Yobi 20:1-29
20 Imane Sofari+ niha Naʼama andrö,
2 ”Alangu dödögu irege lö sökhi-sökhi wangera-ngeragu.
Daʼö mbörö wa ubeʼe wanema li.
3 Urongo degu-tegu sangoʼaya yaʼo;Ba faʼaboto ba dödö zamarou yaʼo ba wameʼe fanema li.
4 Hasambalö öʼila hadia wehedegu andre,Daʼa zalua iʼotarai me tewöwöi niha ba gulidanö,*+
5 Lö arara waʼomuso dödö niha si lö sökhi,Ba ha sabata waʼomuso dödö niha si lö faʼaboto ba dödö khö Lowalangi.*+
6 Hewaʼae irugi mbanua si yawa faʼabölöniaBa fatimba ba högönia lawuo,
7 Hasambalö tehori ia simane si taʼunönia.
Niha sasese mangila yaʼia lamane, ’Hezo so ia?’
8 Taya ia simane fangifi ba lö lasöndra ia saʼae.
Laʼolifugö ia simane angilata ba zi bongi.
9 Hörö sangila yaʼia mböröta ba lö saʼae laʼila ia,Ba lö göi ifaigi ia nahiania.+
10 Laʼandrö waʼahakhö dödö iraononia ba niha si numana,Ba tangania samösa zamuli harato si no irai irabu.+
11 Abölö ia simane me awuyu-wuyu ia mböröta,Hizaʼi, mate ia ba fao khönia waʼabölönia andrö.
12 Ami ba mbawania waʼalösökhi.
Ibeʼe ba narö lelania.
13 Lö iböhöli wemanga ba lö itiboʼö.
No itaha manö ba mbawania.
14 Aisö me ofeta ba mbetuʼania gö daʼö.
Hulö mbiso* gulö daritö.
15 Itölö waʼakayo, hizaʼi ifuli iʼutaʼö.
Ifuli iheta ba mbetuʼania Lowalangi.
16 Isisiö mbiso gulö daritö.
Mate ia börö me no idou ia ulö sobiso.
17 Lö iʼila na so wewani awö mentega sangeleSimane ungo nidanö sabölö-bölö.
18 Ifangawuli dania gama-gama nisöndrania ba lö iʼogunaʼö.
Lö isöndra waʼomuso dödö ba harato nitemania ba waʼerege dödönia.+
19 Börö me ifakao ba lö iʼameʼegö tödö niha si numana.
Irabu nomo si tenga nifazökhinia.
20 Hizaʼi, lö isöndra waʼahono dödö.
Lö möi fangorifinia haratonia.
21 Lö hadöi saʼae sinangea irabu.
Daʼö mbörö wa lö anau gölö waʼakayonia.
22 Me no fahöna waʼakayonia, göna ia faʼaombö dödö.
Ilangögö ia famakao sabölö-bölö.
23 Me ifoʼösi dalunia,Ifatenge hola-hola wönunia Lowalangi,Ihawui ia ngawalö zi lö sökhi.
24 Na moloi ia ba wangöna siʼöli,Ba ono wana sinali nifazökhi moroi ba tembaga zanölaʼö yaʼia.
25 Ideha nono wana si no tetaru ba hulunia,Fangöna si takile si no tetaru ba gawökhunia.
Ataʼu sibai ia.+
26 Taya waʼakayonia ba zogömi-gömi.
Alitö zi manga yaʼia hewaʼae lö nifewuaʼö niha.
Göna famakao niha si toröi ba nosenia.
27 Talu mbanua zamatunö olalöwania,Ba maoso gulidanö ba wolawa yaʼia.
28 Ibözini nomonia molö.
Ifatenge nidanö sabölö-bölö Lowalangi ba ngaluo wönunia.
29 Daʼö gurakha nitema niha si lö sökhi moroi khö Lowalangi.
Daʼö gondröita nihonogöi Lowalangi khönia.”
Nisura ba gahe zura
^ Mazui ”niha gulidanö; Adamo”.
^ Mazui ”niha sondröi sindruhu”.
^ Mazui ”gawökhu”.
