Yobi 5:1-27
5 ”Tandraigö ao! Hadia so zanema liu?
Haniha malaʼika niʼangaröfiliu ba wangandrö tolo?
2 Tola manö mate niha si bodo ba waʼafökhö dödö,Ba mate niha sadogo-dogo fangera-ngera börö waʼolohunia.
3 No irai uʼila niha si bodo sanöndra faʼakayo,Ba zi lö mudöna-döna teʼelifi nahia si toröi yaʼia.
4 Maʼifu lö telumöʼö ndraononia;Laʼailasi ira ba mbawa göli+ ba lö sanolo.
5 Niha solofo zi manga basitönia,Nihalöra moroi ba gotalua ndruʼu sodoi.
Larabu fefu gama-gamara.
6 Lö tumbu zi lö sökhi moroi ba gawu-gawu.
Ba lö göi tumbu gabula dödö moroi ba danö.
7 Lö manö aefa gabula dödö ba waʼauri niha,Simane faʼatokana nono galitö.
8 Na yaʼo ndraʼugö, uʼandrö wanolo khö Lowalangi,Ba utouʼö ba dangania gamadöniwagu,
9 Khö zamalua ngawalö zahöli-höli dödö ba si tebai ikhamö era-era niha,Hegöi ngawalö zahöli-höli dödö si tebai muʼerai.
10 Itorugö deu ba danö,Ihawui mbenua misa faoma idanö.
11 Iʼalawaʼö niha nihöndrögö.
Iʼalawaʼö niha sabu tödö enaʼö teʼorifi ira.
12 Ifakiko dandrawa nifazökhi niha sonekhe,Irege lö mofozu halöwöra.
13 Ibeʼe dandrawa ba niha sagatua-tua ba waʼonekhera samösa,+Irege lö aʼozu niʼera-era niha sonekhe.
14 Ihawui ira faʼogömi-gömi ba zi maʼökhö.
Labayaisi lalara ba zi laluo hulö na no ogömi.
15 Iʼefaʼö niha moroi ba wehede si lö sökhi si no amaedola gari,Iʼefaʼö niha si numana ba danga niha sabölö,
16 Irege so dötönafö ba niha si lö fanötöna,Hizaʼi laduhö mbawa niha si lö atulö.
17 Omuso dödö zanöndra fotu moroi khö Lowalangi.
Börö daʼö, böi timbagö wamahaʼö* moroi khö Wondrege Zabölö!
18 Börö me tola ifesokho, ba tola idalu-daluni;Tola ifatö, ba tola ifadöhö faoma tangania.
19 Iʼefaʼö dania ndraʼugö ba wamakao si önö ngawalö.
Lö dania göna khöu wamakao si fitu.
20 Iʼefaʼö* ndraʼugö moroi ba waʼamate sagötö mbaŵa lofo,Ba moroi ba mbawa wöda sagötö wasuwöta.
21 Ilumöʼö dania ndraʼugö moroi ba lela samesokho si hulö mbözi-bözi.+
Lö dania ataʼu ndraʼugö na tohare wangohori.
22 Maʼiki dania ndraʼugö ba waʼadudu hegöi ba waʼolofo.
Lö dania ataʼu ndraʼugö ba gutu ndruʼu ba gulidanö.
23 Lö dania ifakao ndraʼugö kara* si so ba mbenua,Ba fahuwu dania khöu gurifö samuʼi.
24 Öʼila dania wa lö hadöi ametaʼuö ba nosemö.*
Na öfareso mbenua soduʼu khöu, ba lö si taya guriföu.
25 Oya dania nonou.
Simane faʼoya ndruʼu dania ngaʼötöu ba danö.
26 Lö alö waʼabölöu ba ginötö mate ndraʼugö,Simane daha gandru na mubasi ba ginötönia.
27 Fefu daʼö no mafareso, ba daʼö zindruhunia.
Fondrondrongo ba beʼe ba dödöu.”
Nisura ba gahe zura
^ Mazui ”degu-tegu”.
^ Mazui ”Ihöli”.
^ Mazui ”Fawuʼu li khöu gara”.
^ Sin.: ”wa faʼatulö andrö zi tobali oseu”.
