Yesaya 7:1-25
7 Ba götö Gahasi+ ono Yotamo ono Usia razo Yehuda, möi Resino razo Siria hegöi Feka+ ono Remalia razo ndraono Gizaraʼeli ba wanuwö Yeruzalema, hizaʼi lö faʼabölönia* ba worabu banua andrö.+
2 Aefa daʼö, so duria nifaʼema ba ngaʼötö Dawido, ösinia: ”No fao niha Ziria ba niha Geferai.”
Ba manizi dödö Gahasi awö dödö nono mbanuania börö waʼataʼu, hulö simane hogu geu nifaheu nangi ba gatua.
3 Imane Yehowa khö Yesaya, ”Miʼaeʼe onou matua sotöi Seari-yasubi*+ ba wamalukhaisi Gahasi. So ia ba zinga mbaʼa tanö yawa+ si so ba zinga lala sasese latörö niha weʼamöi manasa.
4 Fatunö khönia, ’Honogö manö ndraʼugö. Böi aombö dödöu. Böi so khöu waʼataʼu ba nono Remalia+ hegöi Resino razo Siria. Hewaʼae aukhu dödöra, hizaʼi yaʼira andre hulö mbalö geu si dua rozi sanimbo-nimbo.
5 No mamagölö niha Ziria, Eferai hegöi ono Remalia ba wolawa yaʼugö. Lamane,
6 ”Aine, datasuwö Yehuda. Aefa daʼö, tafakiko* ba tadudugö. Tafataro nono Dabeʼeli tobali razonia.”+
7 ”’Daʼa niwaʼö Lowalangi Yehowa Fondrege Zalawa:
”Lö aʼozu daʼö;Ba lö alua.
8 Högö niha Ziria yaʼia daʼö Damaseko,Ba högö Ndramaseko yaʼia daʼö Resino.
Tedudugö Geferai ha ba zi 65 fakhe,Ba lö saʼae tobali ira si sambua soi.+
9 Högö Geferai yaʼia daʼö Samaria,+Ba högö Zamaria yaʼia daʼö ono Remalia.+
Na lö khömi famati saro,Lö tola teʼorifi ami.”’”
10 Fahuhuo nasa Yehowa khö Gahasi,
11 ”Andrö dandra khögu, Yehowa Lowalangiu.+ Tola abakha sibai dandra andrö simane Lewatö* mazui alawa simane banua si yawa.
12 Hizaʼi imane Ahasi, ”Lö omasido uʼandrö dandra. Lö göi omasido utandraigö Yehowa.”
13 Imane Yesaya, ”He ngaʼötö Dawido, uʼandrö khöu fondrondrongo. Hadia ambö nasa khöu ba wanandraigö faʼebolo dödö niha? Hadia ötandraigö nasa göi waʼebolo dödö Lowalangi?+
14 Börö daʼö, ibeʼe dania dandra khömi Yehowa: Manabina dania ndra alawe sawuyu-wuyu* ba iʼadonogö nono matua.+ Ibeʼe töinia Emanueli.*+
15 Mentega faoma wewani dania gö nono andrö, irege iʼila itimbagö zi lö sökhi ba ifili zi sökhi.
16 Fatua lö iʼila ono andrö hewisa wanimbagö si lö sökhi hegöi ba wamili si sökhi, hasambalö muröi dania mbanua nifatörö razo si darua andrö niʼataʼufimö.+
17 Ilulu ndraʼugö Yehowa, soimö hegöi ösi nomo namau ba wanaögö ngaluo si lö sökhi si lö irai alua iʼotarai me ifabali ia Eferai moroi ba Yehuda.+ Ifatenge dania razo Asiria ba wanuwö yaʼugö.+
18 ”Ba ngaluo daʼö, fawikho-wikho Yehowa ba wogaoni ngalö-ngalö moroi ba gelea Nungo Nidanö Nilo ba Miserai, si so ba zaröu hegöi wani moroi ba mbanua Asiria.
19 Tohare ba toröi ira ba ndraso sabakha, ba gotalua hili andrö awö ba gotalua ndruʼu sodoi hegöi ba nahia wangai idanö maʼafefu.
20 ”Ba ngaluo daʼö, iʼogunaʼö Yehowa rosö fanöwö nisewania moroi ba Nungo Nidanö Oiferati yaʼia daʼö razo Asiria,+ ba wanöwö bu högö, bu gahe hegöi bu gambi maʼafefu.
21 ”Ba ngaluo daʼö, awai zauri ha sageu zawi sawuyu-wuyu ba dua ngaʼeu mbiri-biri.
22 Ba börö me fahöna susu ba daʼö, mentega göra. Fefu zi toröi ba soi daʼö, mentega faoma wewani mbalazora.
23 ”Ba ngaluo daʼö, ha duʼu sodoi ba oʼo zi tumbu ba nahia wananö töla nagu si 1.000 ba 1.000 loga firö mbölinia.
24 Niha si möi ba daʼö laʼohe wana sinali ba ono wana, börö me afönu dania duʼu sodoi hegöi oʼo nahia daʼö.
25 Fefu hili si no toʼölö lafaku me mböröta, lö barani öfahatö ndraʼugö börö me oya ndruʼu sodoi hegöi oʼo. Fefu daʼö tobali nahia zawi wemanga duʼu ba tobali tanö nihundra-hundra mbiri-biri.”
Nisura ba gahe zura
^ Mazui te ”lö faʼabölö khöra”.
^ Eluahania ”Ha Sambua Ngawawa Zangawuli”.
^ Mazui te ”tafetaʼu”.
^ Mazui ”Syeol”. Faigi Geluaha Ngawua Wehede.
^ Mazui ”nono alawe”.
^ Eluahania ”Fao Khöda Lowalangi”.
