Nisura Yohane 17:1-26
17 Me no aefa iwaʼö daʼö, ifaöga hörönia Yesu imane, ”He Ama, no irugi inötö. Folakhömi nonou, enaʼö göi ifolakhömi ndraʼugö onou.+
2 No öbeʼe khönia kuaso ba wamatörö fefu niha,+ enaʼö ibeʼe waʼauri si lö aetu+ ba niha nibeʼeu khönia.+
3 Daʼö waʼauri si lö aetu,+ enaʼö aboto ba dödöra ndraʼugö, Lowalangi sindruhu si ha sambua,+ ba enaʼö aboto ba dödöra nifatengeu andrö, Yesu Keriso.+
4 No ufolakhömi ndraʼugö ba gulidanö+ me uʼasiwai halöwö nibeʼeu khögu.+
5 Börö daʼö, he Ama, beʼe khögu lakhömi ba zingamö, simane lakhömi nitemagu ba zingamö fatua lö tewöwöi niha gulidanö.+
6 ”No ufatunö döimö andrö ba niha nibeʼeu khögu moroi ba gulidanö.+ Yaʼira andrö tana khöu, ba no öbeʼe ira khögu enaʼö laʼoʼö daromalimö.
7 No aboto ba dödöra wa moroi khöu fefu hadia ia nibeʼeu khögu.
8 No ufaʼema khöra wehede nibeʼeu khögu,+ ba no latema. Sindruhu-ndruhu aboto ba dödöra wa tohare ndraʼo si möi salahimö,+ ba no faduhu dödöra wa yaʼugö zamatenge yaʼo.+
9 Mangandrö ndraʼo salahira, tenga salahi niha gulidanö, hizaʼi salahi niha si no öbeʼe khögu börö me tana khöu ira.
10 Fefu zi so khögu ba no okhötau, ba fefu zi so khöu ba no okhötagu.+ No tefolakhömi ndraʼo ba gotaluara.
11 ”Lö saʼae yaʼo ba gulidanö, hizaʼi ba gulidanö so ira,+ ba möi ndraʼo khöu. He Ama niʼamoniʼö, rorogö ira+ börö döimö si no öbeʼe khögu, enaʼö hasara dödöra* simane yaʼita.+
12 Me fao ndraʼo khöra, no urorogö ira+ börö döimö si no öbeʼe khögu. No ulumöʼö ira ba samösa lö si taya,+ baero nono waʼatekiko andrö,+ irege itörö niwaʼö ba zura.+
13 Iadaʼa möi ndraʼo khöu, ba uʼombakhaʼö daʼa ba gulidanö enaʼö sindruhu-ndruhu larasoi waʼomuso dödögu.+
14 No ubeʼe khöra daromalimö, tobali fatiu dödö niha gulidanö khöra börö me tenga tana khö niha gulidanö ira,+ simane yaʼo si tenga tana khö niha gulidanö.
15 ”Mangandrö ndraʼo, tenga enaʼö öheta ira moroi ba gulidanö, hizaʼi enaʼö ölumöʼö ira moroi khö Zatana.*+
16 Tenga tana khö niha gulidanö ira,+ simane yaʼo si tenga tana khö niha gulidanö.+
17 Amoniʼö ira ba zindruhu,+ taromalimö zindruhu.+
18 Simane famatengeu yaʼo ba gulidanö, ufatenge göi ira ba gulidanö.+
19 Uʼamoniʼö ndraʼo salahira, enaʼö teʼamoniʼö ira göi ba zindruhu.
20 ”Tenga ha khöra mangandrö ndraʼo. Mangandrödo göi salahi niha samati khögu me no larongo wehedera,
21 enaʼö hasara dödöra,+ simane yaʼugö Ama ba khögu, ba simane yaʼo ba khöu,+ enaʼö si hasara tödö ira khöda, ba faduhu dödö niha gulidanö wa yaʼugö zamatenge yaʼo.
22 No ubeʼe khöra lakhömi nibeʼeu khögu, enaʼö hasara dödöra simane yaʼita.+
23 Hasara dödöma, ba hasara dödöda, enaʼö sindruhu-ndruhu hasara dödöra, irege aboto ba dödö niha gulidanö wa yaʼugö zamatenge yaʼo, ba öʼomasiʼö ira simane faʼomasiu ndraʼo.
24 He Ama, omasi ndraʼo na fao ndraʼaga niha nibeʼeu khögu ba zi so yaʼo,+ enaʼö laʼila lakhömigu nibeʼeu khögu börö me öʼomasiʼö ndraʼo fatua lö tewöwöi niha gulidanö.*+
25 He Ama satulö, lö aboto ba dödö niha gulidanö haniha ndraʼugö,+ hizaʼi aboto ba dödögu ndraʼugö+ ba aboto ba dödö niha si no öbeʼe khögu wa yaʼugö zamatenge yaʼo.
26 No uʼombakhaʼö khöra döimö, ba utohugö nasa wangombakha+ enaʼö laʼomasiʼö niha böʼö simane fangomasiʼöu yaʼo ba enaʼö hasara dödöma.”+
Nisura ba gahe zura
^ Mazui ”enaʼö teʼosambuaʼö ira”.
^ Sin.: ”si lö sökhi”.
^ Eluahania daʼa iraono Gadamo ba Khawa.
