Yosua 14:1-15
14 Daʼa danö ondröita nitema ndraono Gizaraʼeli ba soi Ganaʼana nibeʼe Gere Eleazari, Yosua ono Nuni hegöi sondröniaʼö ba nösi nomo zatua ira matua moroi ba mado Gizaraʼeli.+
2 Lalau fadahö-dahö ba wombagi tanö ondröita+ ba zi siwa a matonga mado andrö, simane niwaʼö Yehowa khö Moze.+
3 No ibeʼe Moze danö ondröita ba zi dombua a matonga mado tanö böʼö, yefo* Nungo Nidanö Yoridano,+ ba lö ibeʼe danö ondröita ba niha Lewi.+
4 Ngaʼötö Yosefo tobali dombua mado,+ Manase ba Eferai;+ ba lö hadöi tana khö ndra niha Lewi ba soi daʼö, baero mbanua+ si toröi yaʼira faoma benua soduʼu balazo guriföra.+
5 Labagi-bagi danö andrö iraono Gizaraʼeli simane niwaʼö Yehowa khö Moze.
6 Aefa daʼö, lafalukhaisi Yosua ba Giligala+ ira matua niha Yehuda, ba imane Kalebi+ ono Yefune niha Genasi andrö khö Yosua, ”No aboto ba dödöu hadia niwaʼö Yehowa+ ba Gadesi-mbarenea+ khö Moze enoni Lowalangi sindruhu andrö+ sanandrösa khögu hegöi khöu.
7 Döfigu me luo daʼö 40 fakhe me ifatenge ndraʼo Moze enoni Yehowa andrö moroi ba Gadesi-mbarenea ba wamauze soi daʼö,+ ba ufatunö hewisa zindruhunia.+
8 Hewaʼae na lafanizi dödö* soida ira talifusö si fao khögu, hizaʼi uʼoʼö niwaʼö Yehowa Lowalangigu soroi ba dödö.+
9 Fahölu Moze me luo daʼö, ’Tanö nihundragöu tobali tana khöu hegöi ngaʼötöu, börö me no öʼataʼufi Yehowa Lowalangigu soroi ba dödö.’+
10 Simane nifabuʼu Yehowa,+ no ilumöʼö ndraʼo+ sagötö zi 45 fakhe andre, iʼotarai me iwaʼö Yehowa mbuʼusa linia khö Moze me so ndraono Gizaraʼeli ba danö si mate.+ Iadaʼa 85 fakhe ndröfigu, ba lö si mate ndraʼo nasa.
11 Abölö nasa ndraʼo simane me ifatengedo Moze. Tola nasa fasuwö ndraʼo ba ufalua halöwö simane nifaluagu mböröta.
12 Beʼe khögu mbanua si so ba hili simane nifabuʼu Yehowa me luo daʼö. Hewaʼae so zangumaʼö wa so niha Genaki+ si toröi ba daʼö, ba mbanua sebua nifasui öli,+ hasambalö itolodo* Yehowa+ ba ufofanö ira* simane nifabuʼu Yehowa.”+
13 Ifahowuʼö Galebi ono Yefune andrö Yosua ba ibeʼe Heberona tobali ondröitania.+
14 Daʼö mbörö wa iʼokhögö Heberona andrö Kalebi ono Yefune niha Genasi irugi iadaʼa, börö me iʼoʼö niwaʼö Yehowa Lowalangi ndraono Gizaraʼeli soroi ba dödö.+
15 Ba zilalö, töi Heberona yaʼia daʼö Kiriati-araba+ (Araba yaʼia daʼö niha Genaki si tehöngö). Lö saʼae hadöi fasuwöta ba mbanua andrö.+
Nisura ba gahe zura
^ Eluahania tanö ba gatumbukha.
^ Mazui ”lafetaʼu”.
^ Mazui ”urabu danöra”.
^ Mazui ”te itolodo”.
