Yesaya 46:1-13
46 Ituhi danö Mbeli,+ ifaöndrö ia Nebo.
Labeʼe ba hulu gurifö sonoro nadu andrö khöra,+Hulö noro sabua nibeʼe ba hulu gurifö si tebai.
2 Faoma lafaöndrö ira ba latuhi danö;Tebai lalumöʼö noro* andrö,Ba laʼoloiʼö göi ira.
3 ”Mifondrondrongo niwaʼögu he yaʼami ngaʼötö Yakobo hegöi yaʼami si toröi moroi ba ngaʼötö ndraono Gizaraʼeli,+Si no uluʼi iʼotarai me tumbu ba si no urorogö iʼotarai ba dalu ninania.+
4 Lö irai tebulö ndraʼo irugi atua ndraʼugö;+Hasambalö urorogö* ndraʼugö irege afusi mbu högömö.
Uʼohe ndraʼugö, urorogö ba utoloʼö simane si no ufalua ba zilalö.+
5 Haʼökhö mifaomagö ndraʼo, miʼamaedolagö mazui mifaedogö,+Ba wangoromaʼö wa fagölö ndraʼaga?+
6 So niha sameʼe baero anaʼania moroi ba tasi;Lasuʼa wiröra.
Lagazi niha samöbözi loga, ba ifazökhi daʼö tobali lowalangira.+
Aefa daʼö, latuhi danö ba mangalulu ira.+
7 Labeʼe ba galisira;+Laʼonoro ba laʼohe ba nahiania, ba lafezizio ba daʼö,Lö findra ia moroi ba nahiania,+Lö hadöi itema lira me muʼao ira khöniaBa tebai iʼefaʼö ira moroi ba wamakao.+
8 Hasambalö barani ami, na mitörö tödömi daʼa.
He yaʼami niha samadaö, mitanö ba dödömi daʼa.
9 Mitörö-törö tödömi hadia zalua ba zilalö*Lö hadöi Lowalangi tanö böʼö baero ndraʼo.
Yaʼo Lowalangi, ba lö hadöi simane yaʼo.+
10 No iʼotarai ba wamobörö ufatunö lua-luania,Ba iʼotarai me mböröta no uʼombakhaʼö ngawalö hadia zi lö nasa alua.+
Umane, ’Hasambalö alua gohitö dödögu,*+Ba hasambalö ufalua gofu hadia ia zomasido.+
11 Ukaoni samösa moroi ba soi sabölö aröu ba wamalua ohitö dödögu,+Tohare ia moroi ba gatumbukha luo+ simane fofo si manga nagole.
Hasambalö ufalua gofu hadia ia gohitö dödögu.*
Ba fefu zi no uʼera-era hasambalö uʼoʼozui.+
12 Mifondrondrongo khögu he yaʼami sagabeʼe högö,*He yaʼami si no aröu ba zindruhu.
13 No ahatö khögu waʼatulö;Lö aröu.
Lö ahou wangorifi andrö moroi khögu.+
Ubeʼe dania wangorifi ba Ziona, ba lakhömi ba ndraono Gizaraʼeli.”+
Nisura ba gahe zura
^ Yaʼia daʼö adu nibeʼe ba hulu gurifö.
^ Sin.: ”uluʼi”.
^ Sin.: ”hadia zi oföna alua”.
^ Mazui ”gangetulagu; nifakhoi dödögu”.
^ Mazui ”gangetulagu; nifakhoi dödögu”.
^ Mazui ”sabeʼe tödö”.
