Yosua 10:1-43
10 No irongo Razo Gadoni-sede moroi ba Yeruzalema wa no irabu ba ihori mbanua Gaʼi andrö Yosua, simane nifaluania ba mbanua Yerikho hegöi khö razonia,+ simane daʼö göi ifalua ba mbanua Gaʼi hegöi khö razonia.+ No irongo göi wa no atulö nono mbanua Gibeona ba ndraono Gizaraʼeli+ ba latehegö toröi ira ba daʼö.
2 Lua-luania, ataʼu sibai razo andrö+ börö me ebua mbanua Gibeona, hulö mbanua nifatörö zi samösa razo. Abölö ebua mbanua daʼö moroi ba Gaʼi+ ba fefu ndra matuania oi sagabölö fasuwö.
3 Börö daʼö, ifaʼoheʼö goroisania Razo Gadoni-sede moroi ba Yeruzalema khö Hohama razo niha Heberona,+ Fireamo razo Yaramuti, Yafia razo Lakhisi, ba Debira razo Negelona,+
4 ”Miʼaine, mitolodo, datasuwö Gibeona, börö me no atulö ira khö Yosua hegöi ba ndraono Gizaraʼeli.”+
5 Ba fao razo Gamori+ andrö si dalima yaʼia daʼö razo Heberona, razo Yaramuti, razo Lakhisi, razo Negelona awö ndra saradadura, ba laʼosambuaʼö waʼabölöra ba lafaʼanö ira, aefa daʼö möi ira lasuwö Gibeona.
6 Ba lafaʼoheʼö goroisara ira niha Gibeona khö Yosua ba nose Giligala,+ ”Böi röi* ndra sawuyumö andre.+ Aliokö, ae ba daʼa! Orifiga ba tolo ndraʼaga! Fefu razo niha Gamori si toröi ba mbanua si so ba hili, no laʼosambuaʼö ira ba wanuwö yaʼaga.”
7 Mofanö Yosua moroi ba Giligala awö ndra saradadunia hegöi ira matua sagabölö fasuwö.+
8 Imane Yehowa khö Yosua, ”Böi ataʼufi ira,+ börö me no ubeʼe ba dangau ira.+ Lö hadöi niha si tola molawa yaʼugö.”+
9 Isuwö mbanua andrö Yosua ba zi lö mudöna-döna me no sara wongi mofanö ia moroi ba Giligala.
10 Ifawukaisi ira Yehowa.+ Ato nibunu ndraono Gizaraʼeli ba Gibeona, lagohi ba labunu irege möi ira yawa ba Mbeti-horona irugi Gaseka hegöi Makeda.
11 Gasa-gasa woloira moroi ba ndraono Gizaraʼeli ba latueli Mbeti-horona, ihawui ira kara segebua Yehowa irugi ba Gaseka ba mate ira. Abölö oya zi mate ba deu kara moroi ba wöda ndraono Gizaraʼeli.
12 Me luo daʼö, ibeʼe niha Gamori andrö Yehowa ba danga ndraono Gizaraʼeli. Imane Yehowa khö Yosua föna soi daʼö,
”He luo, batogö ndraʼugö+ yawa Gibeona,+Ba yaʼugö baŵa, ba Ndraso Nayalona!”
13 Tebato luo ba tebato wofanö mbaŵa irege lakalaisi nudura. Fefu daʼö no tesura ba mbuku Yasa.+ Tebato wofanö luo ba dalu mbanua ba lö aekhu luo mato maʼö-maʼökhö.
14 Lö irai so ngaluo simane daʼö, he ba zilalö hegöi ba zi so föna me ifondrondrongo gangandröwa niha Yehowa+ börö me Yehowa zi fasuwö ba ndraono Gizaraʼeli.+
15 Me no aefa daʼö, mangawuli Yosua hegöi iraono Gizaraʼeli ba nose Giligala.+
16 Hizaʼi, moloi razo si dalima no mege ba labiniʼö ira ba dögi narö hili ba Makeda.+
17 Ba teʼombakhaʼö khö Yosua, ”Razo si dalima andrö no labiniʼö ira ba dögi narö hili ba Makeda.”+
18 Imane Yosua, ”Duhö dögi narö hili andrö faoma kara segebua ba fataro mato hadauga zozago ba daʼö.
19 Hizaʼi, tanö böʼönia böi milau zi lö hede-hede. Migohi nudumi ba misuwö ira moroi furi.+ Böi mifaʼamöi ira ba mbanuara börö me no ibeʼe ira ba dangami Yehowa Lowalangimi.”
20 Ba me no ahori labunu ndra niha daʼö ira Yosua hegöi iraono Gizaraʼeli irege arakhagö ahori, hatö niha soloi ba nahia folumöʼö daʼö zauri,
21 ba mangawuli ndra saradadu khö Yosua ba nose Makeda, lö hadia ia khöra. Samösa lö si barani ba wolawa iraono Gizaraʼeli.
22 Aefa daʼö imane Yosua, ”Bokai dögi narö hili daʼö ba ohe ba daʼa khögu razo si dalima andrö.”
23 Börö daʼö, labeʼe baero razo si dalima moroi ba dögi narö hili, yaʼia daʼö razo Yeruzalema, razo Heberona, razo Yaramuti, razo Lakhisi hegöi razo Negelona.+
24 Me laʼohe ndra razo daʼö khö Yosua, ikaoni fefu ndra matua Gizaraʼeli ba imane khö ndra kafalo saradadu si fao khönia, ”Miʼaine. Mihundragö mbagi* ndra razo daʼa.” Börö daʼö, lafahatö ira ba lahundragö mbagi ndra razo andrö.+
25 Imane Yosua, ”Böi miʼataʼufi mazui manizi ami.+ Yaʼabölö ami ba enaʼö barani börö me simane daʼö nifalua Yehowa ba nudu solawa yaʼami.”+
26 Aefa daʼö, ibunu ira Yosua ba itawi ba döla geu si lima rozi. No manawa-nawa manö ira ba döla geu andrö irugi tanö owi.
27 Me no aekhu luo, ifaretakö Yosua enaʼö labeʼe tou mboto ndra razo andrö moroi ba döla geu+ ba lafazaumba ba dögi narö hili ba nibiniʼöra yaʼira mege. Awena laduhö faoma kara segebua. Ofeta maʼökhö so gara daʼö.
28 Ba ngaluo daʼö, irabu mbanua Makeda andrö+ Yosua ba isuwö faoma föda. Ibunu razo ba fefu niha si so ba daʼö, samösa lö sauri.+ Simane nifaluania khö razo Yerikho, simane daʼö göi ifalua khö razo Makeda.+
29 Ba mofanö Yosua hegöi ira saradadu Gizaraʼeli moroi ba Makeda, ba lasuwö Libena.+
30 Ba ibeʼe ba danga ndraono Gizaraʼeli mbanua daʼö Yehowa, simanö göi razonia.+ Lasuwö mbanua andrö ba labunu fefu niha si so ba daʼö faoma föda, ba samösa lö sauri. Simane nifaluara khö razo Yerikho,+ simane daʼö göi lafalua khö razo Libena.
31 Aefa daʼö, mofanö Yosua hegöi ira saradadu Gizaraʼeli moroi ba Libena numalö ba Lakhisi.+ Lafazökhi nosera ba daʼö ba lasuwö mbanua andrö.
32 Ibeʼe ba danga ndraono Gizaraʼeli mbanua daʼö Yehowa, ba larabu mbanua andrö ba ngaluo si dua. Lasuwö mbanua daʼö ba labunu fefu niha si so ba daʼö faoma föda,+ simane nifaluania khö Libena.
33 Lö ara, tohare Horamo razo Gezeri+ ba wanolo Lakhisi. Hizaʼi, ibunu ia Yosua awö ndra saradadunia, samösa lö sauri.
34 Ba mofanö Yosua hegöi ira saradadu Gizaraʼeli moroi ba Lakhisi numalö ba Negelona,+ ba lafaʼanö ira ba wanuwö banua daʼö.
35 Me luo daʼö, lasuwö ba larabu mbanua andrö faoma föda. Labunu fefu niha si so ba daʼö ba zi maʼökhö daʼö, simane nifaluara khö Lakhisi.+
36 Aefa daʼö, mofanö Yosua hegöi ira saradadu Gizaraʼeli moroi ba Negelona numalö ba Heberona+ ba lasuwö mbanua andrö.
37 Larabu mbanua daʼö ba lasuwö razonia, banua si fasui yaʼira, ba labunu fefu niha si so ba daʼö faoma föda, samösa lö sauri. Idudugö mbanua daʼö ba ihori fefu niha si so ba daʼö, simane nifaluania ba Negelona.
38 Afuriatania, numalö ba Debira Yosua hegöi ira saradadu Gizaraʼeli,+ ba lasuwö mbanua andrö.
39 Larabu ba lasuwö faoma föda mbanua andrö, razonia hegöi banua si fasui. Labunu fefu niha si so ba daʼö,+ samösa lö sauri.+ Simane nifaluania ba Heberona hegöi Libena awö razonia, simane daʼö göi ifalua khö Debira awö razonia.
40 Ikalaisi fefu mbanua si so ba hili andrö Yosua, simanö göi mbanua Negebi, Sefela+ hegöi banua si so ba gahe hili ba fefu razonia, samösa lö sauri. Ihori fefu zonoso,+ simane niwaʼö Yehowa Lowalangi Gizaraʼeli.+
41 Ba ikalaisi ira Yosua iʼotarai Gadesi-mbarenea+ irugi Gaza,+ simanö göi danö Gosena+ maʼasagörö ofeta Gibeona.+
42 Ikalaisi fefu razo andrö Yosua ba ha samuza worabunia banua andrö, börö me Yehowa Lowalangi Gizaraʼeli zi fasuwö salahira.+
43 Aefa daʼö, mangawuli Yosua hegöi ira saradadu Gizaraʼeli ba nose Giligala.+
