Nisura Yohane 19:1-42
19 Aefa daʼö, iʼandrö Filato enaʼö laʼohe Yesu ba laleasi ia.+
2 Lafazökhi ira saradadu dakula moroi ba ndroi labeʼe ba högönia, ba lafonukha ia baru sebua si ungu laʼa-laʼa.*+
3 Lafahatö ira khönia ba zi hauga kali ba lamane, ”Yaʼahowu Razo Niha Yahudi!” Lö laböhöli wanafari bawania.+
4 Möi baero Wilato imane khöra, ”Mifaigi! Uʼohe ia baero enaʼö aboto ba dödömi wa lö hadöi nisöndragu sala ba niha daʼa.”+
5 Möi baero Yesu, no ifake dakula sodoi hegöi baru sebua si ungu laʼa-laʼa.* Aefa daʼö imane Filato, ”Mifaigi niha daʼa!”
6 Me laʼila ia ira kafalo gere hegöi sohalöwö, muʼao ira lamane, ”Osö ia ba döla geu! Osö ia ba döla geu!”+ Imane Filato, ”Yaʼami manö zolohe ba mibunu ia.* Lö hadöi nisöndragu sala ba niha daʼa.”+
7 Lamane ira niha Yahudi, ”So khöma huku sangumaʼö wa lö tola löʼö mubunu ia+ börö me iwaʼö ono Lowalangi ia.”+
8 Me irongo Filato wehedera, itugu ataʼu ia.
9 Ifuli ia bakha ba nahia gubernur ba imane khö Yesu, ”Hezo moroi ndraʼugö?” Lö itema linia Yesu.+
10 Imane Filato, ”Lö omasiʼö fahuhuo khögu? Hadia lö öʼila wa so khögu kuaso ba wangefaʼö hegöi ba wamunu yaʼugö?”*
11 Itema linia Yesu, ”Maʼifu lö hadöi kuasomö khögu na lö tebeʼe khöu daʼö moroi si yawa. Daʼö mbörö wa abölö ebua horö niha sameʼe yaʼo ba dangamö.”
12 Iʼalui lala Filato ba wangefaʼö Yesu. Hizaʼi, muʼao niha Yahudi lamane, ”Na öʼefasi niha daʼa, tenga si fahuwu khö Kaisaro ndraʼugö. Dozi samotöi yaʼia razo sindruhunia no ilawa Kaisaro.”+
13 Me irongo wehede daʼö Filato, iʼohe baero Yesu ba modadao ia ba gurusi wanguhuku ba nahia nifotöi Salo Kara mazui Gabata ba li Heberaiʼo.
14 Me luo daʼö mato bözi 12 waʼalawa luo,* inötö Wangöhöna+ Wasa. Imane ba niha Yahudi, ”Mifaigi razomi!”
15 Muʼao ira lamane, ”Bunu ia! Bunu ia! Osö ia ba döla geu!” Imane khöra Filato, ”Hadia hasambalö yaʼodo zamunu razomi andrö?” Lamane ira kafalo gere, ”Lö hadöi razoma baero Kaisaro.”
16 Aefa daʼö, itouʼö Yesu ba dangara enaʼö laʼosö ia ba döla geu.+
Laʼohe Yesu ba mofanö ira.
17 Iʼonoro döla geu famakao,* numalö ira ba Naha Gamatela+ mazui Gologata ba li Heberaiʼo.+
18 Ba daʼö laʼosö ia ba döla geu,+ so darua niʼosö ba zingania, samösa ba gambölö ba samösa ba gabera.+
19 Isura Filato niʼotöigö khö Yesu ba zi sagörö fafa: ”Yesu niha Nazareta, Razo Niha Yahudi.”+ Aefa daʼö, iʼandrö enaʼö laʼosö wafa andrö ba döla geu famakaonia.*
20 Ato niha Yahudi sombaso töi daʼö, börö me ahatö ba mbanua sebua laʼosö Yesu ba no lasura ba li Heberaiʼo, Latina, ba Yunani.
21 Lamane ira kafalo gere niha Yahudi khö Wilato, ”Böi sura, ’Razo Niha Yahudi.’ Ömane wanura wa no iwaʼö, ’Yaʼodo Razo Niha Yahudi.’”
22 Imane Filato, ”Hadia zi no usura tebai mubulöʼö.”
23 Me no laʼosö Yesu ira saradadu ba döla geu, lahalö mbarunia tanö baero ba labagi öfa. Sambua ero samösa saradadu. Aefa daʼö, lahalö göi mbarunia tanö bakha si lö tagu-tagu, hizaʼi no musoso iʼotarai yawa numalö mitou.
24 Faoma lamane khö nawöra, ”Böi tasika mbaru daʼa. Datalau fadahö-dahö ba wotatugöi haʼökhö möi.”+ Börö zimanö, itörö niwaʼö ayati si no tesura: ”Labagi-bagi khöra mbarugu ba lalau fadahö-dahö ba nukhagu.”+ Daʼö nifalua ndra saradadu.
25 So ba daʼö nina Yesu,+ talifusö ninania ira alawe, Maria foʼomo Kelofasi hegöi Maria Magadala.+ No mosindro ira ba zinga döla geu famakao* Yesu.
26 Me iʼila Yesu no mosindro ninania ba daʼö hegöi nifahaʼö niʼomasiʼönia,+ imane khö ninania, ”He Ma, daʼö nonomö saʼae!”
27 Aefa daʼö imane khö nifahaʼönia andrö, ”Daʼö mamamö saʼae!” Iʼotarai daʼö iʼohe nina Yesu ba toröi ia ba nomo nifahaʼö andrö.
28 Imane Yesu me no awai saʼae ifalua fefu, ”Owökhi dödögu.” Börö daʼö itörö niwaʼö ba zura.+
29 So ba daʼö naha nidanö safönu agu saisö. Aefa daʼö, laʼungugö mbulu gara nasi ba nagu andrö, labeʼe ba mbalö geu hiso,* laʼoroʼö ba mbawa Yesu.+
30 Me no itandra nagu saisö andrö imane Yesu, ”No awai!”+ Aefa daʼö tolea högönia ba aetu nosonia.+
31 Börö me luo Wangöhöna+ me luo daʼö, lö omasi niha Yahudi na toröi mboto zi mate ba döla geu+ ba luo Sabato (börö me luo Sabato sebua me luo daʼö).+ Laʼandrö khö Wilato enaʼö lafafatö gahe ndra niha daʼö ba labeʼe tou mbotora moroi ba döla geu famakao.
32 Tohare ndra saradadu ba lafatö gahe niha si darua andrö si so ba zinga Yesu.
33 Me lahatöʼö ira khö Yesu, laʼila wa no mate ia. Andrö lö lafatö gahenia.
34 Hizaʼi, so samösa zaradadu samahö ngai Yesu faoma toho,+ aefa daʼö kalua ndro faoma idanö.
35 Niha si no mangila andrö zamaduhuʼö daʼa, ba sindruhu wamaduhuʼönia. Iʼila wa sindruhu wehedenia, andrö wa iwaʼö daʼö enaʼö faduhu dödömi.+
36 Sindruhu-ndruhu wa itörö ayati si no musura: ”Sara lö safatö* dölania.”+
37 So göi ayati tanö böʼö sangumaʼö, ”Latöngö niha nifahöra.”+
38 Tohare nifahaʼö Yesu sotöi Yosefo moroi ba Garimatea, ibiniʼö wa nifahaʼö ia börö waʼataʼunia khö ndra niha Yahudi.+ Iʼandrö khö Wilato enaʼö itehe khönia wangai boto Yesu. Itehegö khönia Filato, ba ihalö mboto Yesu andrö.+
39 Tohare Nikodemo+ si no irai mamalukhaisi Yesu ba zi bongi, iʼohe gemuri faoma gaharu* si no mufaruka. Faʼabuania te mato 30 kilogram.*+
40 Lahalö mboto Yesu ba labukusi ba nukha si sökhi ba lafagule ba mbotonia wangomuhua + simane si toʼölö na lakoʼo niha Yahudi.
41 Ba nahia nibunu yaʼia* so ba daʼö kabu, ba kabu andrö so lewatö si bohou.+ Lö irai lakoʼo zi mate ba daʼö.
42 Börö me luo Wangöhöna+ me luo daʼö ba niha Yahudi ba ahatö göi lewatö, andrö ba daʼö lafadölö mboto Yesu.
Nisura ba gahe zura
^ Mazui ”sobowo doru”.
^ Mazui ”sobowo doru”.
^ Mazui ”ba miʼosö ia ba döla geu”.
^ Mazui ”ba wanguhuku yaʼugö ba döla geu?”
^ Sin.: ”te me inötö si meʼönö”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”safufu”.
^ Töi geu somuhua niʼogunaʼö tobali fanikha fangomuhua ba götö Zura Niʼamoniʼö.
^ Mazui ”Ba nahia nibunu yaʼia ba döla geu”.
