Yeremia 52:1-34
52 Faʼalawa ndröfi Zedekia+ me tobali ia razo yaʼia daʼö 21 fakhe, ba 11 fakhe mamatörö ia ba Yeruzalema. Töi ninania yaʼia daʼö Hamutala+ ono Yeremia moroi ba Libena.
2 Lö iböhöli wamalua si lö sökhi föna Yehowa simane nifalua Yoyaki.+
3 Mofönu sibai Yehowa ba Yeruzalema hegöi ba Yehuda irege alua khöra wamakao, andrö wa itiboʼö ba iheta ira föna duduma hörönia.+ Ba gafuriata molawa Zedekia khö razo Mbabilona.+
4 Me no siwa fakhe mamatörö Zedekia, ba ngaluo si fulu ba mbaŵa si fulu, möi Nebukanesa* razo Mbabilona awö ndra saradadunia ba wanuwö Yeruzalema. Lafazökhi nosenia föna mbanua andrö ba ifazökhi dowa ba zi fasui banua daʼö ba wamaʼuʼu.+
5 Lö laböhöli wamaʼuʼu banua andrö irugi 11 fakhe mamatörö Razo Sedekia.
6 Ba ngaluo si siwa ba mbaŵa si öfa,+ alua lofo sabölö-bölö ba mbanua andrö ba lö hadöi saʼae balazo.+
7 Me luo daʼö, lafaʼuʼu mbanua andrö ira niha Galedaia ba möi bakha zanuwö irege moloi fefu ndra saradadu ba zi bongi daʼö, latörö mbawa göli si so ba gotalua göli kara si no mufodombua wamalaete sahatö ba kabu razo. Aefa daʼö mofanö ira numalö ba Garaba.+
8 Lagohi Razo Sedekia+ ira saradadu niha Galedaia ba lakhamö ia ba Danö si Mate Yerikho. Oi zara moloi ndra saradadunia ba laröi Razo.
9 Aefa daʼö, laraʼu Zedekia ba laʼohe ia khö razo Mbabilona ba Ribela ba danö Hamata, ba daʼö lahuku ia.
10 Ibunu fefu nono Zedekia andrö razo Mbabilona föna duduma hörönia. Ibunu göi fefu ndra sondröniaʼö Yehuda ba Ribela.
11 Aefa daʼö, ikoe nono hörö Zedekia+ ba irate gahe faoma tembaga, iʼohe ba Mbabilona ba ifakuruʼö ba daʼö irege mate.
12 Ba ngaluo si fulu ba mbaŵa si lima, me no 19 fakhe mamatörö Nebukanesa* razo Mbabilona, möi Nebuzarada ba Yeruzalema, yaʼia andrö kafalo zanaro razo Mbabilona.+
13 Itunu nomo Yehowa,+ gödo razo, ba fefu nomo si so ba Yeruzalema. Itunu göi nomo segebua.
14 Aefa daʼö, ladudugö göli si fasui Yeruzalema ira saradadu niha Galedaia soloʼö kafalo zanaro razo andrö.+
15 So ösa niha si toröi ba mbanua daʼö awö niha si numana niʼoloiʼö Nebuzarada kafalo zanaro razo. Iʼohe göi niha si lö fao tödö khö razo Mbabilona awö ndra sohalöwö sogonekhe si toröi.+
16 Hizaʼi, iröi ösa nono mbanua si numana, ibaliʼö sohalöwö ba kabu ba so göi ösa zi tobali sawuyu.+
17 Ladudugö gehomo tembaga+ ba nomo Yehowa ira niha Galedaia awö gureta wasuwöta+ hegöi Asi Tembaga+ ba nomo Yehowa, aefa daʼö laʼohe fefu tembaga andrö ba Mbabilona.+
18 Lahalö göi embe, tambila, famunu galitö, tambala,+ mako+ awö ngawalö fakake tembaga niʼogunaʼö ba gosali.
19 Ihalö kafalo zanaro razo andrö karawa,+ naha mbo galitö, tambala, embe, naha wandru,+ galasi awö mako tanö böʼö nifazökhi moroi ba ganaʼa hegöi firö si sökhi.+
20 Hizaʼi, tebai musuʼa hawaʼoya tembaga si no musöndra ba gehomo si dombua, moroi ba Nasi Tembaga, ba zi 12 ngaʼeu wamaedo zawi si matua+ si so barö Nasi Tembaga hegöi ba gureta wasuwöta nifazökhi Razo Selomo ba nomo Yehowa.
21 Faʼalawa ero sambua gehomo 8 meter.* So 5,3 meter fasui ero sambua ehomo,*+ ba öfa turu* waʼaweʼe-weʼenia. Lö moʼösi hunö gehomo andrö.
22 Högönia tefazökhi moroi ba tembaga ba mato dua meter* waʼalawania ero sambua.+ Fefu zaiwa hegöi bua dalimo si so ba zi fasui högönia, tefazökhi moroi ba tembaga. Fagölö sibai gehomo si dua rozi andrö, simanö göi mbua dalimonia.
23 So 96 ngawua mbua dalimo ba zi fasuinia. Na muʼerai fefu so 100 ngawua mbua dalimo ba zi fasui saiwa andrö.+
24 Kafalo zanaro andrö iraʼu Zeraya+ yaʼia daʼö kafalo gere, Sefania+ ere si dua ba datölu zanaro bawandruhö.+
25 Ba mbanua daʼö, iraʼu göi samösa zondröniaʼö ba gödo razo si no tobali kafalo zaradadu, dafitu zameʼe mene-mene khö razo si so ba daʼö, samösa sekretaris kumandru zaradadu samarou ono mbanua andrö, ba 60 niha zi so ba daʼö.
26 Iʼohe ira Nebuzarada kafalo zanaro andrö khö razo Mbabilona ba Ribela.
27 Aefa daʼö, ibunu ira razo Mbabilona ba Ribela+ ba danö Hamata. Simane daʼö zalua me laʼoloiʼö niha Yehuda moroi ba danöra.+
28 Daʼa niha Yahudi niʼoloiʼö Nebukanesa:* Ba ndröfi si fitu, so 3.023 niha.+
29 Me no 18 fakhe mamatörö Nebukanesa,*+ so 832 niha niʼohe moroi ba Yeruzalema.
30 Me no 23 fakhe mamatörö Nebukanesa:* So 745 niha Yahudi niʼoloiʼö+ Nebuzarada kafalo zanaro.
Faʼato niha niʼoloiʼö maʼafefu 4.600 niha.
31 Me no mufataro Gewili-merodakhi tobali razo ba Mbabilona, iʼefasi Yoyakhi+ razo Yehuda moroi ba gurunga. Me luo daʼö, ngaluo si 25 ba mbaŵa si 12, me no 37 fakhe teʼoloiʼö Yoyakhi razo Yehuda.+
32 Ihaogö wehede khö Yoyakhi ba ibeʼe dadaoma sabölö alawa moroi ba razo tanö böʼö si fao khönia ba Mbabilona.
33 Lö saʼae ifake nukha gurunga Yoyakhi ba falulu manga ia khö Razo sandrohu faʼaurinia.
34 Ero maʼökhö, ibeʼe mbalazo Yoyakhi razo Mbabilona sandrohu faʼaurinia ofeta mate ia.
Nisura ba gahe zura
^ Sin.: ”Nebukaresa”, amalalata döinia tanö böʼö.
^ Sin.: ”Nebukaresa”, amalalata döinia tanö böʼö.
^ Mazui ”So 12 siʼu waʼanau tali niʼogunaʼö ba wamasui ero sambua ehomo”.
^ Sin.: ”Nebukaresa”, amalalata döinia tanö böʼö.
^ Sin.: ”Nebukaresa”, amalalata döinia tanö böʼö.
^ Sin.: ”Nebukaresa”, amalalata döinia tanö böʼö.
