Yesaya 8:1-22
8 Imane khögu Yehowa, ”Halö sambua gara wanura sebua.+ Si fao tawa fena si toʼölö,* sura ba gara andrö ’Mahe-sala-khasi-baza’.*
2 Ufaduhuʼö daʼö si fao tawa fena ba zanehe ndra samaduhuʼö si lö faröi sotöi Ere Uria+ hegöi Zakharia ono Yerebekhia.”
3 Aefa daʼö, orudu ndraʼo khö ndra alawe samaʼeleʼö andrö,* manabina ia ba tumbu khönia nono matua.+ Imane khögu Yehowa, ”Beʼe töinia Mahe-sala-khasi-baza.
4 Fatua lö nasa iʼila imane ono andrö, ’He Pa!’ hegöi ’He Ma!’, fefu harato Ndramaseko awö nirabu ba Zamaria, teʼohe föna razo Asiria.”+
5 Ifuli zui fahuhuo khögu Yehowa,
6 ”Börö me latimbagö ira niha daʼa nidanö Ziloa*+ sahono-hono na mangele,Ba omasi ira Resino hegöi ono Remalia,+
7 Hiza! Ibözi ira YehowaBa iʼogunaʼö Nungo Nidanö Oiferati sebua ba sabölö-bölö,Yaʼia daʼö razo Asiria+ awö waʼabölönia maʼafefu.
Ebua sibai nidanö andrö irege inönöi fefu lala nidanö,Italuʼi ngöfi,
8 Ba irugi danö Yehuda.
Hulö molö sebua irugi falawa bagi;+Ibalugö soimö afinia si no ibologö,Yaʼugö Emanueli!”*+
9 He yaʼami ngawalö soi, mifakao ira hizaʼi tehori ami.
Mifondrondrongo yaʼami si sagörö tanö!
Mifaʼanö ami ba wasuwöta,* hizaʼi hasambalö tefakiko ami!+
Mifaʼanö ami ba wasuwöta, hizaʼi hasambalö tefakiko ami!
10 Mifazökhi dandrawa, hizaʼi lö aʼozu!
Miwaʼö gofu hadia manö, hizaʼi lö alua,Börö me fao khöma Lowalangima!*+
11 Igogohe ndraʼo tanga Yehowa sabölö, ba fahuhuo ia khögu ba wamangelama yaʼo enaʼö lö utörö lala soi daʼa. Daʼa niwaʼönia:
12 ”Na lawaʼö soi daʼa mamagölö ita, böi miwaʼö mamagölö ita!
Böi miʼataʼufi hadia niʼataʼufira.
Böi manizi ami börö daʼö.
13 Ha Yehowa samatörö saradadu zorugo awai niʼamoniʼömi,+Yaʼia zinangea mifosumange;Yaʼia zinangea miʼataʼufi.”+
14 Tobali ia naha niʼamoniʼö,Hizaʼi tobali ia kara nitendre,Tobali ia kara sangekhugö+ si dombua ösi nomo ndraono Gizaraʼeli,Ba tobali lakhö hegöi tandrawaBa nono mbanua Yeruzalema.
15 Ato zanendre, salabu ba sesokho;Ba teʼala ira ba laraʼu.
16 Duhö wehede si no musura* andrö;Fotandro goroisa* daʼö ba gotalua ndra nifahaʼögu!
17 Lö uböhöli ba wombaloi* Yehowa,+ si no maminiʼö bawania ba ngaʼötö Yakobo.+ Hasambalö manötöna ndraʼo khönia.
18 Hiza! Yaʼe ndraʼo hegöi iraono nibeʼe Yehowa khögu.+ Yaʼaga dandra+ awö zahöli-höli dödö ba ndraono Gizaraʼeli nibeʼe Yehowa samatörö saradadu zorugo, si toröi ba Hili Ziona.
19 Na lawaʼö khömi, ”Misofu ba niha sogaoni bekhu zi mate mazui khö ndra samaʼeleʼö si fangöngö-ngöngö ba sametu-metu bewe,” hadia mifalua daʼö? Hadia tenga khö Lowalangira menaʼö manofu zi sambua soi? Hadia hasambalö manofu ira ba niha si mate sanandrösa ba niha sauri?+
20 Sinangeania menaʼö laʼalui wanuturu lala moroi ba goroisa hegöi ba wehede si no tesura* andrö!
Lö hadöi khöra haga*+ na lö fahuhuo ira moloʼö fehede daʼa.
21 Latörö soi daʼö si fao fangarö-ngarö ba faʼolofo.+ Börö waʼolofo ba fönu, andrö wa laʼelifi razora hegöi Lowalangira me lafaöga högöra ba wamaigi banua si yawa.
22 Aefa daʼö, lafaigi zi so ba gulidanö, ba niʼilara ha famakao ba faʼogömi, fangarö-ngarö ba faʼabu dödö, faʼogömi si lö haga.
Nisura ba gahe zura
^ Te daʼö geluahania ”Aliokö Weʼamöi ba Gahulua, Aliokö Weʼamöi ba zi No Murabu”.
^ Sin.: ”Si fao tawa fena moroi ba niha”.
^ Yaʼia daʼö foʼomo Yesaya.
^ Siloa yaʼia daʼö lala nidanö.
^ Mazui ”Miʼogunaʼö mböbö löwi”.
^ Mazui ”mufaduhuʼö”.
^ Mazui ”wanuturu lala”.
^ Mazui ”Soroi ba dödö udöna-döna khö”.
^ Mazui ”mufaduhuʼö”.
^ Sin.: ”faʼamoluo”.
