Yosua 1:1-18
1 Me no mate Moze enoni Yehowa andrö, imane Yehowa khö Yosua,*+ ono Nuni, sangai halöwö+ khö Moze,
2 ”No mate genonigu Moze.+ Iadaʼa, mifaʼanö ami, yaʼugö ba fefu soi daʼa. Miʼötö Nungo Nidanö Yoridano, ba miʼaeʼe ba danö nibeʼegu ba ndraono Gizaraʼeli.+
3 Gofu hezo danö nirugimi, hasambalö ubeʼe khömi daʼö, simane si no ufabuʼu khö Moze.+
4 Iʼotarai danö si mate irugi Libano ofeta ba Nungo Nidanö Oiferati, ungo nidanö sebua andrö, yaʼia daʼö tanö niha Kheti+ maʼasagörö irugi Nasi Sebolo* tanö ba gaekhula luo,+ daʼö danö niʼokhögömi dania.
5 Lö hadöi si möna ba wolawa yaʼugö sagötö faʼaurimö.+ Utolo ndraʼugö simane fanologu Moze.+ Lö uröiʼö mazui uʼositengagö ndraʼugö.+
6 Yaʼabölö ndraʼugö ba enaʼö barani,+ börö me yaʼugö dania zondröniaʼö soi daʼa ba wangokhögö tanö nifabuʼugu si no möido ba hölu khö ndra tuara.+
7 ”Yatedou waʼabölöu ba enaʼö barani. Oʼö fefu Goroisa genonigu Moze andrö niwaʼönia khöu. Böi holeʼö ndraʼugö ba gambölö mazui ba gabera,+ enaʼö atua-tua ndraʼugö gofu hezo möiʼö.+
8 Böi böhöli wamatunö sanandrösa ba mbuku Goroisa andre,+ baso ba öfatou-tou tödöu* bongi maʼökhö enaʼö öʼila öfalua fefu zi no tesura.+ Na öfalua daʼö, mofozu waʼaurimö ba atua-tua ndraʼugö ba wangai angetula.+
9 Ufuli uwaʼö, yaʼabölö ndraʼugö ba enaʼö barani. Böi mangiwa dödöu ba böi ataʼu ndraʼugö börö me fao khöu Yehowa gofu hezo möiʼö.”+
10 Lö ara, ifaretakö fefu zondröniaʼö soi daʼö Yosua,
11 ”Töröi fefu nose ba beʼe fareta daʼa ba ndraono Gizaraʼeli: ’Mifaʼanö-anö ami. Tölu hari tö, miʼötö Nungo Nidanö Yoridano ba mirabu dania danö nibeʼe Lowalangimi Yehowa khömi.’”+
12 Aefa daʼö, imane Yosua ba mado Rubeno, mado Gado, ba matonga mado Manase,
13 ”Mitörö-törö tödömi niwaʼö Moze enoni Yehowa andrö,+ ’Yehowa Lowalangimi zameʼe khömi faʼahono dödö. No ibeʼe khömi danö daʼa.
14 Foʼomomi, iraonomi, ba fefu gurifömi hasambalö toröi ba zi tambai* Nungo Nidanö Yoridano,+ ba danö nibeʼe Moze khömi dania. Hizaʼi yaʼami saradadu sagabölö,+ miʼagö föna ndra talifusömi ba wangötö idanö daʼa,+ simane na mifaʼanö ami ba wasuwöta. Lö tola löʼö, mitolo ira
15 irege no ahono dödöra ibeʼe Yehowa simane yaʼami, ba irege no larabu göi danö nibeʼe Yehowa Lowalangimi khöra. Aefa daʼö, miʼangawuli ba danö si toröi yaʼami ba gatumbukha Nungo Nidanö Yoridano andre, ba danö nibeʼe Moze khömi enoni Yehowa andrö.’”+
16 Lamane khö Yosua, ”Mafalua fefu niwaʼöu, ba möi ndraʼaga gofu hezo öfatengega.+
17 Mafondrondrongo niwaʼöu, simane famondrongoma fehede Moze. Yaʼitolo ndraʼugö Yehowa Lowalangimö simane fanolonia Moze.+
18 Haniha zolawa yaʼugö ba si lö moloʼö niwaʼöu hasambalö mubunu.+ Yaʼabölö ndraʼugö ba enaʼö barani.”+
Nisura ba gahe zura
^ Mazui ”Yehosua”, eluahania ”Yehowa No Fangorifi”.
^ Eluahania Asi Mediterania (Laut Tengah).
^ Mazui ”angerönusi”.
^ Eluahania tanö ba gatumbukha.
