Yeremia 40:1-16
40 Imane Yehowa khö Yeremia me no iʼefasi ia Nebuzarada+ kafalo zanaro ba gödo razo andrö ba Rama.+ Me luo daʼö, no larate danga Yeremia ba so ia ba gotalua niha Yeruzalema awö niha Yehuda niʼoloiʼö ba Mbabilona.
2 Iʼohe Yeremia andrö kafalo zanaro ba gödo razo ba imane, ”No ifaʼeleʼö Yehowa Lowalangimö wamakao salua ba nahia daʼa,
3 ba no ifalua daʼö Yehowa simane si no iwaʼö, börö me no mifalua horö föna Yehowa ba lö miʼoʼö niwaʼönia. Daʼö mbörö wa alua khömi daʼa fefu.+
4 Iadaʼa, uheta rate si so ba dangamö. Na omasiʼö fao khögu ba Mbabilona ba hasambalö urorogö ndraʼugö. Hizaʼi, na lö omasiʼö fao ba böi aeʼe. Faigi fefu mbanua si so ba duduma höröu. Ofanö gofu hezo zomasiʼö.”+
5 Börö me aombö dödö Yeremia ba wangawuli, imane khönia Nebuzarada, ”Fuliʼö khö Gedalia+ ono Gahika+ ono Zafana+ si no ifataro razo Mbabilona ba mbanua Yehuda. Ba daʼö iagö ba fao ba niha sato. Mazui, ofanö gofu hezo zomasiʼö.”
Aefa daʼö, ibeʼe kafalo zanaro ba gödo razo andrö mbuala awö gö khö Yeremia, ba itehegö mofanö ia.
6 Mofanö Yeremia khö Gedalia ono Gahika ba Misefa,+ fao ia ba niha si toröi ba mbanua andrö.
7 Ba gafuriata, larongo ira kumandru zaradadu ba soi daʼö hegöi ono buara wa no ifataro Gedalia ono Gahika razo Mbabilona tobali sondröniaʼö ba Yehuda hegöi samaigi-maigi niha si numana si lö muʼoloiʼö ba Mbabilona, ira matua, ira alawe hegöi iraono.+
8 Ba möi ira khö Gedalia ba Misefa.+ Yaʼira andrö Simaʼeli+ ono Netania, Yohanano+ ba Yonata ono Garea, Seraya ono Danumeti hegöi iraono Gefaʼi niha Netofa ba Yesania+ ono Maʼakhati ba fao göi khöra nono buara.
9 Möi ba hölu Gedalia ono Gahika ono Zafana ba niha sangondrasi yaʼia hegöi ba nono buara imane, ”Böi miʼataʼufi weʼamöi enoni niha Galedaia. Ba daʼa miʼiagö ba miʼoʼö niwaʼö razo Mbabilona. Ba sohahau tödö ami.+
10 Toröido ba Misefa si tobali salahimi* na laʼondrasi ita ira niha Galedaia. Hizaʼi, miʼowuloi mbua nagu, bua zinanö sowua ba mbaŵa lökhö hegöi fanikha, ba mibeʼe daʼö ba naha wangiröʼö. Miʼiagö mbanua si no mirabu.”+
11 Fefu niha Yahudi si so ba Moabi, ba Gamoni hegöi ba Gedomo awö soi böʼö, ahori larongo wa no itehegö razo Mbabilona toröi ösa niha Yehuda ba mbanua andrö ba no ifataro Gedalia ono Gahika ono Zafana ba wamaigi-maigi yaʼira.
12 Fefu niha Yahudi si no tefazawili, mangawuli ira ba danö Yehuda ba möi ira khö Gedalia ba Misefa. Oya mbua nagu si no laʼowuloi hegöi bua zinanö sowua ba mbaŵa lökhö.
13 Möi Yohanano ono Garea awö ndra kumandru zaradadu ba soi daʼö ba wangondrasi Gedalia ba Misefa.
14 Lamane khönia, ”Hadia lö nirongou wa no ifarou niha Baʼalisi razo niha Gamoni,+ yaʼia daʼö Simaʼeli ono Netania ba wamunu yaʼugö?”+ Hizaʼi, lö faduhu dödö Gedalia ono Gahika.
15 Ba zi lö laʼila niha, imane Yohanano ono Garea khö Gedalia ba Misefa, ”Möido ba wamunu Simaʼeli ono Netania. Samösa lö sangila. Hana wa ibunuʼö? Hana wa tefazawili niha Yehuda si no owulo khöu hegöi niha Yehuda si toröi enaʼö labunu?”
16 Hizaʼi, imane Gedalia+ ono Gahika khö Yohanano ono Garea, ”Böi. Faya niwaʼömö andrö sanandrösa khö Zimaʼeli.”
Nisura ba gahe zura
^ Sin.: ”ba wozizio”.
