Nisura Yohane 8:12-59
8 12 Ifuli zui fahuhuo khöra Yesu, ”Yaʼodo haga gulidanö.+ Haniha zoloʼö yaʼo, lö mowaö-waö ba zogömi-gömi, hizaʼi so khönia haga+ waʼauri.”
13 Lamane khönia ira Farizaiʼo, ”Öfaduhuʼö samösa ndraʼugö, lö atulö wamaduhuʼömö.”
14 Itema lira Yesu, ”Hewaʼae ufaduhuʼö samösa ndraʼo, ba atulö wamaduhuʼögu börö me uʼila hezo uʼotarai ba hezo möi ndraʼo.+ Lö miʼila hezo uʼotarai ba hezo numalö ndraʼo.
15 Mifalua wanguhuku moloʼö fangera-ngera niha.+ Na yaʼodo, lö uhuku niha.
16 Na ufalua wanguhuku, fanguhuku nifaluagu atulö, börö me tenga ha yaʼo hizaʼi fao khögu Nama samatenge yaʼo.+
17 Mendrua manö no tesura ba Goroisa Moze, ’Famaduhuʼö zi darua, no famaduhuʼö satulö.’+
18 Yaʼodo zamaduhuʼö yaʼo, ba ifaduhuʼö göi ndraʼo Ama samatenge yaʼo.”+
19 Aefa daʼö lamane, ”Hezo so Namamö?” Imane Yesu, ”Lö miʼila haniha ndraʼo hegöi Amagu.+ Na miʼila haniha ndraʼo, tatu manö no miʼila göi Namagu.”+
20 Iwaʼö daʼö ba zinga naha wameʼe tolo-tolo+ me mamahaʼö ia ba gosali. Hizaʼi, lö sondraʼu yaʼia börö me lö irugi inötönia nasa.+
21 Imane zui khöra, ”Mofanö ndraʼo ba miʼaluido dania, hizaʼi mate ami börö horömi andrö.+ Tebai möi ami ba zi möi ndraʼo.”+
22 Aefa daʼö ibörögö lamane ira niha Yahudi, ”Iwaʼö mege tebai möi ita ba zi möi ia. Alai na ibunu ia.”
23 Imane khöra, ”Moroi tou mbörötami, na yaʼodo moroi si yawa.+ Moroi ba gulidanö andre ami, na yaʼodo tenga moroi ba gulidanö.
24 Andrö wa uwaʼö mate ami ba horömi andrö. Na lö faduhu dödömi wa yaʼo niha nifabuʼu andrö, mate ami ba horömi.”
25 Lasofu khönia, ”Haniha ndraʼugö?” Imane Yesu, ”Hadia guna fahuhuo ndraʼo khömi?
26 Oya zinangea uwaʼö sanandrösa khömi ba ato zinangea uhuku. Sindruhunia, satulö zamatenge yaʼo. Hadia nirongogu khönia daʼö nitutunögu ba gulidanö andre.”+
27 Lö laʼila wa nifatunönia andrö sanandrösa khö Nama.
28 Aefa daʼö imane Yesu, ”Na no miʼalawaʼö Nono niha,+ awena dania miʼila wa yaʼo+ niha nifabuʼu andrö, ba lö nifaluagu hadia ia moloʼö somasi dödögu.+ Hadia nifahaʼö Nama khögu daʼö nifatunögu.
29 Fao khögu zamatenge yaʼo. Lö iröi ndraʼo börö me lö uböhöli wamalua somasi ia.”+
30 Me iwaʼö daʼa fefu, ato niha samati khönia.
31 Imane Yesu khö ndra niha Yahudi si no faduhu tödö khönia, ”Na lö tebulö mitöngöni wehedegu, sindruhu-ndruhu wa nifahaʼögu ami,
32 ba aboto ba dödömi zindruhu,+ ba sindruhu andrö zangefaʼö yaʼami.”+
33 Lamane khönia niha sato, ”Ngaʼötö Gaberahamo ndraʼaga ba lö irai tobaliga sawuyu niha böʼö. Hana wa öwaʼö teʼefaʼö ndraʼaga?”
34 Itema lira Yesu, ”Sindruhu niwaʼögu khömi, sawuyu horö niha samalua horö.+
35 Aefa daʼö, tenga sagötö faʼara toröi zawuyu ba nomo zangosawuyu yaʼia, hizaʼi ononia sindruhu toröi ba daʼö sagötö faʼara.
36 Tobali, na iʼefaʼö ami Ono, sindruhu-ndruhu no teʼefaʼö ami.
37 Uʼila wa ngaʼötö Gaberahamo ami. Hizaʼi, miʼalui lala wamunu yaʼo, börö me lö faduhu dödömi ba wehedegu.
38 Ufatunö hadia niʼilagu me fao ndraʼaga Namagu,+ ba mifalua hadia nirongomi moroi khö namami.”
39 Lamane, ”Ono Gaberahamo ndraʼaga.”* Imane Yesu, ”Na sindruhu ono Gaberahamo ami,+ tatu mifalua hadia nifalua Gaberahamo.
40 Hizaʼi, miʼalui lala wamunu yaʼo iadaʼa, hewaʼae no ufatunö khömi zindruhu nirongogu moroi khö Lowalangi.+ Lö ifalua zimane daʼö Aberahamo.
41 Mifalua hadia nifalua namami.” Lamane, ”Tenga ono horö ndraʼaga.* Ha samösa Namama yaʼia daʼö Lowalangi.”
42 Imane Yesu, ”Na sindruhu Lowalangi Namami, tatu miʼomasiʼö ndraʼo,+ börö me nifatenge Lowalangi ndraʼo ba daʼa. Tenga ba zomasi dödögu wa tohare ndraʼo, hizaʼi börö zamatenge yaʼo.+
43 Hana wa lö aboto ba dödömi niwaʼögu? Börö me lö mifondrondrongo wehedegu.
44 Amami Gafökha, ba omasi ami wamalua somasi namami.+ Iʼotarai mböröta no tobali ia samunu niha,+ ba lö niʼagönia zi duhu börö me lö ba dödönia sindruhu. Na falimo ia, no daʼö gamuatania börö me sofaya ia ba ama zofaya.+
45 No ufatunö khömi sanandrösa ba zindruhu, ba börö daʼö wa lö faduhu dödömi khögu.
46 Haniha ba gotaluami zi tola mamaduhuʼö wa no ufalua horö? Na sindruhu nifatunögu, hana wa lö faduhu dödömi khögu?
47 Ono Lowalangi lafondrondrongo wehede Lowalangi.+ Wa lö omasi ami mifondrondrongo börö me tenga ono Lowalangi ami.”+
48 Latema linia ira niha Yahudi lamane, ”Lö fasala ndraʼaga na mawaʼö, ’Yaʼugö andrö niha Zamaria+ ba no möi ba dödöu Gafökha.’”+
49 Imane Yesu, ”Lö si möi ba dödögu Gafökha. Ufosumange Namagu, ba lö mifosumange ndraʼo.
50 Hizaʼi, lö uforege enaʼö tefolakhömi ndraʼo.+ No so zomasi enaʼö tefolakhömi ndraʼo ba yaʼia andrö sanguhuku.
51 Sindruhu-ndruhu niwaʼögu, niha soloʼö fehedegu lö irai mate.”+
52 Lamane ira niha Yahudi, ”Awena maʼila iadaʼa wa so Gafökha ba dödöu. No mate Gaberahamo, simanö göi ndra samaʼeleʼö, ba öwaʼö, ’Niha soloʼö fehedemö lö irai mate.’
53 Hadia abölö ebua ndraʼugö moroi khö namada Aberahamo si no mate? No mate göi ndra samaʼeleʼö. Öwalinga haniha ndraʼugö?”
54 Imane Yesu, ”Na ufolakhömi samösa ndraʼo, lö eluaha lakhömi daʼö. Amagu zamolakhömi yaʼo,+ nifotöimi Lowalangimi.
55 Lö miʼila haniha ia,+ hizaʼi uʼila haniha.+ Na uwaʼö lö uʼila haniha ia, tobali ndraʼo sofaya simane yaʼami. Sindruhunia, uʼila haniha ia ba uʼoʼö niwaʼönia.
56 Omuso sibai dödö namami Aberahamo börö me iʼila ngaluo waʼatoharegu. No ikhalaigö ba omuso dödönia.”+
57 Aefa daʼö lamane ira niha Yahudi, ”Lö ikhamö 50 fakhe ndraʼugö, no irai öʼila Gaberahamo?”
58 Imane Yesu, ”Sindruhu niwaʼögu, fatua lö tumbu Gaberahamo, no so ndraʼo.”+
59 Lahalö gara ba wanebu Yesu, hizaʼi ibiniʼö ia ba iröi gosali.
Nisura ba gahe zura
^ Mazui ”Tuama Gaberahamo”.
^ Sin.: ”ono si tumbu börö wohorö”. Ba li Yunani: porneia. Faigi Geluaha Ngawua Wehede.
