Yeremia 7:1-34
7 Daʼa niwaʼö Yehowa khö Yeremia:
2 ”Ozizio föna mbawa göli nomo Yehowa ba ombakhaʼö duria daʼa, ’Mifondrondrongo niwaʼö Yehowa, he yaʼami niha Yehuda sanörö bawa göli andre sangalulu föna Yehowa.
3 Imane Yehowa samatörö saradadu zorugo, Lowalangi ndraono Gizaraʼeli, ”Mifalalini lala waʼaurimi hegöi nifaluami, ba hasambalö utehegö dania toröi ami ba daʼa.+
4 Böi mifaduhusi tödö wehede samaelungu yaʼami ba mimane, ’Osali Yehowa daʼa,* osali Yehowa, osali Yehowa!’+
5 Na sindruhu-ndruhu mifalalini lala waʼaurimi hegöi nifaluami, ba mitörö lala satulö na so gamadöniwa ba gotalua zi fahuwu khömi,+
6 na lö mifakao niha si fatewu, si lö ama si lö ina,* lakha mbanua,+ na lö miduwagö ndro niha si lö sala ba nahia daʼa, ba na lö miʼoʼö lowalangi tanö böʼö si tobali famakikomi,+
7 utehegö toröi ami ba daʼa, ba danö si no ubeʼe khö ndra tuami sagötö faʼara.”’”
8 ”Hizaʼi, faduhu dödömi ba wehede faya samaelungu yaʼami.+ Maʼifu lö hadöi gunania khömi daʼö.
9 Na managö ami,+ mibunu niha, mohorö, fahölu ami ba waya,+ mibeʼe zumange khö Mbaʼali+ irege numalö miyawa zimbo, ba miʼoʼö lowalangi si lö miʼila, hadia tola
10 möi ami khögu ba mozizio ami fönagu ba nomo si no mangotöigö töigu ba mimane, ’Hasambalö teʼorifi ndraʼaga,’ hewaʼae sindruhunia no mifalua gamuata si raʼiö?
11 Ba wamaigimi, hadia no tobali omo zorabu nomo sangotöigö töigu andre?+ No uʼila samösa daʼö,” iwaʼö Yehowa.
12 ”’Iadaʼa, miʼae ba nahiagu andrö ba Zilo,+ nahia si no ufili mböröta ba wamolakhömi töigu,+ ba faigi hadia zi no ufalua ba nahia andrö börö waʼalösökhi nono mbanuagu Izaraʼeli.+
13 Hizaʼi, lö miböhöli wamalua daʼa fefu,’ iwaʼö Yehowa, ’Hewaʼae lö aetu fahuhuo ndraʼo,* ba lö mifondrondrongo.+ Lö uböhöli wogaoni yaʼami, hizaʼi lö mitema ligu.+
14 Hadia nifaluagu ba Zilo,+ ufalua göi daʼö ba nomo sangotöigö töigu andre,+ sabeʼe dödömi+ hegöi ba nahia si no ubeʼe khömi ba khö ndra tuami.
15 Uheta ami fönagu, simane me uheta dalifusömi, yaʼia daʼö fefu ngaʼötö Geferai.’+
16 ”Ba yaʼugö, böi angandrö salahi soi daʼa. Böi angaröfili döigu mazui mangandröʼö salahira,+ börö me lö ufondrondrongo gangandröwamö andrö.+
17 Hadia lö niʼilamö nifaluara ba mbanua Yehuda hegöi ba lala Yeruzalema?
18 Laʼozaragö geu iraono ba lafewuaʼö galitö ira ama, ba foʼomo ira alawe zamaruka tarigu ba wangehaogö kue tobali sumange khö Ratu Zorugo.*+ Lafaduwa zumange nibadu khö lowalangi böʼö ba wangafökhöiʼö tödögu.+
19 ’Hadia yaʼo niʼafökhöiʼöra tödö?’ iwaʼö Yehowa. ’Hadia tenga yaʼira samösa nifakaora irege teʼailasi ira?’+
20 Daʼa niwaʼö Yehowa Lowalangi Fondrege Zalawa: ’Ufalua wönugu sabölö-bölö ba faʼabao dödögu ba nahia daʼa,+ ba niha, ba gurifö, ba geu si so ba mbenua hegöi ba mbua zinanö. Lö alö wönugu si hola-hola andrö.’+
21 ”Daʼa niwaʼö Yehowa samatörö saradadu zorugo, Lowalangi ndraono Gizaraʼeli: ’Beʼe manö zumange nitunu maʼafefu hegöi sumange tanö böʼö, ba miʼa nagolenia.+
22 Me uheta ndra tuami moroi ba danö Miserai, lö si fahuhuo ndraʼo ba lö nibeʼegu khöra fareta sanandrösa ba zumange nitunu maʼafefu hegöi sumange tanö böʼö.+
23 Hizaʼi, daʼa niwaʼögu khöra: ”Miʼoʼö niwaʼögu, ba tobali ndraʼo Lowalangimi, ba ono mbanuagu ami.+ Mitörö lala si no ufakhoi, enaʼö mofozu lala waʼaurimi.”’+
24 Hizaʼi, lö lafondrondrongo mazui laʼameʼegö tödö.*+ Laʼoʼö nifakhoi dödöra* samösa. Abeʼe högöra ba laʼoʼö niwaʼö dödöra si lö sökhi,+ irege awuwu ira ba tenga si tedou,
25 iʼotarai me aheta ndra tuami moroi ba danö Miserai irugi maʼökhö.+ Daʼö mbörö wa lö aetu ufatenge khömi ndra samaʼeleʼö khögu. Ero maʼökhö ufatenge* ira khömi.+
26 Hizaʼi, lö hadöi somasi mamondrondrongo niwaʼögu, ba lö hadöi soʼameʼegö tödö.+ Itugu abeʼe högöra* ba itugu lö sökhi gamuatara moroi khö ndra tuara!
27 ”Hewaʼae öfaʼema khöra fefu niwaʼögu andre,+ hasambalö lö lafondrondrongo. Hewaʼae ökaoni ira, ba lö latema liu.
28 Börö daʼö, ömane khöra, ’Daʼa soi si lö moloʼö niwaʼö Lowalangira Yehowa ba si lö omasi manema tegu-tegu.* No taya waʼalöfaröira ba lö saʼae latutunö daʼö ba gotaluara.’+
29 ”Mitaba mbumi sanau* andrö ba mitiboʼö. Miʼanunöisi zinunö ngenu-ngenu ba hili-hili, börö me no itimbagö ngaʼötö daʼa Yehowa ba no iröi ira, me no laʼandrö wönunia.
30 ’No lafalua zi lö sökhi fönagu ira niha Yehuda,’ iwaʼö Yehowa. ’No labeʼe nadu niʼogorofi andrö ba nomo sangotöigö töigu enaʼö taʼunö nomogu.+
31 Lafazökhi naha wamosumange* ba Dofeti, ba Ndraso Ndraono Hinomo,*+ ba wanunu onora matua hegöi onora alawe ba galitö.+ Lö irai uwaʼö khöra ba wamalua daʼö, ba lö irai tumbu ba gera-eragu.’*+
32 ”Imane Yehowa, ’Na irugi inötönia dania, lö saʼae lafotöi ia Dofeti mazui Daso Ndraono Hinomo,* hizaʼi lafotöi ia Daso Wabunusa. Lakoʼo dania niha ba Dofeti irege lö hadöi naha saʼae.+
33 Ba tobali ö wofo ba dalu mbanua ba ö gutu ndruʼu ba gulidanö mboto zi mate andrö. Lö hadöi sanaboi yaʼira.+
34 Ubatogö dania li zaʼiki ba somuso tödö, li marafule awö li niʼowalu+ ba mbanua Yehuda hegöi ba lala Yeruzalema, börö me tobali adudula mbanua daʼö.’”+
Nisura ba gahe zura
^ Sin.: ”fefu daʼa”. Eluahania fefu domosa si so ba zi fasui osali.
^ Mazui ”si lö ama”.
^ Sin.: ”maoso ndraʼo sihulö wongi ba wahuhuosa”.
^ Daʼa gamalalata döi lowalangi ira alawe nifosumange ndraono Gizaraʼeli si no mondröi sindruhu. Te lowalangi fangatabö.
^ Sin.: ”labeʼe mbörö dalingara”.
^ Mazui ”wangera-ngerara”.
^ Sin.: ”Maoso ndraʼo ero sihulö wongi ba ufatenge”.
^ Sin.: ”Itugu agabeʼe mbörö tuʼira”.
^ Mazui ”mene-mene”.
^ Mazui ”si no milulu”.
^ Sin.: ”nahia sagalawa”.
^ Faigi ”Gehena” ba Geluaha Ngawua Wehede.
^ Mazui ”tumbu ba dödögu”.
^ Faigi ”Gehena” ba Geluaha Ngawua Wehede.
