Yesaya 39:1-8
-
Tenge-tenge moroi ba Mbabilona (1-8)
39 Me luo daʼö, ifaʼoheʼö zura hegöi buala Merodakhi-balada ono Mbalada razo Mbabilona khö Hizikia+ börö me irongo wa no mofökhö Hizikia ba no döhö.+
2 Omuso sibai dödö* Hizikia wanemaʼö tenge-tenge andrö ba iforomaʼö khöra fefu haratonia+ si so ba naha wangiröʼö, farahu ba daʼö wirö, anaʼa, fanikha famayoini, fanikha sebua böli tanö böʼö, fangönania ba wasuwöta awö danö böʼö maʼafefu. Lö hadöi si lö iforomaʼö khöra, he si so ba gödo razo mazui ba zi sagörö famatörönia.
3 Aefa daʼö, möi Yesaya samaʼeleʼö khö Razo Hizikia ba manofu ia, ”Hadia niwaʼö ndra niha daʼa ba hezo moroi khöra?” Imane Hizikia, ”Moroi ba mbanua saröu, yaʼia daʼö Babilona.”+
4 Ifuli manofu Yesaya, ”Hadia manö niʼilara ba nomou?” Imane Hizikia, ”No ahori laʼila zi so ba nomogu awö zi so ba nahia wangiröʼö haratogu maʼafefu. Lö hadöi si lö uforomaʼö khöra.”
5 Imane Yesaya khö Hizikia, ”Fondrondrongo niwaʼö Yehowa samatörö saradadu zorugo:
6 ’Ba ginötönia dania, fefu zi so ba nomou awö zi no laʼowuloi ira tuau maʼafefu irugi maʼökhö andre, hasambalö laʼohe daʼö ba Mbabilona. Sambua lö laröi,’+ iwaʼö Yehowa.+
7 ’Ba so ösa ngaʼötöu si tumbu dania niʼohe ba gödo razo Mbabilona ba tobali ira sondröniaʼö ba gödo razo.’”+
8 Ba imane Hizikia khö Yesaya, ”No si sökhi sibai wehede Yehowa andrö nifaʼemau.” Imane nasa, ”Sökhi daʼö börö me so waʼahono dödö hegöi falöʼametaʼuö* sandrohu faʼaurigu.”+
