Yesaya 21:1-17
21 Turia fanguhuku sanandrösa ba danö si mate si so ba zinga nasi:*+
So zi tohare si hulö angi laöhö si numalö miraya,Iʼotarai ba danö si mate, moroi ba soi sataʼu ita.+
2 Teʼombakhaʼö khögu gangilata sataʼu ita andre:
”Tobali si manga mböli zi manga mböli,Ba tobali sanudugö banua dania soi solohe faʼatekiko.
Labu misa, yaʼugö saradadu Elama! Faʼuʼu mbanua, yaʼugö saradadu Media!+
Uʼasiwai fefu wamakao niʼasogönia.”+
3 Daʼö mbörö wa tefakao sibai ndraʼo.*+
No ihawui ndraʼo faʼafökhö,Hulö ndra alawe soʼono.
Abu sibai dödögu irege lö urongo hadia ia;Lö sökhi-sökhi dödögu me uʼila.
4 Lö ahono-hono dödögu; manizido ba waʼataʼu.
Faʼabongi nibalo-baloigu andrö möi börö waʼataʼugu.
5 Faʼanö meza ba henaigö gurusi!
Milau manga ba mibadu nidanö!+
He yaʼami sondröniaʼö, mifaoso, mibayoini mbaluse faoma fanikha!
6 Börö me imane Yehowa,
”Ofanö, fataro zozago ba farou ia ba wangombakha si no iʼila.”
7 Iʼila sara gureta wasuwöta nidöni kudo,Kureta wasuwöta nidöni galide,Kureta wasuwöta nidöni gondra.
Ihaogö inehe-nehegö ba wamaigi.
8 Aefa daʼö, muʼao ia simane singo,
”He Yehowa, ba malige zanaro lö tebulö mozizio ndraʼo ba zi maʼökhö,Ba nahiagu wanaro, ulau mozizio ero bongi.+
9 Hiza, so zi tohareLatörö gureta wasuwöta nidöni kudo si dua ngaʼeu!”+
Aefa daʼö imane,
”No adudu Mbabilona! No adudu Mbabilona!+
No adudu ba danö fefu nadu lowalanginia si no mufoe!”+
10 He yaʼami ono mbanuagu, soi si no muhundra-hundra,Bua* moroi ba naha wamöbörö gandru khögu,+No uʼombakhaʼö khömi hadia zi no urongo moroi khö Yehowa samatörö saradadu zorugo, Lowalangi ndraono Gizaraʼeli.
11 Daʼa duria wanguhuku sanandrösa khö Duma:*
So zogaoni yaʼo moroi ba Zeʼira,+
”He sanaro, hadia ara nasa moluo?
He sanaro, hadia ara nasa moluo?”
12 Imane sanaro andrö,
”Lö ara tö moluo, ba lö ara tö bongi.
Na omasi ami manofu, misofu manö.
Mifuli miʼae ba daʼa!”
13 Turia fanguhuku sanandrösa ba danö si lö niha-niha:
He yaʼami ngawawa niha Dedano,+Toröi dania ami ba gatua ba danö si lö niha-niha.
14 He yaʼami ono mbanua Dema,+Miʼohe nidanö ba wanemaʼö niha sowökhi tödö,Hegöi roti ba niha soloi.
15 Börö me no moloi ira moroi ba mbawa wöda, moroi ba wöda si no mutaruʼö,Moroi ba wana sinali si no mufaʼanö ba wamana hegöi ba wasuwöta sabölö-bölö.
16 Daʼa niwaʼö Yehowa khögu: ”Ha ba zi döfi, taya dania fefu lakhömi Gedara+ simane faʼara wohalöwö niha nigazi.
17 Lö ato zi toröi ndra saradadu samana ba Gedara, börö me no iwaʼö Yehowa Lowalangi ndraono Gizaraʼeli.”
Nisura ba gahe zura
^ Te daʼö geluahania banua Mbabilona me föna.
^ Sin.: ”afökhö sibai löwi-löwigu”.
^ Sin.: ”Ono”.
^ Eluahania ”Falönini-nini”.
