Yobi 1:1-22
1 So samösa ndra matua si toröi ba danö Usi, töinia Yobi.*+ Niha satulö ia ba sadölö tödö,*+ sangataʼufi Lowalangi ba lö ifalua zi lö sökhi.+
2 Dafitu khönia nono matua ba datölu nono alawe.
3 So 7.000 ngaʼeu mbiri-birinia, 3.000 ngaʼeu gondra, 1.000 ngaʼeu* zawi, ba 500 ngaʼeu galide.* Ato göi zawuyunia. Börö daʼö, ha yaʼia wondrege zi kayo ba nifosumange ba gotalua niha sato ba Gatumbukha.
4 No toʼölö ba ndraononia matua fatome ira khö dalifusöra ba faoma lafalali-lali wamalua daʼö. Lakaoni göi dalifusöra alawe si datölu wefao khöra ba wemanga ba mamadu.
5 Ero awai lafalua watomesa ba nomo si sambua, iʼandrö khöra Yobi enaʼö laʼondrasi ia ba iʼamoniʼö ira. Ihulö wongi wemaoso ba wameʼe sumange nitunu+ soguna ba ndraononia ero samösa. Imane Yobi, ”Alai na no lafalua horö ba laʼelifi Lowalangi bakha ba dödöra.” Daʼö zi toʼölö ifalua Yobi.+
6 Ba me no irugi inötö, möi ndraono Lowalangi*+ ba wangondrasi Yehowa,+ ba tohare+ göi Zatana.+
7 Ba manofu Yehowa khö Zatana, ”Hezo öʼotarai?” Imane Satana khö Yehowa, ”Awena sibai mangawuli ndraʼo wamasui ulidanö.”+
8 Imane Yehowa khö Zatana, ”Hadia no anehe ndraʼugö genonigu Yobi? Lö hadöi niha simane yaʼia ba gulidanö. Niha satulö ba sadölö tödö,*+ sangataʼufi Lowalangi ba lö ifalua zi lö sökhi.”
9 Imane Satana khö Yehowa, ”Hadia iʼataʼufi göi ndraʼugö Yobi na lö böli gölönia?+
10 Hadia tenga no ölumöʼö* ia barö daʼa,+ simanö göi nösi nomonia ba fefu gokhötania? Öfahowuʼö halöwö dangania+ ba monönö waʼoya gurifönia.
11 Iadaʼa, oroʼö dangau ba halö fefu gokhötania. Hasambalö ikaoni ba mbawau wa iʼelifi ndraʼugö.”
12 Imane Yehowa khö Zatana, ”Tola öfalua zomasi dödöu ba gokhötania,* hizaʼi böi babaya ia!” Aefa daʼö, mofanö Zatana föna Yehowa.+
13 Samuza maʼökhö, me manga-manga ba mamadu agu ndraono Yobi ba nomo gaʼara siaʼa,+
14 tohare samösa niha si möi mangombakha khö Yobi, ”Me manguhundra tambu laza zawi ba manga duʼu galide ahatö ba daʼö,
15 tohare niha sanuwö moroi ba Zeba. Lahalö fefu gurifö daʼö ba labunu ndra sawuyu faoma föda. Hatö yaʼo zoloi ba wangombakha khöu.”
16 Lö nasa sawai fahuhuo ia, ba no tohare danö böʼö ba wangombakha, ”No aekhu galitö moroi khö Lowalangi* ba mbanua si yawa ba ahori akhozi mbiri-biri awö ndra sawuyu! Hatö yaʼo zoloi ba wangombakha khöu.”
17 Lö nasa sawai fahuhuo ia, ba no tohare danö böʼö ba wangombakha, ”Tölu ngawawa niha Galedaia+ zi tohare ba no larabu fefu gondra. Labunu göi ndra sawuyu faoma föda. Hatö yaʼo zoloi ba wangombakha khöu.”
18 Lö nasa sawai fahuhuo ia, ba no tohare danö böʼö ba wangombakha, ”Manga-manga ba mamadu agu ndraonou matua hegöi onou alawe ba nomo gaʼara siaʼa.
19 Ba zi lö mudöna-döna, alua nangi sabölö-bölö moroi ba danö si mate ba göna nomo andrö. Adudu nomo daʼö ba ilangögö ndraonomö irege mate ira fefu. Hatö yaʼo zoloi ba wangombakha khöu.”
20 Mozizio Yobi, isika nukhania ba itöwö fefu mbu högönia. Aefa daʼö, ituhi danö
21 imane,
”Lö hadöi niʼohegu hadia ia me tumbu ndraʼo ba dalu ninagu,Ba lö hadöi göi niʼohegu dania na mangawulido.+
Yehowa zameʼe+ ba Yehowa zangai.
Yalötebulö tesuno döi Yehowa.”
22 Hewaʼae alua fefu daʼö khö Yobi, lö ifalua horö ba lö itahigö Lowalangi.*
Nisura ba gahe zura
^ Te eluahania ”Tandrösa Watiusa”.
^ Mazui ”ba si lö sinegu”.
^ Sin.: ”500 fasa”.
^ Sin.: ”galide si alawe”.
^ Ngawua wehede ba li Heberaiʼo eluahania ira malaʼika Lowalangi.
^ Mazui ”ba si lö sinegu”.
^ Sin.: ”no öfobaʼa-baʼa”.
^ Mazui ”Ba dangau so fefu gokhötania”.
^ Mazui te ”No alua gari mbanua”.
^ Mazui ”lö ifobahulu Lowalangi ba zi lö atulö”.
