Yeremia 6:1-30
6 He yaʼami ngaʼötö Mbeniami, miröi Yeruzalema, mibiniʼö ami.
Mifoli dorofe nifazökhi moroi ba dandru+ ba Dekoa,+Mifohola galitö si tobali tandra ba Mbeti-kheremi!
Börö me lö ara tö tohare wamakao moroi yöu, famakao sabölö-bölö.+
2 Fakhili-khili nono alawe Ziona ba ndra alawe si sökhi ba si baga-baga.+
3 Tohare dania ndra kubalo hegöi urifö nikubaloira.
Lafasindro nosera ba zi fasuinia,+Labeʼe gö guriföra zamösana.+
4 ”Mifaʼanö ami fasuwö ba wolawa Yeruzalema!
Mifaoso, datasuwö ira ba zi maʼökhö!”
”Alai ita, börö me no ibörögö ogömi,Adöni saʼae lumö zi bongi!”
5 ”Faoso, datasuwö ira ba zi bongiBa tadudugö maligenia si no mufoʼöli.”+
6 Imane Yehowa samatörö saradadu zorugo,
”Ewa geu ba fazökhi khöu göli ba wamaʼuʼu Yeruzalema.+
Yaʼia andrö banua si lö tola löʼö muhuku,Börö me ha famakao nifalua niha ba daʼö.+
7 Simane baʼa nidanö si no tobali umbu nidanö sohahau,*Tobali dania umbu waʼalösökhi mbanua andrö.
Terongo waʼudusa hegöi famakiko ba daʼö;+Lö aetu fönagu wamakao awö wangabu dödö.
8 He Yeruzalema, fondrondrongo wamangelama andre. Na lö öfondrondrongo, ubiniʼö mbawagu khöu börö waʼanuzu dödögu.+
Ubaliʼö ndraʼugö tanö si no muröi, ba banua si lö laʼiagö niha.”+
9 Imane Yehowa samatörö saradadu zorugo,
”Iraono Gizaraʼeli si toröi hulö simane bua nagu si toröi ba ndraha.
Owuloi ira fefu simane nifalua niha na iʼowuloi mbua nagu si toröi.”
10 ”Haʼökhö ulau fahuhuo ba ubeʼe wamangelama?
Haniha zomasi mamondrongo?
No teduhö* dögi dalingara irege lö laʼila lafondrondrongo.+
Laʼoʼaya daromali Yehowa.+
Lö omasi ira lafondrondrongo.
11 Ba no fahöna khögu wönu Yehowa andrö,Marasedo saʼae wanaha yaʼia.”+
”Falua wönugu andrö ba ndraono side-ide si so ba lala,+Khö ndra si bohou ebua si no owulo.
Hasambalö laraʼu ira, ira matua hegöi foʼomonia,Niha si no atua hegöi sagalawa döfi.+
12 Tebeʼe dania ba niha böʼö nomora,Simanö göi kabura hegöi foʼomora ira alawe,+Börö me ufazawa dania dangagu ba wolawa soi daʼa,” iwaʼö Yehowa.
13 ”Iʼotarai ndraono irugi zatua, lö latörö zindruhu ba wangalui tana khöra;+Iʼotarai khö ndra samaʼeleʼö ofeta khö ndra ere, fefu oi somasi falimo.+
14 Latandraigö ladalu-daluni zesokho ba nono mbanuagu, hizaʼi ha asala noa.
Lamane, ’So waʼatulö! So waʼatulö!’
Sindruhunia sa, lö hadöi faʼatulö.+
15 Hadia aila ira börö gamuatara si raʼiö andrö?
Löʼö. Lö khöra faʼaila!
Lö göi laʼila hadia waʼaila andrö.+
Börö daʼö, alabu dania ira ba gotalua niha salabu.
Manendre ira ba ginötö ufalua khöra wanguhuku,” iwaʼö Yehowa.
16 Daʼa niwaʼö Yehowa,
”Ozizio ba wabaliwa lala, ba faigi.
Misofu lala si no muʼehaogö me mböröta,Misofu hezo lala si sökhi, ba miʼoʼö lala daʼö,+Ba misöndra waʼahono dödö dania.”
Hizaʼi lamane, ”Lö omasiga maʼoʼö lala daʼö.”+
17 ”No ufataro ndra sanaro+ sangumaʼö,’Mifondrondrongo li dorofe nifazökhi moroi ba dandru!’”+
Hizaʼi lamane, ”Lö omasiga mafondrondrongo.”+
18 ”He yaʼami ngawalö soi, mifondrondrongo!
Ba yaʼami si no owulo,Mifaigi hadia zalua khöra.
19 ”He yaʼugö ulidanö, fondrondrongo!
Uʼasogö dania wamakao ba soi daʼa,+Börö wangera-ngerara si lö sökhi.
Lö laʼameʼegö tödö daromaliguBa latimbagö goroisa* nibeʼegu.”
20 Hadia guna öʼohe gumöyö moroi ba ZebaAwö zarango sami* moroi ba mbanua saröu?
Lö omasido utema zumange nitunu nibeʼeu,Ba lö omuso dödögu ba zumange tanö böʼö andrö khöu.”+
21 Börö daʼö, imane Yehowa,
”Ubeʼe gara föna soi daʼa enaʼö manendre ira.
Manendre dania ira,Ama ba ononia,Dozi niha hegöi si fahuwu khönia,Muhori ira fefu.”+
22 Imane Yehowa,
”Tohare dania sambua soi moroi yöu,Ba maoso dania sambua soi sebua moroi ba wondrege danö.+
23 Lagogohe wana sinali ba toho.
Afaito ira ba lö khöra faʼahakhö dödö.
Amaedola goso-goso nasi lira.
No möi ira yawa ba hulu kudo.+
No lafaʼoli ira wofanö simane na möi fasuwö, möi ira lasuwö ndraʼugö, he ono alawe Ziona.”
24 No marongo gangombakhata sanandrösa ba daʼö.
Adada dangama.+
No ihawui ndraʼaga faʼataʼu,Tefakao ndraʼaga simane ira alawe soʼono.+
25 Böi ae baero ba mbenua,Ba böi miʼanörö-nörö ba lala,Börö me no molohe föda nudumi,Ba ifasui ami faʼataʼu.
26 He yaʼami soigu,Mifake nukha goni+ ba mihawui ami awu.
Miʼeʼesi ba miduhugö wege-ege simane na mate nonomi si ha sambua,+Börö me tohare zamakiko yaʼita ba zi lö mudöna-döna.+
27 ”Ubaliʼö ndraʼugö* simane sanunu loga,Börö me yaʼugö zangehao ono mbanuagu.
Nehegö ba faigi gamuatara.
28 Yaʼira andrö oi niha sabeʼe högö,+Lafangörö-ngörö ira ba wamöbögö si lö duhu.+
Hulö simane tembaga ira ba siʼöli;No dozi samalua si lö sökhi ira.
29 Hewaʼae akhozi fakake niʼogunaʼö ba wangewuaʼö alitö,Zaya-zaya gölö wangehao yaʼira.
Ha simo saitö zi kalua moroi ba galitö.+
Tebai muheta niha si lö sökhi moroi ba gotaluara.+
30 Hasambalö mubeʼe töira wirö si no mutimbagö,Börö me no itimbagö ira Yehowa.”+
Nisura ba gahe zura
^ Mazui ”sokafu”.
^ Sin.: ”Lö nisuna”.
^ Mazui ”wanuturu lala”.
^ Sinanö somuhua.
^ Eluahania Yeremia.
