Yobi 2:1-13
2 Ba me no irugi inötö, möi ndraono Lowalangi*+ ba wangondrasi Yehowa+ ba tohare göi Zatana möi iʼondrasi Yehowa.+
2 Ba manofu Yehowa khö Zatana, ”Hezo öʼotarai?” Imane Satana khö Yehowa, ”Awena sibai mangawuli ndraʼo wamasui ulidanö.”+
3 Imane Yehowa khö Zatana, ”Hadia no anehe ndraʼugö genonigu Yobi? Lö hadöi niha simane yaʼia ba gulidanö. Niha satulö ba sadölö tödö,*+ sangataʼufi Lowalangi ba lö ifalua zi lö sökhi. Lö ibulöʼö waʼatulönia ba no aro dödönia+ hewaʼae na öfarou ndraʼo enaʼö ufaʼala ia+ ba zi lö börö.”
4 Imane Satana khö Yehowa, ”Uli wangali guli. Itehegö gofu hadia zi so khönia niha asala lö mate ia.
5 Iadaʼa, oroʼö dangau ba fakao mbotonia.* Hasambalö ikaoni ba mbawau wa iʼelifi ndraʼugö.”+
6 Imane Yehowa khö Zatana, ”Tola öfalua zomasi dödöu khönia,* hizaʼi böi bunu ia!”
7 Aefa daʼö, mofanö Zatana föna Yehowa ba ifakao Yobi faoma faosa sabölö-bölö,+ iʼotarai narö kahe numalö ba galizuzu.
8 Ihalö gakhökhöla mbowoa tanö Yobi ba wogaʼa-gaʼa ösinia ba modadao ia ba dete nawu.+
9 Imane khönia foʼomonia, ”Hezo irugi waʼaro dödöu ba wangoromaʼö faʼalöfaröimö? Elifi manö Lowalangimö ba yamateʼö!”
10 Hizaʼi imane khönia Yobi, ”Hulö wehede ndra alawe si lö tödö wehedemö. Hadia ha si sökhi manö nitemada moroi khö Lowalangi sindruhu ba lö omasi ita tatema zi lö sökhi?”+ Hewaʼae alua khö Yobi daʼö fefu, ba lö ifalua horö ba wehedenia.+
11 Datölu zi fahuwu khö Yobi no larongo wamakao salua khönia. Tohare ira moroi ba nahiara zamösana, yaʼia daʼö Elifasi+ niha Demano, Bilidado+ niha Zua,+ ba Sofari+ niha Naʼama. No hasara dödöra ba wamaigi Yobi ba wangoromaʼö faʼahakhö dödö ba larara dödönia.
12 Me laʼila Yobi moroi ba zaröu, ba lö saʼae laʼila haniha ia. Laduhugö wege-ege ba lasika nukhara, aefa daʼö lafazawili gawu-gawu ba dalu mbanua ba labeʼe ba högöra.+
13 Fao ira khö Yobi wedadao tou ba danö fitu ngaluo ba fitu wongi. Lö hede-hedera khönia börö me laʼila wa abölö-bölö sibai wamakao si göna khönia.+
Nisura ba gahe zura
^ Ngawua wehede ba li Heberaiʼo eluahania ira malaʼika Lowalangi.
^ Mazui ”ba si lö sinegu”.
^ Mazui ”fakao döla awö nagolenia”.
^ Mazui ”Ba dangau so ia”.
