Yosua 18:1-28
18 Me no aefa lakalaisi mbanua andrö,+ owulo fefu ndraono Gizaraʼeli ba Zilo+ ba lafasindro nose waʼowulora ba daʼö.+
2 Hizaʼi, so fitu tö mado Gizaraʼeli si lö manema tanö ondröita.
3 Imane Yosua ba ndraono Gizaraʼeli, ”Hana wa miradö-radö ami? Miʼofanö ba mirabu danö nibeʼe Yehowa khömi, Lowalangi ndra tuami.+
4 Fili datölu ndra matua ero sambua mado. Ufatenge ira ba wamaigi banua daʼö enaʼö lagambaraini moloʼö banua nibagi-bagi ero sambua mado. Aefa daʼö mangawuli ira ba lafatunö khögu.
5 Lö tola löʼö labagi fitu danö andrö.+ Lö mamalö toröi Yehuda ba mbanuania tanö raya,+ ba ngaʼötö Yosefo tanö yöu.+
6 Ba yaʼami, mibagi fitu danö andrö, migambaraini ba miʼombakhaʼö khögu. Ufazaumba khömi dahö-dahö+ föna Yehowa Lowalangida.
7 Hizaʼi, lö hadöi tana khö niha Lewi+ börö me fangai halöwö tobali ere khö Yehowa daʼö zi tobali ondröita khöra.+ Mado Gado, mado Rubeno ba matonga mado Manase,+ no latema danö ondröita tanö ba gatumbukha Nungo Nidanö Yoridano, nibeʼe Moze enoni Yehowa andrö khöra.”
8 Börö daʼö, lafaʼanö ira wofanö ba imane khöra Yosua, ”Miʼaeʼe ba mitöröi mbanua daʼö. Migambaraini ba miʼombakhaʼö khögu na mangawuli ami. Ufazaumba khömi dahö-dahö föna Yehowa ba Zilo.”+
9 Ba mofanö ira laʼanöröi mbanua daʼö. Labagi fitu ba lagambaraini mbanuania, aefa daʼö lasura ba mbuku. Mangawuli ira khö Yosua ba nose si so ba Zilo.
10 Ifazaumba khöra dahö-dahö Yosua ba Zilo föna Yehowa.+ Ba daʼö ibagi-bagi mbanua andrö Yosua moloʼö tana khöra zamösana.+
11 Tanö nitema mado Mbeniami me no mufalua dahö-dahö moloʼö ösi nomora zamösana, yaʼia daʼö ba gotalua danö ngaʼötö Yehuda+ ba ngaʼötö Yosefo.+
12 Ola tanö yöu khöra tebörögö ba Nungo Nidanö Yoridano, aefa daʼö numalö ba gahe hili Yerikho+ tanö yöu ba numalö tanö ba gaekhula hili, itohugö ba Danö si Mate Mbeti-avena.+
13 Moroi ba daʼö, olania numalö ba Lusi yaʼia daʼö Betieli+ ba gahe hili mbanua Lusi tanö raya, aefa daʼö numalö mitou ba Gateroti-adara+ si so raya hili Mbeti-horona Tanö Tou.+
14 Tanö ba gaekhula, tefatohu nola andrö tanö raya iʼotarai hili sangotahögö Mbeti-horona tanö raya, aefa daʼö aetu ba Giriati-baʼali yaʼia Kiriati-yeari,+ banua tana khö Yehuda. Daʼö tanö ba gaekhula.
15 Ola tanö raya iʼotarai mbalö Giriati-yeari, numalö ba gaekhula ofeta ba Gumbu Nidanö Nefetoa.+
16 Aefa daʼö, numalö nolania ba mbalö hili sangotahögö Daso Ndraono Hinomo,+ yaʼia daʼö tanö yöu Ndraso Refaʼi,+ numalö ba Ndraso Hinomo, ba gahe hili mbanua niha Yebusi+ tanö raya ba numalö mitou ba Geni-rogeli.+
17 Fatohu nola daʼö tanö yöu ba Neni-zemesi, numalö ba Gelilota föna Hili Gadumi,+ ba numalö mitou ba Gara+ Bohani+ ono Rubeno.
18 Aefa daʼö, tefatohu nolania ba gahe hili tanö yöu föna Garaba ba numalö mitou ba Garaba.
19 Iʼotarai daʼö numalö ba gahe hili Mbeti-hogela+ tanö yöu, aetu ba nasi tanö yöu Nasi Sasi-asi*+ ba mbalö tanö raya Nungo Nidanö Yoridano. Daʼö nola tanö raya.
20 Ungo Nidanö Yoridano tobali ola tanö ba gatumbukha. Daʼö danö ondröita ba ngaʼötö Mbeniami moloʼö ösi nomora zamösana hegöi ola ba zi fasuinia.
21 Daʼa döi mbanua ba mado Mbeniami moloʼö ösi nomora zamösana: Yerikho, Beti-hogela, Emeki-kesisi,
22 Beti-araba,+ Semaraʼi, Betieli,+
23 Awi, Hafara, Ofera,
24 Kefara-amoni, Ofeni ba Geba.+ So 12 fefu mbanua sebua awö zide-ide.
25 Gibeona,+ Rama, Beʼeroti,
26 Misefe, Kefira, Mosa,
27 Rekema, Yirifeʼeli, Tarala,
28 Sela,+ Elefi, Yebusi, yaʼia daʼö Yeruzalema,+ Gibea+ ba Kiriati. So 14 fefu mbanua sebua awö zide-ide.
Daʼö danö ondröita ba ngaʼötö Mbeniami moloʼö ösi nomora zamösana.
Nisura ba gahe zura
^ Eluahania Asi si Mate.
