Yobi 9:1-35
9 Imane Yobi,
2 ”Aboto ba dödögu daʼö.
Hizaʼi, hewisa wa tola atulö niha föna Lowalangi?+
3 Na so niha somasi fadaʼawa khö Lowalangi,*+Tatu lö laʼila labeʼe wanema li hewaʼae ha sambua wanofunia moroi ba zi saribu.
4 Atua-tua ia ba ebua kuasonia.+
Haniha zi tola molawa yaʼia ba lö mesokho?+
5 Ifawuʼa hili-hili ba lö sangila.
Oi telaula fefu hili daʼö börö wönunia.
6 Ifadögö gulidanö,Irege modögö fefu duwu-tuwunia.+
7 Yaʼia zangumaʼö ba luo enaʼö lö mohaga,Ba sombaʼagö haga ndröfi.*+
8 Yaʼia samösa zamologö talu mbanua+Ba mowaö-waö ia ba mbade sebua.+
9 Yaʼia zomböi orudua ndröfi As,* Kesil* hegöi Kima,*+Simanö göi gorudua ndröfi ba dalu mbanua tanö raya.*
10 Ifalua ngawalö zahöli-höli dödö ba si lö ikhamö fangera-ngera niha,+Ngawalö zahöli-höli dödö si tebai muʼerai.+
11 Ihulö manö ndraʼo ba lö uʼila ia;Itörö fönagu ba lö uʼila haniha ia.
12 Na so nirabunia, haniha zi tola molawa?
Haniha zi tola manofu hadia nifaluania?+
13 Lö itaha wönunia Lowalangi.+
Latuhi danö fönania ira sanolo Rakhaba,*+
14 Mendrua manö na utema linia!
Uhaogö sibai wamili ngawua wehedegu na fabuʼa ndraʼo khönia.
15 Hewaʼae atulö nifaluagu, ba lö utema linia.+
Ha faʼahakhö dödö zi tola uʼandrö khö zanguhuku yaʼo.*
16 Na ukaoni ia, hadia itema ligu?
Moloʼö yaʼo, lö ifondrondrongo wehedegu,
17 Irasa ndraʼo ba mbadeBa oya ifesokho ndraʼo lö börö.+
18 Lö itehegö khögu mohanu-hanu.
Iʼabusoiʼö ndraʼo abula dödö.
19 Sanandrösa ba waʼabölö, yaʼia wondrege zabölö.+
Sanandrösa ba waʼatulö imane, ’Haniha zi tola fabuʼa khögu?’
20 Hewaʼae atulö nifaluagu, ba fasala ndraʼo iwaʼö bawagu.
Hewaʼae na lö fasala* ndraʼo, ifaduhuʼö wa fasala ndraʼo.
21 Hewaʼae na lö fasala* ndraʼo, lö uʼila hadia zalua khögu.
Fatuwu khögu* waʼaurigu andre.
22 Fagölö manö fefu. Andrö umane,’Fagölö-gölö ihori ira Lowalangi, he niha si lö fasala* hegöi niha si lö sökhi.’
23 Na mate niha sato ba zi lö arara börö molö sebua,Maʼiki ia ba niha si lö sala si no aetu fanötöna.
24 No ibeʼe gulidanö ba niha si lö sökhi.+
Ibalugö hörö* ndra sanguhuku khönia.
Haniha nasa na tenga yaʼia?
25 Abölö alio numalö waʼaurigu moroi ba zi fagohi,+Numalö manö ba lö irai urasoi zi sökhi.
26 Numalö waʼaurigu simane tundraha salio,*Simane moyo sanaruʼö baginia ba wondraʼu ahulua.
27 Na umane, ’Uʼolifugö dania waʼabu dödögu,Lö ufangerau mbawagu saʼae ba uʼomusoiʼö dödögu,’
28 Lö tebato waʼataʼugu börö waʼafökhö zalua khögu.+
Uʼila wa fasala ndraʼo ba wamaigimö.
29 Hasambalö wa fasala ndraʼo lawaʼö.
Hadia gunania wa uʼeregesi tödö wabuʼa-buʼasa?+
30 Na mondri ndraʼo ba esi si no tobali idanö,Ba usasai dangagu faoma sabu,*+
31 Öhöndrögö ndraʼo ba getuna,Irege nukhagu manö ba anuzu dödönia ndraʼo.
32 Börö me tenga niha ia simane yaʼo fatola utema liniaBa fao ndraʼaga föna zanguhuku.+
33 Lö niha si tola mangai angetula* khöma,Si tobali sanguhuku khöma.
34 Na ibato wamöbözi yaʼo,*Ba lö ifetaʼu ndraʼo ba zi hokha mbugu,+
35 Lö ataʼudo fahuhuo khönia,Börö me lö irai ataʼu ndraʼo khönia.
Nisura ba gahe zura
^ Mazui ”molohe Lowalangi föna zanguhuku”.
^ Sin.: ”Ba samotandro zi fasui döfi”.
^ Sin.: ”ba mbateʼe tanö bakha si so tanö raya”.
^ Te gugus Kartika (Pleiades) si so ba gorudua ndröfi Taurus.
^ Te orudua ndröfi Belantik (Orion).
^ Te orudua ndröfi Mberua Sebua (Ursa Mayor).
^ Te urifö sebua sibai si so ba nasi.
^ Mazui te ”khö zi faʼudu khögu föna zanguhuku”.
^ Mazui ”lö si faröi”.
^ Mazui ”lö si faröi”.
^ Mazui ”Utimbagö”.
^ Mazui ”si lö faröi”.
^ Sin.: ”Ibalugö mbawa”.
^ Mazui ”tundraha nifazökhi moroi ba döla zukhu”.
^ Mazui ”asio alkali; idanö nawu”.
^ Mazui ”mangagö talu gotalua”.
^ Sin.: ”Na iheta ziʼonia khögu”.
