro yaʼia tobali razo ba Yehuda.+
2 Hizaʼi, lö ifondrondrongo wehede Yehowa nifaʼemania khö Yeremia samaʼeleʼö, simanö göi ndra enoninia awö niha sato ba soi daʼö.
3 Aefa daʼö, ifatenge niha Razo Sedekia yaʼia daʼö Yukhala+ ono Zelemia hegöi Sefania+ ono Gere Maʼaseya khö Yeremia samaʼeleʼö ba wangumaʼö, ”Angandrö salahima khö Yehowa Lowalangida.”
4 Me luo daʼö, tola manö möi Yeremia gofu hezo, börö me lö mubeʼe ia ba gurunga.+
5 No lafaʼuʼu Yeruzalema+ ira saradadu Galedaia, hizaʼi mofanö ira moroi ba daʼö me larongo wa tohare ndra saradadu Waraʼo moroi ba Miserai.+
6 Aefa daʼö imane Yehowa khö Yeremia samaʼeleʼö,
7 ”Daʼa niwaʼö Yehowa Lowalangi ndraono Gizaraʼeli: ’Daʼa zi lö tola löʼö miwaʼö khö razo Yehuda samatenge yaʼami ba wangandrö fanuturu lala moroi khögu: ”Hasambalö mangawuli ba danö Miserai fefu ndra saradadu Waraʼo si möi manolo yaʼugö.+
8 Ba ifuli dania tohare zaradadu niha Galedaia ba wanuwö, ladudugö ba latunu mbanua daʼa.”+
9 Daʼa niwaʼö Yehowa: ”Böi milimo ami ba böi miwaʼö wa lö mangawuli niha Galedaia, hasambalö mangawuli ira.
10 Hewaʼae mikalaisi fefu zaradadu Galedaia sanuwö yaʼami irege hatö niha sabölö-bölö mesokho zi toröi, hasambalö dania maoso ira moroi ba nosera ba latunu mbanua andre.”’”+
11 Me mofanö zaradadu Galedaia moroi ba Yeruzalema börö zaradadu Waraʼo,+
12 mofanö Yeremia moroi ba Yeruzalema, möi ia ba mbanua Mbeniami+ ba wangai tana khönia yaʼia daʼö tanö ondröita ba gotalua ndra talifusönia.
13 Hizaʼi, me ofeta Yeremia samaʼeleʼö ba Mbawa Göli Mbeniami, itaha ia kafalo zanaro sotöi Yeria ono Zelemia ono Hanania. Imane Yeria, ”Faʼawö ndraʼugö ba niha Galedaia!”
14 Imane Yeremia, ”Löʼö! Lö faʼawö ndraʼo ba niha Galedaia.” Hizaʼi, lö ifondrondrongo daʼö Yeria. Iraʼu Yeremia ba iʼohe ia khö ndra sondröniaʼö.
15 Mofönu sibai ndra sondröniaʼö khö Yeremia.+ Laböbözi ba lakuru ia+ ba nomo Yehonata sekretaris andrö. Omo daʼö no labaliʼö kurunga.
16 Labeʼe Yeremia ba gurunga narö danö ba toröi ia ba daʼö mato hauga hari.
17 Aefa daʼö, ifatenge niha Razo Sedekia ba wamaondragö Yeremia. Ibiniʼö wanofu khö Yeremia ba gödo razo.+ Imane, ”Hadia so gangombakhata moroi khö Yehowa?” Imane Yeremia, ”So!” Itohugö wangumaʼö, ”Hasambalö tebeʼe ndraʼugö ba danga razo Mbabilona!”+
18 Imane nasa Yeremia khö Razo Sedekia, ”Hadia horögu khöu hegöi khö ndra enoniu awö soi daʼa irege mibeʼe ndraʼo ba gurunga?
19 Hezo so ndra samaʼeleʼö khömi sanutunö wa lö tohare razo Mbabilona ba wanuwö yaʼami hegöi soi daʼa?+
20 Iadaʼa, uʼandrö khöu Pa, fondrondrongo gangandröwagu. Böi fangawuli ndraʼo ba nomo Yehonata+ sekretaris andrö, faböi matedo ba daʼö.”+
21 Börö daʼö, ibeʼe fareta Razo Sedekia enaʼö lakuru Yeremia ba Golayama Zanaro.+ Ero maʼökhö, labeʼe önia roti sowulo-wulo moroi ba nahia wamazökhi* roti+ irege ahori fefu roti ba mbanua daʼö.+ Ba daʼö manö toröi Yeremia ba Golayama Zanaro.
Nisura ba gahe zura
^ Töi böʼö moroi khö Yoyakhi ba Yekhonia.
^ Sin.: ”Nebukaresa”, amalalata döinia tanö böʼö.
^ Sin.: ”moroi ba lala zamazökhi”.
