Yosua 2:1-24
2 Aefa daʼö, me so ira ba Ziti,+ so darua zamauze nifatenge Yosua ono Nuni ba lö ifarongogö ba niha böʼö. Imane, ”Miʼae mifaigi danö andrö, mendrua manö mbanua Yerikho.” Mofanö ira ba laʼiagö nomo ndra alawe sohorö-horö sotöi Rakhaba.+
2 So zangombakha khö razo Yerikho lamane, ”So ndraono Gizaraʼeli si tohare bongi daʼa ba wamauze banuada.”
3 Ifatenge niha razo Yerikho khö Rakhaba wangumaʼö, ”Ohe baero niha andrö si toröi ba nomou, börö me tohare ira ba wamauze si sagörö banua daʼa.”
4 Hizaʼi, no ibiniʼö ndra matua si darua andrö Rakhaba. Imane khöra, ”Sindruhu sa wa so niha si möi khögu ba daʼa, ba lö uʼila hezo moroi khöra.
5 No mofanö ira me arakhagö bongi, me lö nasa niduhö mbawa göli. Lö uʼila hezo numalö ira, hizaʼi na migohi ira iadaʼa, tola nasa mikhamö.”
6 (Sindruhunia no ibiniʼö ira ba dete nomo, bakha ba döla rami* si no muhöna.)
7 Ba lagohi ndra matua andrö ba lala si toʼölö latörö na laʼötö Nungo Nidanö Yoridano.+ Iʼanemaiʼö laduhö mbawa göli me no aefa latörö ira niha solohi andrö.
8 Fatua lö mörö zi darua samauze andrö, möi ndra alawe daʼö ba dete nomo ba wamalukhaisi yaʼira.
9 Imane khöra, ”Faduhu dödögu wa ibeʼe dania danö andre ba dangami Yehowa.+ Ataʼuga ami.+ Fefu niha si so ba daʼa lö si barani wolawa yaʼami,+
10 börö me no marongo hewisa me oköli Nasi Soyo fönami ibeʼe Yehowa me mofanö ami moroi ba danö Miserai.+ No göi marongo me mibunu razo niha Gamori si darua si so yefo* Yoridano, yaʼia daʼö Sihona+ hegöi Ogi.+
11 Me marongo daʼö, modögö dödöma ba lö si barani* wolawa yaʼami, börö me Lowalangimi Yehowa andrö Lowalangi mbanua si yawa awö danö.+
12 Iadaʼa, miʼae ba hölu khö Yehowa wa mihakhösi tödö* nösi nomo namagu, börö me no uhakhösi tödö ami. Mibeʼe khögu dandra si tola ufaduhusi tödö wa mifalua niwaʼömi.
13 Böi mibunu namagu, inagu, gaʼagu, ba akhigu, simanö göi nösi nomora. Miʼorifi ndraʼaga.”+
14 Lamane ira matua andrö, ”Yaʼaga zi mate salahimi! Na lö öfatunö ndraʼaga gofu haʼökhö, mafalua niwaʼöma ba mahakhösi tödö ndraʼugö na ibeʼe khöma mbanua daʼa Yehowa.”
15 Aefa daʼö, iwaʼö khöra wofanö, idada zinali ba zandrela, börö me ba dete göli mbanua so nomonia.+
16 Imane khöra, ”Miʼofanö ba hili ba mibiniʼö ami ba daʼö tölu hari, enaʼö lö laʼila ami niha solohi yaʼami. Na no mangawuli ira ba daʼa, awena tola mitohugö wofanö.”
17 Lamane ira matua andrö, ”Hasambalö mafalua zi no möiga ba hölu khöu,+
18 asala öböbö zinali soyo andre ba zandrela nitöröma na möi ndraʼaga ba mbanua daʼa. Amau, inau, ira talifusöu, ba fefu nösi nomo namau enaʼö owulo ira yomo ba nomo andre khöu.+
19 Na so zi möi baero ba labunu ia, yaʼia samösa zi sala,* böi tahigö ndraʼaga ba daʼö. Hizaʼi, na so zi göna hadia ia ba mate* niha yomo ba nomo andre, yaʼaga zoluʼi donia.
20 Na öfatunö ndraʼaga,+ aefa saʼae ndraʼaga ba hölu si no mawaʼö khöu.”
21 Imane Rakhaba, ”Fao dödögu ba zi no miwaʼö.”
Aefa daʼö, itehegö mofanö ira. Iböbö zinali soyo andrö ba zandrela nomonia.
22 Ba mofanö ira, lasawa hili ba toröi ira ba daʼö tölu hari waʼara irege mangawuli zolohi yaʼira andrö. Sara lala laʼalu-alui ira hizaʼi lö lasöndra.
23 Mangawuli göi ndra matua si darua andrö moroi ba hili, laʼötö Nungo Nidanö Yoridano. Me falukha ira khö Yosua ono Nuni, laʼombakhaʼö fefu hadia zalua khöra.
24 Lamane khö Yosua, ”No ibeʼe ba dangada mbanua daʼö maʼasagörö Yehowa.+ Fefu niha si so ba daʼö lö si barani ba wolawa yaʼita.”+
Nisura ba gahe zura
^ Sinanö daʼa nitanö me föna. Rozi-rozinia tola mubaliʼö nukha.
^ Eluahania tanö ba gatumbukha.
^ Sin.: ”lö si terou tödö”.
^ Mazui ”miforomaʼö waʼomasi si lö faröi ba”.
^ Mazui ”yaʼia samösa zoluʼi donia”.
^ Mazui ”na so zombambaya”.
