Yosua 22:1-34
22 Aefa daʼö, möi Yosua ba wogaoni mado Rubeno, mado Gado, ba matonga mado Manase
2 ba imane, ”No mifalua fefu goroisa Yehowa nifaʼemania khö genoninia Moze,+ ba no mifalua göi fefu goroisagu.+
3 Irugi iadaʼa, lö si faröi ami khö ndra talifusömi+ ba no mifalua goroisa Yehowa Lowalangimi.+
4 Iadaʼa, no ibeʼe Yehowa waʼahono dödö khö ndra talifusömi simane nifabuʼunia khöra.+ Börö daʼö, tola mangawuli ami ba nosemi ba danö nibeʼe Moze enoni Yehowa andrö khömi tanö yefo* Nungo Nidanö Yoridano.+
5 Hizaʼi, moguna miforege wamalua amakhoita hegöi Oroisa Moze enoni Yehowa andrö nifaʼemania khömi,+ yaʼia daʼö miʼomasiʼö Yehowa Lowalangimi,+ mitörö lalania,+ miʼoʼö gamakhoitania,+ böi faröi ami khönia,+ ba mifosumange ia+ soroi ba dödö awö nosomi* maʼasambua.”+
6 Ba ifahowuʼö ira Yosua ba itehegö khöra mangawuli ba nosera zamösana.
7 Ba zi matonga mado Manase, ibeʼe khöra Moze danö ondröita ba Mbazana,+ ba si matongania, ibeʼe khöra Yosua tanö ba gaekhula Nungo Nidanö Yoridano,+ enaʼö toröi ira khö ndra talifusöra. Ifahowuʼö ira Yosua me itehegö khöra mangawuli ba nosera zamösana
8 ba imane khöra, ”Mifuli ami ba nosemi zamösana, ba miʼoyaʼö miʼohe harato, urifö, firö ba anaʼa, tembaga ba siʼöli hegöi nukha soya.+ Halö gama-gama si no murabu+ moroi ba nududa ba mibagi khö ndra talifusömi.”
9 Aefa daʼö, laröi ndraono Gizaraʼeli tanö böʼö ira mado Rubeno, mado Gado ba matonga mado Manase. Mofanö ira moroi ba Zilo si so ba Ganaʼana ba mangawuli ira ba danö Gileadi,+ tanö nibeʼe tobali nahia waʼatoröira simane niwaʼö Yehowa nifaʼemania khö Moze.+
10 Me no larugi Nungo Nidanö Yoridano ba Ganaʼana ira mado Rubeno, mado Gado ba matonga mado Manase, lafazökhi sambua naha wanunu sumange sebua sibai sahatö ba Nungo Nidanö Yoridano.
11 Lö ara, lamane iraono Gizaraʼeli tanö böʼö me no larongo daʼö,+ ”No lafazökhi naha wanunu sumange ira mado Rubeno, mado Gado ba matonga mado Manase gamaudu nola danö Ganaʼana ba Nungo Nidanö Yoridano, ba zinga danö tana khöda.”
12 Me larongo daʼö, owulo fefu ndraono Gizaraʼeli ba Zilo+ ba wolawa yaʼira.
13 Lafatenge Wineha+ ono Gere Eleazari ba wangondrasi mado Rubeno, mado Gado ba matonga moroi ba mado Manase ba danö Gileadi.
14 So dafulu zondröniaʼö si fao khönia, samösa ero sambua mado Gizaraʼeli, ba yaʼira andrö sondröniaʼö ba nösi nomo zatua ira matua ba gotalua ndraono Gizaraʼeli si hauga ribu faʼato.+
15 Me no falukha ira mado Rubeno, mado Gado ba matonga mado Manase ba danö Gileadi lamane,
16 ”Daʼa niwaʼö nono mbanua Yehowa fefu: ’Hana wa faröi ami+ khö Lowalangi ndraono Gizaraʼeli? Lö miʼataʼufi Yehowa iadaʼa, mifazökhi naha wanunu sumange ba milawa Yehowa.+
17 Hadia ambö nasa zala nifaluami ba Weoro? Hewaʼae no göna fökhö nono mbanua Yehowa si tobali fanguhukura, tarasoi nasa lua-luania irugi maʼökhö.+
18 Hadia omasi ami faröi khö Yehowa? Na milawa Yehowa maʼökhö, ba mofönu ia mahemolu ba ndraono Gizaraʼeli fefu.+
19 Na mifalua daʼö börö me raʼiö danömi, miʼae yefo ba danö khö Yehowa+ ba zi so ose Yehowa+ ba miʼiagö khöma. Hizaʼi, böi milawa Yehowa ba böi midönisi ndraʼaga ba wolawa yaʼia ba wamazökhi naha wanunu sumange tanö böʼö baero naha wanunu sumange khö Yehowa Lowalangida.+
20 Me faröi Nakhano+ ono Zera börö wanagö gama-gama sinangea muhori, hadia tenga no mofönu Lowalangi ba ndraono Gizaraʼeli fefu?+ Ba tenga ha yaʼia zi mate ba zala nifaluania andrö.’”+
21 Börö daʼö, lamane ira mado Rubeno, mado Gado ba matonga mado Manase khö ndra sondröniaʼö iraono Gizaraʼeli si hauga ribu faʼato,+
22 ”Yehowa, Lowalangi yawa lowalangi böʼö! Yehowa, Lowalangi yawa lowalangi böʼö!+ Iʼila, ba laʼila göi dania iraono Gizaraʼeli. Na molawa ba faröi ndraʼaga khö Yehowa, böi mitehegö auri ndraʼaga maʼökhö.
23 Yehowa zanguhuku yaʼaga na mafazökhi naha wanunu sumange ba wangerogö Yehowa ba wameʼe sumange nitunu, sumange niʼa* hegöi sumange fangatulö.+
24 Löʼö, so mbörö wa mafalua daʼö. Ma dania lamane iraonomi ba ndraonoma, ’Hadia urusami khö Yehowa Lowalangi ndraono Gizaraʼeli?
25 No ibeʼe Nungo Nidanö Yoridano andrö Yehowa tobali ola ba gotaluama khömi, yaʼami mado Rubeno ba mado Gado. Lö hadöi amakhaitami khö Yehowa.’ Tobali dania sanaisi ngaʼötöma ngaʼötömi ba wamosumange* Yehowa.
26 ”Daʼö mbörö wa mahalö gangetula ba mafazökhi naha wanunu sumange. Tenga ba wameʼe sumange nitunu mazui sumange tanö böʼö,
27 hizaʼi si tobali famaduhuʼö ba gotaluada+ hegöi ba ngaʼötöda wa lö aetu mafosumange Yehowa ba wameʼe sumange nitunu, sumange tanö böʼö ba sumange fangatulö.+ Na mafalua daʼö, lö lawaʼö ngaʼötömi ba ngaʼötöma, ’Lö hadöi amakhaitami khö Yehowa.’
28 Na samuza maʼökhö dania lawaʼö khöma daʼö mazui ba ngaʼötöma, mamane khöra, ’Mifaigi wamaedo naha wanunu sumange khö Yehowa nifazökhi ndra tuama. Tenga ba wameʼe sumange nitunu mazui sumange tanö böʼö, hizaʼi si tobali famaduhuʼö ba gotaluada.’
29 Lö irai so ba wangera-ngerama wolawa Yehowa hegöi ba wondröi Yehowa+ maʼökhö ba wamazökhi naha wanunu sumange tanö böʼö ba wameʼe sumange nitunu, sumange niʼa,* sumange tanö böʼö baero naha wanunu sumange khö Yehowa Lowalangima si so föna nosenia!”+
30 Ahono dödö ndra satua mbanua, sondröniaʼö iraono Gizaraʼeli si hauga ribu faʼato hegöi Fineha ere andrö si fao khönia, me larongo niwaʼö ngaʼötö mado Rubeno, Gado ba Manase.+
31 Imane Fineha ono Gere Eleazari ba ngaʼötö Rubeno, Gado ba Manase, ”Maʼökhö andre maʼila wa so Yehowa ba gotaluada, börö me lö solawa ami khö Yehowa. Lö ihuku ita Yehowa iadaʼa.”
32 Ba mofanö Wineha ono Gere Eleazari awö ndra sondröniaʼö laröi mado Rubeno hegöi mado Gado ba danö Gileadi, ba mangawuli ira ba Ganaʼana. Lafaʼema daʼö ba ndraono Gizaraʼeli tanö böʼö.
33 Ahono dödö ndraono Gizaraʼeli me larongo daʼö. Lasuno Lowalangi ba lö lafadunö-dunö saʼae wasuwöta ba wolawa mado Rubeno hegöi mado Gado enaʼö tehori mbanua si toröi yaʼira.
34 Aefa daʼö, lafotöi naha wanunu sumange daʼö* ira mado Rubeno hegöi mado Gado börö me ”naha wanunu sumange andrö zamaduhuʼö ba gotaluada wa Yehowa no Lowalangi sindruhu”.
Nisura ba gahe zura
^ Eluahania tanö ba gatumbukha.
^ Faigi Geluaha Ngawua Wehede.
^ Mazui ”sumange bua nowi”.
^ Sin.: ”ba wangataʼufi”.
^ Mazui ”sumange bua nowi”.
^ Moroi ba nitutunönia andre, te Samaduhuʼö döi naha wanunu sumange andrö.
