Yoeli 1:1-20
1 Daʼa daromali Yehowa nifaʼemania khö Yoeli* ono Wetueli,
2 ”He yaʼami sondröniaʼö,* mifondrondrongo.
He yaʼami ono mbanua soi daʼa maʼafefu,* miʼameʼegö tödö.
Hadia no irai alua zimane daʼa ba götömi,Mazui ba götö ndra tuami?+
3 Tutunö daʼa ba ndraonou.
Akha göi latutunö daʼö ba ndraonora,Ba akha latutunö daʼö iraonora ba ngaʼötöra.
4 Sinanö si lö ahori iʼa tamo samufu, iʼa dania tamo sanuwö,+Si lö iʼa tamo sanuwö, iʼa tamo si lö afi,Ba si lö iʼa tamo si lö afi, iʼa tamo soluʼa-luʼa.+
5 Mifaoso, he yaʼami si mabu-mabu+ ba miʼeʼe!
Miduhugö weʼe, he yaʼami samadu-madu agu!
Börö me no muhalö ba mbawami nagu sami andrö.+
6 No tohare soi sabölö ba si tebai muʼerai ba wanuwö soigu.+
Ifönia simane ifö zingo,+ ba simbinia simane simbi zingo.
7 Ifakiko danömö nagu khögu.
Hatö tuhe ara zi toröi;Iboʼa guli ba itiboʼö, irege afusi ndrahania.
8 Miduhugö wege-ege simane ono alawe sangogunaʼö nukha goni,Sabu tödö börö me no mate matuania.*
9 Lö hadöi saʼae sumange niʼa*+ hegöi sumange nibadu+ ba nomo Yehowa.
Abu dödö ndra ere sangai halöwö khö Yehowa.
10 No mufakiko mbenua ba abu dödö danö;+Börö me no mufakiko mbua zinanö, lö hadöi agu si bohou ba no ahori wanikha.+
11 Abu sibai dödö zohalöwö ba danö börö me lö hadöi bua nagu hegöi barli.
Iduhugö weʼe sohalöwö ba kabu nagu,Börö me no mufakiko fefu mbua zinanö.
12 Oköli döla nagu,Aleu döla ara.
Oköli fefu döla dalimo, khorema, apel,Hegöi eu tanö böʼö si so ba mbenua.+
Faʼomuso dödö niha no tobali fangaila.
13 He yaʼami ere, miʼogunaʼö nukha goni ba miʼabusi tödö.
He yaʼami sohalöwö ba naha wanunu sumange,+ miduhugö wege-ege.
He yaʼami sangai halöwö khö Lowalangigu, miʼae bakha. Miʼogunaʼö nukha goni bongi daʼa.
Börö me lö hadöi saʼae sumange niʼa*+ hegöi sumange nibadu+ ba nomo Lowalangi.
14 Beʼe gangombakhata ba wamalua fuasö ba falua gowasa si tohude.+
Owuloi fefu ndra sondröniaʼö awö nono mbanua soi daʼa,Ba nomo Yehowa Lowalangimi,+ ba miʼao ba wangandrö fanolo khö Yehowa.
15 Hiza! Tohare dania ngaluo andrö!
No ahatö sibai ngaluo Yehowa!+
Ba luo daʼö, ifalua wanguhukunia Lowalangi Fondrege Zabölö!
16 Hadia tenga no muhalö gö föna höröda,Hegöi faʼomuso dödö ba faʼahono dödö ba nomo Lowalangida?
17 No oköli fefu danömö zinanö barö dambila khöra.
No adudu halasa.
No tekiko naha wangiröʼö börö me no ahori oköli mbua zinanö.
18 Mangarö-ngarö gurifö!
Oi muzawili ngawawa zawi börö me lö hadöi duʼu ba mbenua!
Ba tefakao ngawawa mbiri-biri.
19 He Yehowa, muʼao ndraʼo khöu,+Börö me no iʼa alitö fefu ndruʼu si so ba mbenua,Ba no ahori akhozi fefu geu ba kabu.
20 Mangarö-ngarö gutu ndruʼu khöu,Börö me no oköli gelea nungo nidanö,Ba no iʼa alitö fefu ndruʼu si so ba mbenua.”
Nisura ba gahe zura
^ Eluahania ”Yehowa No Lowalangi”.
^ Mazui ”satua mbanua”.
^ Mazui ”niha gulidanö”.
^ Mazui ”woʼomonia”.
^ Mazui ”sumange bua nowi”.
^ Mazui ”sumange bua nowi”.
