Yosua 13:1-33
13 No atua ndröfi Yosua iadaʼa, no numalö ndröfinia.+ Börö daʼö imane khönia Yehowa, ”No atua ndraʼugö ba numalö ndröfiu, hizaʼi ebolo nasa danö sinangea murabu* ba soi daʼa.
2 Daʼa nasa mbanua si toröi:+ fefu mbanua niha Wilisiti hegöi banua niha Gesuri+
3 (moroi ba nono Nungo Nidanö Nilo* tanö ba gatumbukha* Miserai irugi nola Nekerona tanö yöu, niwaʼö niha ba zilalö tanö niha Ganaʼana)+ fao ba daʼö mbanua zamatörö niha Wilisiti si dalima,+ yaʼia daʼö niha Gaza, niha Gasoto,+ niha Gasekalo,+ niha Gata,+ niha Nekerona,+ niha Gawi+
4 tanö raya; fefu soi Ganaʼana; Meara, tanö niʼokhögö niha Zidona,+ irugi Gafeka, numalö ba nola danö niha Gamori;
5 tanö Gebala+ awö Libano maʼafefu tanö ba gatumbukha, moroi ba Mbaʼali-gado ba gahe Hili Heremono irugi Lebo-hamata;*+
6 fefu niha ba mbanua si so ba hili, moroi ba Libano+ irugi Misirefo-mayi+ yaʼia daʼö fefu niha Zidona.+ Ufofanö ira föna ndraono Gizaraʼeli.+ Moguna öbagi daʼö ba ndraono Gizaraʼeli tobali ondröita, simane si no uwaʼö.+
7 Iadaʼa, bagi mbanua andrö tobali ondröita ba zi siwa mado hegöi ba zi matonga mado Manase.”+
8 Mado Rubeno, mado Gado, ba matonga mado Manase, no latema danö ondröita si no ibeʼe Moze tanö ba gatumbukha Nungo Nidanö Yoridano, nibeʼe Moze enoni Yehowa andrö khöra,+
9 yaʼia daʼö iʼotarai Naroeri+ ba zinga Ndraso Garono,+ farahu göi mbanua si so ba dalu ndraso andrö, simanö göi danö sohili Medeba irugi Dibona;
10 fefu mbanua Zihona, razo Gamori samatörö ba Gesibona, irugi nola mbanua niha Gamoni;+
11 banua Gileadi awö mbanua niha Gesuri hegöi niha Maʼakhati,+ ba fefu Hili Heremono awö Mbazana maʼafefu+ irugi Zalekha;+
12 fefu mbanua nifatörö Ogi ba Mbazana, samatörö ba Gasaroti hegöi ba Gederai. (Samösa ia niha Refaʼi si toröi.)+ Ikalaisi ba ifofanö ira* Moze.+
13 Hizaʼi, lö lafofanö*+ niha Gesuri hegöi niha Maʼakhati iraono Gizaraʼeli. Fao ira ba ndraono Gizaraʼeli irugi maʼökhö.
14 Ha mado Lewi zi lö manema ondröita moroi khö Moze.+ Si tobali ondröitara yaʼia daʼö sumange nitunu ba galitö khö Yehowa Lowalangi Gizaraʼeli,+ simane nifabuʼu Lowalangi khöra.+
15 Aefa daʼö, ibeʼe Moze danö ondröita ba mado Rubeno moloʼö ösi nomora.
16 Tana khöra iʼotarai Naroeri ba zinga Ndraso Garono, banua si so ba dalu ndraso andrö, ba fefu danö sohili Medeba;
17 Hesibona ba fefu mbanuania+ si so ba danö sohili yaʼia daʼö Dibona, Bamoti-mbaʼali, Beti-mbaʼali-meono,+
18 Yasa,+ Kedemoti,+ Mefaʼata,+
19 Kiriataʼi, Sibema,+ ba Sereti-sahara ba hili sahatö ba ndraso andrö,
20 Beti-weoro, banua si so ba gahe hili Wisiga,+ Beti-yesimoti,+
21 fefu mbanua si so ba danö sohili, ba fefu mbanua nifatörö Zihona, razo niha Gamori samatörö ba Hesibona.+ Ikalaisi razo andrö Moze+ awö zamatörö banua Midiano, yaʼia daʼö Ewi, Rekema, Suri, Huri, ba Reba,+ si toröi ba soi daʼö ba sangalulu barö wamatörö Zihona.
22 Bileamo+ ono Mbeori tuka zamaʼeleʼö,+ samösa ia ba gotalua niha si mate ba mbawa wöda ndraono Gizaraʼeli.
23 Ola danö mado Rubeno yaʼia daʼö Ungo Nidanö Yoridano. Daʼö danö ondröita nitema mado Rubeno moloʼö ösi nomora zamösana, banua sebua awö mbanua si gide-ide.
24 Aefa daʼö, ibeʼe Moze danö ondröita ba mado Gado moloʼö ösi nomora zamösana.
25 Tana khöra yaʼia daʼö Yaʼezeri,+ fefu mbanua ba Gileadi ba matonga mbanua niha Gamoni+ irugi Naroeri sangotahögö Raba;+
26 iʼotarai Hesibona+ irugi Ramata-misefe hegöi Betoni, ba iʼotarai Mahanaʼi+ irugi nola Debira;
27 banua si so ba ndraso yaʼia daʼö Beti-harama, Beti-nimera,+ Sukhota,+ ba Safono, banua si toröi nifatörö razo Zihona moroi ba Hesibona.+ Olania yaʼia daʼö Ungo Nidanö Yoridano iʼotarai mbalö Nasi Gineroti,*+ tanö ba gatumbukha Nungo Nidanö Yoridano.
28 Daʼö danö ondröita nitema mado Gado moloʼö ösi nomora zamösana, banua sebua awö mbanua si gide-ide.
29 Aefa daʼö, ibeʼe Moze danö ondröita ba zi matonga mado Manase moloʼö ösi nomora zamösana.+
30 Tana khöra iʼotarai Mahanaʼi+ farahu fefu Mbazana, yaʼia daʼö fefu mbanua nifatörö Razo Ogi moroi ba Mbazana, ba fefu mbanua ba nose Yaʼiri+ ba Mbazana, 60 banua.
31 Matonga moroi ba Gileadi, simanö göi Gasaroti ba Ederai;+ banua nifatörö Razo Ogi ba Mbazana, labeʼe ba ngaʼötö Makhiri+ ono Manase, matonga moroi ba ngaʼötö Makhiri moloʼö ösi nomora zamösana.
32 Daʼö danö ondröita nibeʼe Moze khöra ba Danö si Mate Moabi tanö ba gatumbukha Nidanö Yoridano yefo Yerikho.+
33 Hizaʼi, lö nibeʼe Moze danö tana khö mado Lewi.+ Si tobali ondröitara yaʼia daʼö töi ba wamosumange Yehowa Lowalangi ndraono Gizaraʼeli,* simane nifabuʼunia khöra.+
Nisura ba gahe zura
^ Mazui ”mukalaisi”.
^ Sin.: ”tanö föna”.
^ Mazui ”moroi ba Zihora”.
^ Mazui ”lala si numalö ba Hamata”.
^ Mazui ”irabu danöra”.
^ Mazui ”larabu danö”.
^ Eluahania Danau Genesare, mazui Asi Galilaia.
^ Sin.: ”Yehowa Lowalangi ndraono Gizaraʼeli zi tobali ondröitara”.
