Yosua 16:1-10
16 Tanö si no tobali okhöta ngaʼötö Yosefo+ me no labagi*+ yaʼia daʼö iʼotarai Nungo Nidanö Yoridano ba Yerikho irugi gumbu nidanö tanö ba gatumbukha Yerikho, aefa daʼö itörö danö si mate ba mbanua si so ba hili Mbetieli.+
2 Iʼotarai Mbetieli sahatö ba Lusi, tohu-tohu nola andrö ofeta ba mbanua niha Garakhi ba Gataroti,
3 ba numalö mitou ba gaekhula ba nola niha Yafeleti irugi nola Mbeti-horona+ Tanö Tou hegöi Gezeri+ ba aetu ba nasi.*
4 Börö daʼö, fefu ngaʼötö Yosefo+ yaʼia daʼö mado Manase hegöi mado Geferai, toröi ira ba danö andrö.+
5 Daʼa nola danö ngaʼötö Geferai moloʼö ösi nomora zamösana: Ola danö ondröita khöra tanö ba gatumbukha yaʼia daʼö Ateroti-adara+ irugi Mbeti-horona Tanö Yawa,+
6 ba ofeta ba nasi. Iʼotarai Mikhemeta+ tanö yöu, iholeʼö nolania tanö ba gatumbukha Daʼanata-silo, ofeta ba Yanoha.
7 Numalö mitou nola andrö iʼotarai Yanoha ofeta ba Gataroti ba Naera irugi Yerikho,+ ba ofeta ba Nungo Nidanö Yoridano.
8 Moroi ba Dafua,+ olania numalö ba gaekhula Ndraso Kana, ba aetu ba nasi.+ Daʼö danö ondröita mado Geferai moloʼö ösi nomora zamösana.
9 So göi mbanua sebua tana khö ngaʼötö Geferai moroi ba danö niʼokhögö Manase,+ banua sebua awö zide-ide.
10 Hizaʼi, lö lafofanö niha Ganaʼana si toröi ba Gezeri,+ ba toröi niha Ganaʼana andrö ba daʼö, fao ira niha Geferai irugi maʼökhö+ ba tobali ira niʼosawuyu.+
Nisura ba gahe zura
^ Mazui ”lafalua dahö-dahö”.
^ Eluahania Asi Sebolo mazui Asi Mediterania (Laut Tengah).
