Yona 1:1-17
1 Mohede Yehowa khö Yona*+ ono Gamitaʼi,
2 ”Aeʼe ba Niniwe,+ banua sebua andrö. Ombakhaʼö khöra duria wanguhuku, börö me no ofeta khögu duria si lö sökhi nifaluara.”
3 Hizaʼi, moloi Yona föna Yehowa, möi ia ba Darisi. Mofanö ia ba Yafo ba iʼila göfa si numalö ba Darisi. Ibuʼa okosinia ba fao ia khöra ba Darisi, moloi ia föna Yehowa.
4 Aefa daʼö, iʼasogö nangi sabölö-bölö Yehowa ba nasi, ba alua mbade sebua irege maʼifu tö ahöndrö göfa andrö.
5 Ba ataʼu sibai zohalöwö ba göfa andrö irege muʼao ira ba wangandrö tolo khö lowalangira zamösana. Latiboʼö fefu gama-gama si so ba göfa enaʼö aoha.+ Hizaʼi, no möi Yona ba wondrege tanö si tou ba göfa. No ifadölö ia ba daʼö ba abölö-bölö sibai wemörönia.
6 Möi khönia kafite göfa ba imane, ”Hana wa möröʼö? Faoso, angandrö khö Lowalangiu! Maʼatö iforomaʼö khöda waʼahakhö dödö Lowalangi sindruhu, irege lö mate ita.”+
7 Aefa daʼö, faoma lamane khö nawöra, ”Aine, datalau fadahö-dahö+ ba wangalui haniha mbörö wa alua khöda wamakao.” Andrö wa lafalua dahö-dahö. Ba me fadahö-dahö ira, khö Yona aekhu.+
8 Manofu ira khönia, ”Fatunö khöma, hadia yaʼugö mbörö wa alua khöma wamakao andre? Hadia halöwöu ba hezo öʼotarai? Hezo moroi soimö ba hadia madomö?”
9 Imane, ”Niha Heberaiʼo ndraʼo ba samosumange* Yehowa, Lowalangi samatörö banua si yawa, samazökhi asi awö danö.”
10 Itugu ataʼu ira börö me ifatunö khöra Yona wa soloi ia föna Yehowa. Lamane khönia, ”Hana wa öfalua daʼö?”
11 Börö me itugu abölö-bölö mbade, andrö lamane khö Yona, ”Hadia zinangea mafalua khöu enaʼö ahono nasi?”
12 Imane Yona, ”Mifazaumba ndraʼo ba nasi, ba hasambalö ahono nasi. Noa sa aboto ba dödögu, yaʼo mbörö wa göna ami bade sabölö-bölö.”
13 Laforege ira sohalöwö ba woʼalukhaini köfa enaʼö tola larugi zinga nasi, hizaʼi lö mofozu börö me itugu abölö-bölö mbade.
14 Aefa daʼö, muʼao ira khö Yehowa, ”He Yehowa, böi bunu ndraʼaga ha börö niha daʼa! Böi beʼe ba huluma ndro niha si lö sala andre, börö me tefaudu daʼa ba gohitö dödöu, yaʼugö Yehowa.”
15 Lafazawa Yona ba lafazaumba ia ba nasi ba awena ahono nasi.
16 Ataʼu sibai ndra sohalöwö ba göfa andrö khö Yehowa.+ Aefa daʼö, labeʼe zumange nitunu khö Yehowa ba fawuʼu li ira khönia.
17 Gasa-gasa daʼö, ifatenge giʼa sebua Yehowa ba wanölö Yona. Toröi Yona bakha ba dalu giʼa tölu ngaluo ba tölu wongi.+
