Yeremia 41:1-18
41 Me baŵa si fitu, mofanö Zimaʼeli+ ono Netania ono Gelisama yaʼia daʼö ngaʼötö razo ba si tehöngö ba wamatörö. Möi ia iʼondrasi Gedalia ono Gahika ba Misefa+ ba so dafulu zi fao khönia. Me fao ira wemanga ba Misefa,
2 maoso Zimaʼeli ono Netania hegöi awönia si dafulu, labunu Gedalia ono Gahika ono Zafana faoma föda. Simane daʼö wamunura niha nifataro razo Mbabilona ba soi daʼö.
3 Ibunu göi fefu niha Yahudi si fao khö Gedalia ba Misefa awö ndra saradadu Galedaia si so ba daʼö.
4 Sahari me no aefa ibunu Gedalia, fatua lö si terongo,
5 tohare niha moroi ba Zikhema,+ Silo+ hegöi ba Zamaria+ 80 niha waʼato. No ahori latöwö mbu gambira, lasika nukhara ba lakhokhoi mbotora.+ Laʼohe göi zumange niʼa* awö gumöyö+ ba nomo Yehowa.
6 Möi baero Zimaʼeli ono Netania moroi ba Misefa ba wangondrasi yaʼira si fao feʼe. Imane khöra me falukha ira, ”Möi ita tafalukhaisi Gedalia ono Gahika.”
7 Hizaʼi, me larugi bakha ba mbanua, ibunu ira Simaʼeli ono Netania hegöi ono buania, ba latiboʼö ba mbaʼa nikhao.
8 So dafulu moroi ba gotaluara zangumaʼö khö Zimaʼeli, ”Böi bunuga. So khöma ba daʼa gandru, barli, fanikha awö wewani nibiniʼöma moroi ba kabu.” Andrö wa lö aʼozu ibunu ira Simaʼeli simane ira talifusöra.
9 Itiboʼö fefu mboto niha si no ibunu andrö Simaʼeli bakha ba mbaʼa nikhao nifazökhi Razo Asa me fasuwö ira Mbaesa razo ndraono Gizaraʼeli.+ Ba mbaʼa nikhao andrö, afönu gamatela niha si no ibunu Simaʼeli ono Netania.
10 Fefu niha si toröi ba Misefa+ iʼoloiʼö ira Simaʼeli, fao ba daʼö ndraono razo ono alawe awö niha sato si so ba Misefa, yaʼia daʼö dozi niha si no itouʼö Nebuzarada kafalo zanaro ba gödo razo ba danga Gedalia+ ono Gahika. Iʼoloiʼö ira Simaʼeli ono Netania ba mbanua Gamoni.+
11 Me irongo Yohanano+ ono Garea hegöi ira kumandru zaradadu si fao khönia hewisa waʼalösökhi nifalua Zimaʼeli ono Netania,
12 laʼowuloi fefu ndra matua ba möi ira ba wanuwö Simaʼeli ono Netania. Lasöndra ia ahatö ba nidanö sebolo* si so ba Gibeona.
13 Omuso sibai dödö niha niʼoloiʼö Zimaʼeli me laʼila Yohanano ono Garea awö ndra kumandru zaradadu si fao khönia.
14 Fefu niha si no iʼoloiʼö Simaʼeli moroi ba Misefa,+ lafuli ira furi ba fao ira khö Yohanano ono Garea.
15 Hizaʼi, moloi Zimaʼeli ono Netania awö nono buania si dawalu moroi khö Yohanano numalö ira ba niha Gamoni.
16 Me no aefa ibunu Gedalia+ ono Gahika andrö Simaʼeli ono Netania, möi Yohanano ono Garea awö ndra kumandru zaradadu si fao khönia, laʼohe fefu niha si no laʼefaʼö moroi ba danga Zimaʼeli ono Netania. Laʼohe mangawuli moroi ba Gibeona fefu ndra matua, saradadu, ira alawe, iraono hegöi sondröniaʼö ba gödo razo si otarai ba Misefa.
17 Fatua lö mofanö ira ba Miserai,+ toröi ira ba naha wolombase khö Gimihami sahatö ba Mbetilekhema.+
18 Ataʼu ira ba niha Galedaia börö me no ibunu Gedalia ono Gahika andrö Simaʼeli ono Netania, nifataro razo Mbabilona ba soi daʼö.+
