Yesaya 24:1-23
24 Hiza! Ihori soi daʼö* Yehowa ba ibaliʼö tanö si lö niha-niha.+
Ifawukaisi soi andrö+ ba ifazawili misa nono mbanuania.+
2 Dozi niha lataögö dania zimane daʼö,Ono mbanua mazui ere,Sawuyu mazui sokhö ira matua,Sawuyu mazui sokhö ira alawe,Sowöli mazui samawa,Sameʼe nifiza mazui samiza,Sameʼe nitangu mazui sanangu.+
3 Sindruhu-ndruhu wa muhori dania nösi mbanua andrö;Muʼoloiʼö fefu zi so ba daʼö,+Börö me Yehowa zangumaʼö yaʼia.
4 Mege-ege* mbanua daʼö,+ mangarö-ngarö.
Tobali dania tanö si mate danö satabö, ba oköli.
Alö waʼato ndra samatörö ba mbanua daʼö.
5 Taʼunö mbanua andrö börö nono mbanuania,+Börö me no lasawö huku,+Lawuʼai zi no mufakhoi,+Ba lasawö zi no lafabuʼu sagötö faʼara.+
6 Daʼö mbörö wa göna fangelifi fefu soi daʼa,+Ba fasala nono mbanuania.
Daʼö mbörö wa alö saʼae nono mbanuania,Ba ha maʼifu zi toröi.+
7 Mege-ege* nagu si bohou, aleu döla nagu,+Ba mukökö-kökö fefu niha somuso tödö.+
8 Awai ginötö waʼomuso dödö börö me lö hadöi li damburu;Lö hadöi faʼowua-wua dödö saʼae;Tebato li harafa si möi fangomuso dödö.+
9 Lö hadöi saʼae samadu agu si fao sinunö,Ba afeto duo ba niha samadu yaʼia.
10 No adudu mbanua si no muröi;+Laduhö fefu nomo enaʼö lö si möi bakha.
11 Muʼao ira ba wangandrö agu ba lala.
Lö hadöi saʼae faʼomuso dödö;No taya waʼowua-wua dödö ba mbanua daʼö.+
12 Tedudugö dania mbanua andrö;Tedudugö mbawa göli ba tobali adudula.+
13 Daʼa dania zalua ba mbanua daʼö ba gotalua soi böʼö:
Tobali ira simane töla zaitu niböbözi,+Simane bua agu si toröi me no awai ginötö wamasi.+
14 Muʼao dania ira,Omuso dödöra.
Iʼotarai ba gaekhula* laturiaigö lakhömi Yehowa.+
15 Iʼotarai ba gatumbukha*+ lafosumange Yehowa;Lafolakhömi döi Yehowa Lowalangi ndraono Gizaraʼeli ba hulo si so ba nasi.+
16 Moroi ba mbalö danö faföfö, marongo zinunö,
”Lakhömi khö Lowalangi Sindruhu!”+
Hizaʼi umane, ”Abu dödögu, abu dödögu!
Alai ndraʼo! Tobali si manga mböli zi manga mböli;Si fao faʼonekhe, laʼa mböli.”+
17 He yaʼami sowanua ba danö, ibaloi ami faʼataʼu, koho-koho hegöi tandrawa.+
18 Soloi moroi ba duria gametaʼuö hasambalö alau ba goho-koho,Niha si möi baero moroi ba goho-koho, aekhu ira ba dandrawa.+
Teboka mbawandruhö nidanö moroi ba mbanua si yawa,Ba modögö daya-daya danö.
19 Asila danö;Modögö danö;Muheu danö.+
20 Tolega-lega danö hulö simane niha si mabu,Mudaulu misa hulö simane ose nibözi nangi.
Adudu soi daʼa börö waʼebua horönia,+Irege aekhu ia tou ba tebai mozizio.
21 Ba ngaluo daʼö, inehegö zaradadu si so si yawa Yehowa,Hegöi razo-razo si so ba gulidanö.
22 Muʼowuloi iraSimane niha gurunga niʼowuloi ba goho-koho;Lakuru ira ba narö danö si no lakhao,Awena dania lanehegö ira na no ara ginötö.
23 Ba aila mbaŵa na inötö duli,Ba alö haga luo,+Börö me no tobali Razo+ Yehowa samatörö saradadu zorugo andrö ba Hili Ziona+ ba Yeruzalema,Ba tefolakhömi ia föna ndra sondröniaʼö ono mbanuania.+
Nisura ba gahe zura
^ Mazui ”nösi gulidanö”.
^ Mazui te ”Oköli”.
^ Mazui te ”Oköli”.
^ Mazui ”nasi”.
^ Mazui ”ba mbanua sohaga”.
