Yoeli 2:1-32
2 ”Mifoli dorofe ba Ziona, torofe nifazökhi moroi ba dandru!+
Miʼoʼao tandra wasuwöta ba hili niʼamoniʼö andrö khögu.
Akha manizi fefu nono mbanua soi daʼa,*Börö me tohare luo Yehowa!+ No ahatö ngaluo andrö!
2 Daʼö ngaluo waʼogömi-gömi ba ngaluo waʼabongi,+Ngaluo waʼogömi-gömi ba safönu lawuo,+Hulö haga luo si tumbu si no tobaʼa ba hili-hili.
So dania sambua soi sebua ba sabölö,+Si lö irai so ba zilalö,Ba si lö irai so daniaIrugi götö-götö waʼara.
3 Iʼa alitö fefu zi so fönara,Ba hola-hola galitö zi manga si so furira.+
Tanö si so fönara hulö Kabu Edena,+Ba tanö si so furira hulö danö si mate,Lö hadöi si tola aefa moroi ba daʼö.
4 Hulö kudo zikhalara,Ba fagohi ira simane kudo wasuwöta.+
5 Hulö ruru gureta wasuwöta werurura me manaoka ira ba zuzu hili,+Simane hola-hola galitö si manga töla wakhe.
Hulö zaradadu sagabölö ira si möi fasuwö.+
6 Börö ira dania wa manizi-nizi ngawalö soi,Ba dozi niha oroma waʼataʼu ba zikhalara.
7 Hulö niha sagabölö ira weʼamöi fasuwö,Laʼanöisi dowa hulö zaradadu.
Latörö lalara zamösana,Ba lö laholeʼö ira ba lalara.
8 Lö latuliʼö nawöra,Latörö lalara zamösana.
Na so zaekhu tou si göna ono wana,Ba lö labato wofanö niha tanö böʼö.
9 Möi ira fasuwö bakha ba mbanua, ba fagohi ira ba dete göli.
Manöi ira ba mbumbu nomo ba latörö zandrela weʼamöi bakha hulö zanagö.
10 Modögö danö fönara ba mohisi mbanua si yawa.
Ogömi luo hegöi baŵa,+Ba taya haga ndröfi.
11 Muʼao Yehowa föna zaradadunia,+ börö me ato sibai zaradadunia andrö.+
Yaʼia zamalua taromalinia andrö ba waʼabölönia.
Abölö-bölö sibai ngaluo Yehowa andrö ba sahöli-höli dödö,+Haniha zi tola manaha?”+
12 Imane Yehowa, ”Iadaʼa, mifuli ami khögu soroi ba dödö,+Mifalua wuasö,+ miʼeʼe ba miʼangenu-ngenu.
13 Mireʼa dödömi+ tenga barumi,+Ba miʼangawuli khö Yehowa Lowalangimi,Börö me sahakhö tödö ia ba si sökhi böwö, lö alio mofönu+ ba fahöna waʼomasi si lö faröi,+Ba maniasa ia* sanandrösa ba wamakao andrö.
14 Maʼatö ibulöʼö gangetulania ba maniasa ia*+Ba ibeʼe khömi howu-howu,Enaʼö tola mibeʼe zumange niʼa* ba sumange nibadu khö Yehowa Lowalangimi.
15 Mifoli dorofe ba Ziona, torofe nifazökhi moroi ba dandru!
Miʼombakhaʼö ba wamalua fuasö ba mifalua gowasa niʼamoniʼö.+
16 Miʼowuloi nono mbanua andrö, miʼamoniʼö soi daʼö.+
Miʼowuloi ndra matua si no alawa döfi. Miʼowuloi ndraono awö nono sawuyu si lö aefa ba mbagi zusu.+
Akha möi baero marafule moroi ba mbateʼenia, ba akha möi baero niʼowalu moroi ba mbateʼenia.
17 Ba gotalua kaki lima ba naha wanunu sumange,+Akha ba daʼö meʼe ndra ere sangai halöwö khö Yehowa ba lamane,
’He Yehowa, hakhösi tödö nono mbanuau,Böi tehegö laʼoʼaya gokhötamö andrö,Ba böi tehegö lafatörö ira soi böʼö.
Böi tehegö lamane soi böʼö andrö, ”Hezo so Lowalangira?”’+
18 Ilumöʼö soinia Yehowa*Ba ahakhö dödönia nono mbanuania.+
19 Imane Yehowa ba nono mbanuania,
’Iadaʼa, uʼasogö khömi mbua zinanö, agu si bohou, ba fanikha,Ba abuso dania ami.+
Lö saʼae utehegö laʼoʼaya ami soi böʼö.+
20 Uʼaröuʼö khömi niha moroi yöu andrö,Ufazawili ira ba danö si mate ba si lö idanö.
Niha si teʼoli tanö fönara, laʼotahögö nasi tanö ba gatumbukha*Niha si teʼoli tanö furira, laʼotahögö nasi tanö ba gaekhula.*
Aböu oboula ira,Ba lö aetu möi miyawa waʼaböura.+
Börö me ifalua Lowalangi zahöli-höli dödö.’
21 Böi miʼataʼufi yaʼami soi.
Miʼomusoiʼö ba miʼowua-wuaʼö dödömi börö me ifalua Yehowa zahöli-höli dödö.
22 He yaʼami utu ndruʼu ba mbenua, böi miʼataʼufi,Börö me tumbu ndruʼu ba danö si mate,+Ba mowua döla geu.+
Oya dania mbua ara hegöi bua nagu.+
23 He yaʼami ono mbanua Ziona, miʼomusoiʼö ba miʼowua-wuaʼö dödömi börö Yehowa Lowalangimi.+
Ibeʼe dania khömi deu ba mbaŵa wangaruru,Ba itohugö teu sabölö-bölö,Teu ba mbaŵa wangaruru hegöi teu ba mbaŵa woliwiö simane ba zilalö.+
24 Afönu dania bua zinanö si sökhi naha wamöbörö.
Falawu nagu si bohou hegöi fanikha ba naha wolazi.+
25 Ugati dania zahori ami ba zi hauga fakhe,Me no ahori iʼa tamo sanuwö mbasitömi, ba no iʼa tamo si lö afi, tamo soluʼa-luʼa, ba tamo samufu,Yaʼia daʼö saradadu sato nifatengegu ba gotaluami.+
26 Manga ami dania irege abuso,+Ba misuno döi Yehowa Lowalangimi,+Samalua sahöli-höli dödö salahimi.
Lö saʼae irai teʼailasi nono mbanuagu.+
27 Awena dania aboto ba dödömi wa so ndraʼo ba gotalua ndraono Gizaraʼeli,+Ba yaʼo Yehowa Lowalangimi,+ lö hadöi tanö böʼö!
Lö saʼae irai teʼailasi nono mbanuagu.
28 Aefa daʼö, ufaduwa dania gehehagu+ ba niha fefu,Mamaʼeleʼö dania nonomi matua awö nonomi alawe,Mangifi dania ubeʼe niha satua si so ba gotaluamiBa latema gangilata iraonomi si bohou ebua.+
29 Simanö göi khö zawuyugu ira matua hegöi ira alawe,Ubeʼe gehehagu khöra ba luo daʼö.
30 Ufalua zahöli-höli dödö* ba mbanua si yawa hegöi ba gulidanö,So dania ndro, alitö ba simbo saweʼe-weʼe.+
31 Ogömi dania luo, ba oyo dania mbaŵa hulö ndro,+Aefa daʼö, tohare luo Yehowa sebua ba sataʼu niha.+
32 Dozi soʼangaröfili töi Yehowa daʼö niʼorifi.+
So göi dania niʼorifi ba Hili Ziona hegöi ba Yeruzalema,+ simane niwaʼö Yehowa,Yaʼia daʼö niha si no ikaoni Yehowa.”
Nisura ba gahe zura
^ Mazui ”niha gulidanö”.
^ Mazui ”Ibulöʼö wangera-ngerania”.
^ Mazui ”ibulöʼö wangera-ngerania”.
^ Mazui ”zumange bua nowi”.
^ Mazui ”Terou dödö Yehowa ba soinia”.
^ Eluahania ”Asi si Mate”.
^ Eluahania ”Asi Mediterania (Laut Tengah)”.
^ Mazui ”dandra”.
